¹ Yesʊ ka dʊ gai yɨgira kʊlo Yahudiyai a yawʊr da laa Urdʊni, kə nəbba yɨgi ya gwa giyʊwʊng ka sʊ məssatən jɨnii yəng nyəngka mitənwʊ gərəng. ² Kə Farisawa be gwang giyʊwʊng natə bɨngo, nəngngatən gʊlən go, "Ka nyagʊ ni a jamən kang a nyuiyangʊ ga?" ³ Hangʊ go, "Sori nyənni Musa nəgənni?" ⁴ Hanjiim go, "Musa ka nga go nibari a jamən kang a nyui na ne wang." ⁵ Yesʊ go, "A sʊgəmən nyang bəra rə dur də nɨgɨnɨn da jɨnɨn." ⁶ "Mənni rə jigu wʊ 'Taajiiyu a nəngnga wunɨ jiyu, a nəngnga hanjiim wʊ bari tə wʊ chʊwi.' ⁷ 'Bəra rə nyang ni ba dʊ teengʊ tən neengʊ na məmtən bwi a nyui yangʊ, ⁸ na ji bəsʊ a yullo bwi kwan. Yɨgira kag hanjiim men nəb bəsʊ nam kwan. ⁹ Bəra rə nyang, ji wʊ Taajiiyu a mʊrgai, kari ni ba wutugo." ¹⁰ A jiwʊ hanjiim ka mura kaiyʊ, kə məssarbə ba gəm a kaʊ bwi a nəngngatən gʊliyənəng. ¹¹ Ka sotən go, "Ni wa jamən nyuiyangʊ na naawʊ gʊwi bə nəngnga talte. ¹² Nyui ya dʊ nibarangʊ na naa bəna gʊ niyʊ gərə kəgang bə nəngnga talte." ¹³ Kə nəb betənne rə bətəbi kətəl-kətəl a hangʊwi go na titən kang, mənni kə məssarbə ba gəm a jaʊ hanjiim rəgəng. ¹⁴ Yesʊ a yəmme ji nəngnga bwiyʊwʊng, a nuibə ləmmang nən hanjiim, ka sotən go, "Tə dʊ bətəm bə kətəlkətəlem a be gwa miyʊ, kari tə dang rəge, bəra ki dʊʊtətta Taajiiyuwi ta bə nyəra nən hanjiimi." ¹⁵ Yəm bə nyam mə sʊgəmən, niwʊ me ba yʊ dʊʊtətta Taajiiyuwi nyəra rə bwei me ba dɨgi we." ¹⁶ Ka dəb bətəbi a dəg a gʊlongəng ka dəgtən kangngəng. ¹⁷ Hangʊ a sʊ yoməng, kə gʊ ni a laʊwe rə səggəng ka ruwʊng go, "Ni-məsari nya, wʊllai ji bən nəngngai ki nya yuum bə kʊrə-kwangəm?" ¹⁸ Kə Yesʊ go, "Wʊlla ma ki mən bi rə mo ni nyang? Me ni nya we a dimənna Taajiiyuwi. ¹⁹ Kən yəm sori; 'Kari bən juu ni, kari bən daa rə nyui ya gʊwi, kari kuro-kuute, kari bən ti nyar, kari bən nəngnga funoi, ne graate tee mʊ tən nee mʊ." ²⁰ Ni hi go, 'Kən fʊng sori waiwʊ warigʊ fʊlla wʊ mə bweliyʊ bera kʊ." ²¹ Kən Yesʊ wa jəga hangʊ rə yotangadaang. ka sotən go, "Kǝn bʊna ji kwan. A chiinən bwi miro jɨna mʊ warigʊ na ne nəbbə me rə gəm, na ba nya jɨna kaniyʊ a ji. A jiwʊ nəngngai ki m’be nan fʊngngiye." ²² Yəm həm ka yuwomən nanang hangʊwi, ka di rə fudə yulluwʊnəng, bəra ki karə jɨna kaniyʊ deni. ²³ Yesʊ a jǝgang ka sotəna məssarbə ba gəm go, "Ba nəngnga bwaigʊ ni rə jɨna kaniyʊ a dǝga dʊʊtəta Taajiiyuwi!" ²⁴ Məssarbə ka mənna bʊni rə nuitang a tai bwantəte. Kən Yesʊ a kaba sotən go, "Bətəbi, dɨgitang a dʊʊtətta Taajiiyuwi ji bwaigʊwi! ²⁵ Ba chii rə dəndeni naaka kurmʊngəng a dɨgiya bwaka bataləng, tən kə ni rə jɨna kaniyʊ ba dɨga dʊʊtətta Taajiiyuwiyəng." ²⁶ Hanjiim ka mənna bʊni rə kwani, sʊga rə go, "Nən nyangki, wunɨ gə ba jɨr." ²⁷ Yesʊ a jəga hanjiimǝng go, "A gwa niyʊ, nən bwaigʊ, mənni a gwa Taajiiyuwi, a bwai be." ²⁸ Bitrus go, "Chu, kənnən dʊwe jɨnii warigʊ nən fʊngngənne." ²⁹ Yesʊ go, "Sʊgəmən yəmbə nyam, me rə ni wa dʊwe kai, chǝttə bari, chǝttə chʊwi, nee, tee, bətəbi, təm bǝra nən mi na rə yəmbǝ ləmangəm, ³⁰ kii me ba yu kali bee