¹ Kən Yesʊ a sʊ məsatənna hanjiimi rə yəm dǝgrǝm. Ka sʊwe go, "Gʊ ni ka juu kuwa beeta rita inabiyʊ, ka kaʊwʊr rə wetəng. Ka tur sung wʊn yam inabi wʊng. A mʊ gʊ toriyəng ka ne nəbbə juu swiyerəm. Ka nəngnga yoməng. ² Fʊlla laʊweng, ka təm kewe a gwa nəbbə juu swiyerəm go na yʊwe beeta riti hi. ³ Hanjiim ka taʊ kewe hi a bʊgte, mənni a ka kaʊbwi kani rə kʊn. ⁴ Ka kaʊbwi a təm gʊ kewe bo, hanjiim ka nuitən der a dur ka nəngngatən jɨna bujiriyʊ. ⁵ Ka kaʊbwi a təm gʊ kewe bo, a wai jii we hanjiim ka jʊ kewe hi. A nəngngatən nyangnga bagi, bʊgtə bagi, juwo bagi. ⁶ Ka dʊtən ni kwan wʊ ba təmmi, yəlla daai yang gʊ. Ga dʊtən kwan wa təmtən na hanjiimi. Ka sʊwe go "Hanjiim ba ne graatə yəlla miyʊ." ⁷ Mənni nəbbə ju kuuwʊn ka sʊga go, "Wai we gən ni ba jaʊ kʊlai. Tə be tənnən juu hangʊ na kʊla hi a yullo wuni. ⁸ Ka taʊ hangʊ a juuwʊng, ka jəgmən a beeta ritiyǝng ka mai ya tariyǝng. ⁹ Bəra rə nyang, wʊllai ji ni rə tariyʊ ba nəngngatənna hanjiimi? Ni rə tari hiyʊ ba taʊ hanjiim a ne kʊnang ki ka ne bagi nəb tari hi. ¹⁰ Ke ba muri a dʊn də yʊlgoin ga? Wer də nəbbə mʊra kantəm a kwilan, ka yullo wer da jɨngngən. ¹¹ Wai ji we wa gwa Taajiiyu wi, mənni ka nyagʊ a kəmta nənnʊ. ¹² Hanjiim ka faʊ go tə taʊ Yesʊ, mənni bən nui taata nəbbi. Bəra ki ka yəm go a sʊ yəm dəgrəm a dutəttan jiiyʊ. Ka dʊ hangʊwʊng, ka diyang. ¹³ Ka təm Farisawa tən nəbba Hiridʊsəm a gwa hangʊwi go na tə taʊ a yəm ba gəm. ¹⁴ A be gwa hangʊwiyəng ka sotən go, Ni Məssari, kənən yəm no me mən nəngnga fiini rə yəmna nəbbi, mənni me mən ni rə faʊtang ka durəngngi bo. Bə nyam ka mən məssatən yəmba Taajiiyuwʊm a nəbbe. Ka daʊtən we nən ne Kaisar chəmmər da durən ga? Nə mər ga? Kari nə mərrə ga? ¹⁵ Mənni Yesʊ ka yəm furna jiiyʊ a jʊllai yʊ, ka sotən go. "Wʊllai a ma ki tə bɨngoirəng? Tə niye chəmmər na chuu. ¹⁶ Ka betəne rə kwan a Yesʊwʊng. Ka sotəna hanjiimi go, "Wʊllo we tən dun da wʊnnən a ji?" Hanjiim a sʊwe go "Ya Kaisari." ¹⁷ Yesʊ a sotən go, "Tə ne Kaisar jiiyan Kaisari, na tə ne Taajiiyu jiiya Taajiiyuwi. Hanjiim ka mənna bʊni nən hangʊ. ¹⁸ Sadʊkiyawa, ba sʊwe go me guntang wʊng, ka be gwa hangʊwi. Nəngngatən gʊllən sʊwe rə go, ¹⁹ Ni Məsari, Musa mʊlla bəmmən go chiya niyʊ a bwiya na dʊ goggor ki, chi a dəb na nyatən bətəbi a chiyangʊ. ²⁰ Ka nəb nyibi, chətte, wʊ gǝra ka naa nyui, ka bwiya me rə bətəbi, ²¹ wʊ sʊwi a dəbəng ka bwiya me rə bətəbi. Wʊ bwanbiyʊ nyang bo. ²² Waringəm ba jiiyəm nyibi a bɨtɨro a dʊbbǝ bətəbi. A jitang warigʊ, gʊggor hən ka bwiya. ²³ A guntang ka bwiyatəng, a jii wʊ hanjiima gunni bo, kii ba chii nyuiya wuni? Bəra ki waringəm ba jiiyəm nyibi ka naa nyui hi." ²⁴ Yesʊ a sotən go, "Men jii ya nəngnga ki tə le jʊwiyʊ ga, bəra ki tə yəm bə Dʊn də