¹ Hanjiima a be Urshalimang, ka diye rə do rə Betafaji na Betainya, a gwa bang ka Zaitunəng, Yesʊ ka təm məssarbə ba gəm bəsʊ, ² ka sotən go, "Tə dɨgiiya muri kəttəle wʊrere bə tə nya bee lungsʊngngi gwimən bʊ we. Tə kuwe tə be rəge. ³ Gʊ a gʊlgən go nyənnǝ ki, tə sotən to Bɨgsɨr gə fare ba kaʊwe bwi rəge kʊ kʊ."" ⁴ Ka diyang ka nya bee lungsʊngngi n’kwai a fʊgang ka kaiyəng a nyiiya jʊwiyʊ, ka kuwʊng. ⁵ Kə bə ka sira-sirai a gaiyəng go, bəra rə wʊllai kəttə kɨrɨ beei lungsʊngngi hiyəng?" ⁶ Ka sotən ji Yesʊ a sʊwei, ka dʊ hanjiim a diyang. ⁷ Məssarbə bambə bəsʊwʊm be, ka be rə bee lungsongngi hi a gwa Yesʊwiyəng ka tiyatən dʊtǝtta jiiyuwʊng kən Yesʊ a gwiyəng. ⁸ Nəb mwam a mira dʊttətan jiiyu a jʊwi hiyəng, bagi a tiyatən wana kaʊwei. ⁹ Ba kak ka gəməng təm bə fʊngngərəm ka gug jiitə sʊwe rə go, "Hossana! Dəgtanga kangnga chiiya ni bera mura dun da Bɨgsɨrǝn ni. ¹⁰ Dəgtangnga kang a chii a dʊʊtettə beri tee nənʊ Daʊdai! Hossana a mura ji!" ¹¹ Kən Yesʊ a yɨgiiya Urshalimang, ka dɨgiiya kandǝ rʊwa nyiiniwʊn ka jəga jɨnii warigʊwʊng. Yʊwa mang, ka jɨr a diya Betanya tən məssarbə ba gəm kwu a jɨr bəsʊ. ¹² Təm a sillang, hanjiim a dʊwe Bethanyang, ka nui jʊʊn. ¹³ Ka chuwe jaʊrang rə waani, ka yɨgii kǝ gəbə nya jaʊri ki, a laʊwe gaiyəng, a nyabe, a diməna waani, bəra ki me sənang ka jaʊriyəng. ¹⁴ Ka sotən go, "Kari gʊ ni ba kaʊ bwi a jaʊ beeta mʊ kʊrəkwang." Məssarbə ba gəm ka nui yəm həm. ¹⁵ A laʊwe Urshalimang, ka dɨga kanda nyiini rʊwaniyən, ka kaa nəbbə miirəm tən bə sʊtarəm a mura kanda rʊwani nyiiyən. Ka nyɨngngo ganangte ta nəbbə fulgo chəmərǝm, na dəntəltə ta nəbbə miiro muglotəm. ¹⁶ Ka dang kari ni ba dɨgii rə bə mii jɨnii a kandə rʊwanyiiniwʊn. ¹⁷ Ka məssatən na hanjiimi go, "Me mʊla-mʊllai ga, 'Kai ta miyʊ ba chii kai tǝn rʊwa nyiiniyʊ ta nəb warigʊwi ga? Mənni jɨn tə wʊlga yullo gʊ kuubə chiiwi." ¹⁸ Nidʊwa nəbbə tung jɨniiya chəriya Taajiiyuwʊm, na nəb məsarəm ba soriya Mussaiyǝm, a nui yəm ba sʊwəmǝng, ka faʊ jʊwi ba juu hangʊ gəri. Mənni ka nui taatan gʊ bəra ki nəb mwam ka mənna bʊni rə məssarang ka gəng. ¹⁹ Re yʊwʊng ka jɨrmən a bɨr hǝn. ²⁰ Rə mori surəng, ka chuu jaʊranghəng ka kʊse yɨgiira sagartangʊ. ²¹ Bitrus a kəmmang ka sʊwe go, Ni Məssari, jəga, jaʊrang kən nəngngatən nyiiyɨng ka kʊse. ²² Yesʊ a jaʊtən go, "Ne yəm bə nyam Taajiiyu." ²³ Yəm bə nyam, mən sʊgəmən wunɨ ba sotən yəma bang kǝ go, "Jɨr na yara wimang ki, na nəngnga bə jʊgər a furiiyangʊ ki na nəbbən yəm bə nyaməm, ba chii nyang. Taajiiyu ba nəngnga gəmən. ²⁴ Bəra rə nyang mən sʊgəmən mo: Nə wunɨ jii ti rʊwa nyiini ti chəllai, tə nəbbən yəm bə nyam to kətə nya kii, ka chii wung ni. ²⁵ Fʊlla tə si tə rʊwani nyiiniyʊ ki, a chiin kwag tə yunotən a ba nəngnga gəmən jɨnii bwiraiyəm, na ki Tee jɨna jiiyu ba yuno gəmmən jɨnii bwiraiya jɨnu. ²⁶ Mənni tə yunotən bə jɨnii bwirai ya jiiyu ki, Tee jɨna jiiyu me ba yuno gəmmən jɨnii bwirai ya jɨnu. ²⁷ Ba hanjiim a kaʊwe bwi a Urshalimang. Yesʊ ka yora muri a kan da rʊwani nyiiniyən, nidʊwa nəbbə tung jɨniiya chəriya Taajiiyuwʊm, tən nəb mʊlarəm, na ban taabe, ka be gwan giyʊ. ²⁸ Ka sotən go, nya kumnii tə mən nəngnga jɨnii yaiye gəri a le, mənni wunɨ ga nən kumnii tə mən nəngnga jɨnii yaiyə gəri? ²⁹ Yesʊ a sotənna hanjiim go, "Bən nəngnga gəmən gʊliyən din. Tə sʊimən ki bən sʊgəmən ki mən nəngnga jɨnii yaiye rə tɨnɨ kumnii ki. ³⁰ Batisma Yohannai, wa jiiyu ga, wa nəbbi ga? Tə ngai mən. ³¹ Kə hanjiima a bugo yəm a jʊgər da jiyən ka sʊwe go, "Nən sʊwe no 'Wa jiiyu ki, 'ba sʊwe go wʊlla ma ki tə ne bə yəmbə nyaməng? ³² Mənni nən sʊwe no, Wa niyʊ ki,...."bən mʊngngo bən rə wete, bəra ki bən nui taata nəbbi. Bəra ki ka nəbbən yəm bə nyam go Yohana ni yʊwe yəmmi. ³³ Ka ngatən na Yesʊwi go "Nǝ yəmbe." Ken Yesʊ a sotən go mərə kiinang me bən sʊgəmən kərə tənə kumnii mən nəngnga jɨnii yaiyə gəri ki.