kwan a tai gʊsətə taiti: kaini, na chǝttə bari, chǝttə chʊwi, na neebe, na teebe, na bətəbi na kuuni rə notang a kʊnang, a mura gʊsətə ba be na nya yuum bə kʊrəkwangəm. ³¹ Mənni nəb mwam bə na nʊwa kaggəm ba kaʊwe bwi rə bug, bənna nʊ a buggəm ba be kag." ³² Hanjiim a juwe yɨgii ra Urshalimang, kən Yesʊ a suu a kaggəng. Bwiranəm mənna bʊni, bə ka buggəm taatə mare. Kən Yesʊ a kaba bu bwiranəm a kɨngngəng, ka kabə sotənə ji wʊ ba nəngnga bwi nəngi me rə langtangngi: ³³ "Tə chuu, nən yǝga Urshalima, bən nəbən Yəlla Niyu a kang ka nidʊwa nəbbə tung jɨniiya chəriya Taajiiyuwi tən nəb məsarəm ba soriya Mussaiyəm. Hanjiim ba mwetən dʊʊte ba yagtən na nəbba yəmbə Taajiiyuwʊm. ³⁴ Ba nʊra, a sugotən sugʊm, ba baʊ rǝ səmbi, ba juu. Mənni a buk ka kotə tə bwanbiyəng ki ba gun. ³⁵ Yakobo tən Yohana bətəm ba Zabadiyəm, ka be gwa hangʊyəng ka sotən go, "Ni məssari nən faʊno nəngnga bəmmən warigʊ ji nən chəllai." ³⁶ Ka sotəna hanjiimi go, "Wʊllai ji tə farə to nəngagəmənni?" ³⁷ Kə hanjiim go, "Nga bəmmən nən chii kwang a dəntələn da graatən da mʊn, kwan a kang kə nyang, na kwan a kang kə gwilang." ³⁸ Yesʊ a jaʊtəna hanjiimi go, "Tə yəmbə ji tə chəllari. Bətə dəmən tə yʊ kʊnang kə bən nong, na midaa rə wʊnglatang kə bə wʊnglaiyəng, rə batisma bən nəngngaimənni ga?" ³⁹ Hanjiim go, "Bənən dəmən." Kən Yesʊ a sotəna hanjiimi go, "Kʊnang kə bən nong bətə no. batisma bən nəngngaimənni, bən nəngnga gəmən rə kɨngniyɨng. ⁴⁰ Mənni ni wʊ ba chiiya kang kə nyang ka miyəngngi, tən wʊ ba chiiya kang kə gwilangngi, me mənnə nyii a muri, bərə ki, ba nəbbə titən wʊm." ⁴¹ Məssarbə bə kwuwʊm a nuiyəng, ka nəngnga jogər nən Yakobo tən Yohana. ⁴² Kən Yesʊ a buwowʊ hanjiim go kɨre rə dong, ka sotən go, "Kətə yəm to nəbbə gram ba nəbba kuma muriyəm bə chii ya nəbba jiiyəm a jii, nəbbə rə yələntəm ban jiiyəm bə nʊng graatə nəb. ⁴³ Mənni jɨn, kari ba yullo nyang a jʊgər da jɨnən. Wʊ farə go gə chii wʊ gǝra a jʊgər da jɨnənni, a chii kwag a yullo bwira, ⁴⁴ wunɨ wʊ farə go gə chii rə jiiguwi, a chii bwi a yullo kewe bagiyʊ. ⁴⁵ Bəra ki Yəlla Niyʊ a be bə go na nəngnga gəmən swiyer, a be go na gə nəngnga swiyer, na gə nəbbən yuum ba gəm bəra nəb mwam." ⁴⁶ Hanjiim ka be Yariko. Hangʊ dʊrə Yarikong tən məssarbə ba gəməng, na rə bagi nəb mwam, ka yəlla Timawʊsi bɨrɨ mo Batimawʊs, n'duu a chiiya nyii ya jʊwiyʊ chəlla jɨnii. ⁴⁷ A nui mo Yesʊ wa Nazaredi gə surəng, ka taʊ sʊrə yəm rə kumnii, go, "Yesʊ, Yəllan Daʊdai, nui bʊnta miyʊ!" ⁴⁸ Nəb mwam ka sotən go masi. Ka gug jiir a jii go, "Yəllan Daʊdai, nəngngaimən tʊgarang!" ⁴⁹ Yesʊ a siyəng go buwe hangʊ a be. Kən buwe hangʊwʊng, sotəne mo, "Gune wʊlag! Hangʊ kə bɨnne." ⁵⁰ Ka maisəre duk ka gəng rə kɨngngəng, ka gune be gwa Yesʊwiyəng. ⁵¹ Yesʊ go, "Wʊllai jii mən farə mo nəngnga nənni?" Duu hi go, "Bɨgsɨr, mə faʊ mo nya chuutang." ⁵² Kə Yesʊ go, "Ya. Nəbəntang ka furiiyəng ka mʊng ka kwara nə mwe." Rəkwa-rəkwang, ka sʊ chuurə təm, ka taʊ fʊngtang a hangʊwi a jʊwiyəng.