Yʊlgoiyən na rə kumnii ta Taajiiyuwi? ²⁵ Nəbba gun a bwiyatəm me bə nəngnga naate, me bə nəbbən naate bəra ki bə chii nyəra weni təmri. ²⁶ Mənni bo ba bɨtɨrom, na gunnəm, tə ke ba waang ka Musang ga, a yəmbə sʊwem, a jiiwu ka sei, Taajiiyu a sotən go nge gən Taajiiyuwa Yǝbraiyʊ, na Taajiiyuwan Ishakʊwi na Taajiiyuwan Yakoboi ga? ²⁷ Hangʊ me Taajiiyu wa nəbba bɨtɨrommi, mənni wa bərə yuuməmmi. "Kə tə le jʊwi" ²⁸ Kwan na mura nəb mʊlarəm ka be nui ji hanjiim sʊgari; a chuu go Yesʊ ka ngatənna hanjiimi nyagʊng. Ka gʊl Yesʊ go, "Wunɨ sori gwa lii yigai yʊ?" ²⁹ Yesʊ ka sotən go, "Sori a lii yʊ, 'Nui, Israila, Bɨgsɨr Taajiiyu wa nənʊ, Taajiiyu kwan. ³⁰ Tə yotən daa Bɨgsɨr Taajiiyuwa jɨnu rə fʊriiya jɨnʊ warigʊ, rə nər da jɨnən warigʊ, rǝ kəmarang ka jɨnəng warigʊ, rə kumnii ta jɨnu warigʊ. ³¹ Wʊ ̃suwi nyara rə we, 'Yotən daa niya kʊlliyʊ a mʊ nyəra dur da mʊn. Me ri gʊ sori ya lii yaiye. ³² Ni mʊlari hi ka sʊwe go, Ni Məsari nya, kən sʊwe mo Taajiiyu kwan, me gʊ we a diməna hangʊwi. ³³ Yotən daa rə furiiya mʊ warigʊ, na rə yəmtang ka mʊng warigʊ, na rǝ kumnii ta mʊ warigʊ, na yotən da niya kʊliyʊ wa mʊ nyəra rə dur da mʊn, ka lii jɨnii tungri ya chəriyʊ nəbbəntang ka durəng. ³⁴ Yesʊ a chuu ka sʊ yəm rə bərsanəng, ka sotən na hangʊwi go mən me pre rə dʊʊtətta Taajiiyuwi." A bukka nyangəng me gʊ ni a kaʊbwi a nəngngatən gʊllən a Yesʊwi. ³⁵ Yesʊ ka jaʊtən a jii wʊ nəngnga məssarang a kanda rʊwani nyiiniyən; ka sotən go, "Wʊllai a maki jɨn nəbbə kerəm tə sʊwe to Kristi yəlla Daʊdaiyəng? ³⁶ Daʊda rə bwigo a mura We Nidʊwi, ka sʊwe go 'Bɨgsɨr ka sotən na Bɨgsɨr da miyǝn, go chiiya kang kə nyang ka miyəng, bera fʊlla bən dəg nəbba kagəm ba mʊm a yullo dəntəllən də ti nana mʊwʊn. ³⁷ Daʊda rə bwigo ka bu hangʊ go 'Bɨgsɨr, mənni ba nəngnga go nyənne kən Kristi ba chii yəllan Daʊdai? Nəb mwam ka kaʊtən suu a hangʊwi rə bwiləmmri. ³⁸ A mura məssarang ka gəng, Yesʊ a sʊwe go, tə nəngnga ba deen rə nəb mʊlarəm, ba lii farə go tə yorə dʊtəttə kʊntaiyʊ, na farə yʊtangnga sʊrang a gana bandʊwai. ³⁹ Na farə gani chiirii a graati a kandǝ rʊwa nyiiniwʊn, na gani kuntai ya bwiləmriyʊ. ⁴⁰ Hanjiim bo bə yʊwamən kai na yʊgniyomi, mənni rʊwa nyiini wʊlilli go na nəbba chuu. Nəb bam be ba yʊ duutəttə kweiwi. ⁴¹ Yesʊ ka chii ya kag a gʊn kʊra chəmmər wi a kandə rʊwa nyiiniwʊn jiga nyəngkǝ nəb kwii chəmte a mura swa chəmməriyəng. Nəb bərə jɨna kaniyəm kwii chəmtə mwam mwam. ⁴² Gʊ yʊgʊyo ka be kwii wumo tǝ rə bwai təsʊ. ⁴³ Hangʊ ka bu məssarbə ba gəm ka sotən go, "Mən sʊgəməm yəm bə nyam, Yʊgʊyo rə bʊnəni we ka kwii a lii ji nəb warigʊ a kwiyʊ. ⁴⁴ Bəra ki waringəm ba jiiyəm a mamənne wa ji mwammi ka gəri, mənni yogʊyo we a mura bʊnǝn da gən a kwii ji ka gəri warigʊ.