¹ A jiiwʊ Yesʊ dimənera kanda nyiini rʊwaniyən nəng, kə məssariyang gʊ kwan a sotən go, "Ni Məsari, jəga wetətta mənatang a bʊniyʊ te kantətta nyiya nyiyai te!" ² Kən Yesʊ a sotən go, kətə chuu kantəttǝ kʊntai a nyiya nyiyaiyʊ tə ga? Me wer din də bən dʊ a jiiya daggaiyin də me bǝ nyɨngmənən. ³ A Jii wʊn Yesʊ wa chii a ban ka Zaitun jǝgarǝ kanda rʊwani nyiiniyən, Bitrus, Yakobo, Yohana na Andrawʊs ka gʊl hangʊ wa kɨngngǝng, ⁴ "Sʊbəmmən, wunɨ fʊlla gʊ jɨnii yaiye ba nəngnga bwiyʊ? Wʊllai jii ba yullo jiiya nʊngtangi a jɨnii warigʊ ba nəngnga bwiyʊ? ⁵ Yesʊ ka sʊ sotənnə go, "Tə chii rə yəmtang” Kari gʊ ba dəggən a letang. ⁶ Mwam ba be mura dʊn da miyən sʊgəmənǝ go mən nən hangʊ, ba jʊlla bagi mwam a lira. ⁷ Fʊlla bətə nui yəm ba kunnəməm ki, na be gəməm rə yəmnan gʊ a gani dəndangngi, kari ba da gən; a chii kwag jɨnii yaiya nəngnga bwi, mənni mwatənta a laʊwe be fʊ. ⁸ Təm ba guntən na təm, dʊʊte ba guntǝn a dʊʊte. Bən nəngnga kɨtti a gani dəndang, na jʊʊn. Yaiye sʊtang ka kʊnang ka buwongngəng. ⁹ Tə chii rə yəmtang. Bən di nən jɨn na kak ka duutǝng, bən bʊgtegən a kantǝttən rʊwa nyiiniwi. Bən di nən jɨn a kak ka nəbbə gram ba taʊ təmməm na dʊʊbe, bəra nən me, na ba chii jiiya sʊwetangngi a jii. ¹⁰ A chii kwag waʊtən yəm ba Taajiiyuwʊm a nəb warigʊ. ¹¹ A fʊlla di nən jɨn a kak ka duutəngngi ji bətə sʊwei kari ba daa gən, bən nəgən ji bəttə sʊwei, me nən jɨn bətə sʊwe, We Nidʊwi ba sʊwe. ¹² Ni ba nəbbən chi n'juu, tee ba nəbbən bwe. Bəttəbi ba nəbbən tee beban jiiyəm a dəg n'juuwo. ¹³ Bən kogən bəra rə dun da miyən, mənni wa bi furii yɨgiira mwatənti bən jəgge. ¹⁴ A jiiwu tə chuu jɨnii bwirai ya daʊtən bə wi nəngnga bwi a gwa daʊtən bə wi ki (masi ni wʊ keri a jəgga) bə ka təm ba Yahudiyam a gwi a həlla, ¹⁵ wʊ ka həllai kara suwere go gə dəb guji a kai. ¹⁶ Wʊ ka kuwi kar ba kaʊwe bwi go gə dəb ji mərani ya bwiyʊ ¹⁷ Mənni kʊnnang ka nya nyuim bə rə futəm na bə no bətəbiyəm. ¹⁸ Tə rʊwa nyiini kari jɨnii hi ba nəngnga bwi rə jʊsang. ¹⁹ A wai fʊlla hi bən nəngnga kʊnnang dənni, kən nəngngaməm bʊwʊng a jii Taajiiyu a nəngnga gʊsəti, me bən kaʊbwi nəngnga kʊrəkwang. ²⁰ Taajiiyu na mamən bə koti hi ki me rə ni ba nəngnga yuumi. Mənni bəra rə nəbbən samənsawiyəm ga dəg mamən kotǝ hi. ²¹ Mənni gʊ wa sʊgəmən go, 'Chuu, Kristi ka gwe!' go, 'Chuu, Kristi ka gʊrere ki!' kari bətə nga. ²² Bəra ki ba Kristi a nyati na nəbbə yʊwe yəməm ba nyatəm ba jɨre rə jɨnii dəndang ya mənnatang a bʊniyʊ, na ba tə jʊlla nəb, rə nyatang ki, rə bən samən saʊwiyəm. ²³ Tə chii rə yəmtang, kən sʊgəmən jɨnii yaiye jii ya laʊwe be. ²⁴ A bukka jii ya kʊnang ka yai koti hiyəng, ko ba nəngnga yullu, swang me ba nəbbən kwetərrei, ²⁵ beetǝswangngi ba yərawa jii, Jɨnii kʊntai ya jiiyʊ ba məgga bwi. ²⁶ A wai jii hi bən chuu Yəlla Niyʊ bera mura korte rə kumnii rə graatəttan gʊ. ²⁷ Ba təmme weni təmri a kʊra bəgəm bən samənsawiyəm a kɨngngɨr tə gwar a gʊsəti. ²⁸ Tə məsamən na jaʊrang, tə chuu waniyangʊ a tʊgamən na sʊwawʊrǝ ki, tə yəm to jʊsang ka diye rə do. ²⁹ Tə chuu jɨnii yaiye nəngnga bwi ki, tə yəm to ka diye rə do, ka laʊwe a nyiiya fʊgangngi. ³⁰ Kən sʊgəmən yəm bə nyam ban daam be me ba ji jɨnii yaiye warigʊ a nəngnga bə bwi. ³¹ Jii tən tǝm ba ji, mənni bwantətta miyʊ me ba suu. ³² Mənni wai ko hi, a wai fʊlla, me rə wa yəmmi, me weni təmri, men Yəlli hi, Tee hi gən kwan ga yəm. ³³ Tə chii rə yəmtang, tə jǝga, bəra ki tə yəm bə jii tən ko hi. ³⁴ Nyǝra rə ni nəngnga yomi-na dʊtən kai a bwiranəm ba gəmi, wunɨ ki rə swiyər da ba nəngngan, ka sotən na ni to təmi go kari ba da dum. ³⁵ Tə chii rə yəmtang, bəra ki tə yəmbe jii ni rə kaiyʊ ba kaʊwe bwi rəgi; nən yʊ ga, nən jʊgər da kumən ga, yaʊwi swiri ki,nən mori ki. ³⁶ Kari ba be fʊgbən, a nyagən a dum. ³⁷ Ji mən sʊgəmən ni we, mən sotəna wuni ki tə; chii rə yəmtang!"