¹ Bwiləmriya yaʊtang nga kainiyʊ tən ya jɨnii jaʊri ya mwandǝ fʊmfʊmǝn me rə bariyən a dʊtən kotə təsʊwʊng. Kǝ nidʊwa nəbbə tung jɨniiya chəriya Taajiiyuwʊm na nəb mǝsarəm be soriya Mussaiyǝm ka faʊ nyəng kə ba taʊ Yesʊ a kɨlu kɨluwi bwi rəgəng natə juu. ² Kə sʊgare go ''Mənni men ko bwiləmriyʊ, bəra ki bətə dəg furna nəbbi a gun.'' ³ Yesʊ ka Betanya a kaita Saminu rə bʊgabwiri, ka kʊra bwi ya jaʊtang a jɨnii jaʊri, kə gʊ nyui a dəbbe dalən da nong kə məttə-məttəng kərə chəmmər deniyən, ka wumən a swaratəna dur da Yesʊwʊnnəng. ⁴ Mənni bagi ba nui jwagərəm. Ka sʊga bwitən jiwʊ go, 'Wʊllai ya ma ki bən nəngnga kan lugtǝttang kangke? ⁵ Nʊng kangke na bən mii a sumənna dinari beetəttə bwanbi, na wutugotəna bə me rə gəm.'' Kətə milatən yəm ma nyui hiyəng. ⁶ Kən Yesʊ a sotən go, ''Tə dʊ hangʊ a gai. Bəra rə wʊllai kətə milatən yəmməng, ka nəngngaimən jiiya daʊtən wi. ⁷ Tə ka tə nə kəmarang ka tʊgarang ka nəbba yarmənnəm na bə me rə grəm ki, tə ka kiin jʊtəkwang, mənni jɨn me bənən chii kiin jʊtəkwang. ⁸ Nyui hi ka nəngnga swiyer də nyan da yingnatang ka bwiya ta miyʊwʊng bəra dəgtang. ⁹ Bə nyam kəmə sʊgəmməne, a gani bən waʊ yəm ba ləmləmiyəm warigʊ a gʊsətem me bən tamən rə swiyer də nyuiwa nəngngai mənən.'' ¹⁰ Yahuda Iskariyoti, kwan a mura məssarbə ba gəm, ka mwa yɨgiira nidʊwa nəbbə tung jɨniiya chəriya Taajiiyuwʊm na gə nəbən hangʊ. ¹¹ A jii wʊ nidʊwa nəbbə tung jɨnii a chəriya Taajiiyuwʊm a nui nyangngəng, ka nəngnga bwiləmri rə kwani rə yəm bʊrəm bǝbǝn nee chəmmər hangʊwʊm. Hangʊ ka sʊ farə jʊtə ba nəbən Yesʊ gəra gwa jiiyu. ¹² A ko rə jiigu wa bwiləmri ya mwan da fʊm-fʊmmən də me rə bariyən, na bo tungtang ka bənglar da bwiləmri ya yaʊtangngi, kə məsarbə ba gəm a sotən go, mən faʊ mo nən yɨgii nən yəngna gʊ bən jaʊ jɨnii jaʊri ya bwiləmri a yaʊtangngi a le?" ¹³ Ka təm bəsʊ a mura məsarbə ba gəm go, ''Tə dɨgii a mura bɨr, gʊ ni a dəbbe tur da hiiyən ba nyagən.Tə fʊng. ¹⁴ Kai ta dɨgiiwi warigʊwi kə tə fʊng, tə sotəna ni rə kai hiyʊ, 'Ni məssari go, ''Kanda fʊʊbən da miyən gɨdəne, gʊ bən jaʊ jɨnii jaʊri ya bwiləmri ya yaʊtangngi nən məsarbə ba miyǝmi? ¹⁵ Hangʊ ba nʊnggən kai tə kuntai ta jiiyu yəngna yəngnai. Tə yəngna bəmən gai.'' ¹⁶ Məssarbə ka diya ka dɨgiiya bɨr hənnəng. Ka nya jɨnii warigʊ nyəng ka sotən rəgəng, ka yəngna gwa jaʊtang ka jɨnii jaʊra bwiləmri ya yaʊtangngi. ¹⁷ Yʊwa maang, ka be tən bə kwu a jɨr bəsʊwʊm. ¹⁸ Nyəngkə hanjiim a chiiro a gʊn təg jɨnii jaʊriwi na jarə jɨnii jaʊriyəng, kən Yesʊ a sʊwe go, ''Bə nyam kəmən sʊgəmməne, kwan na jɨnu wʊnə jarə kiini ba mii.'' ¹⁹ Kə hanjiim a ləbtə furni, gʊlgare a bwitən jiiyʊ kwan rǝ kwan. ''Bən nyam me nən məgga?'' ²⁰ Yesʊ a ngatən go, ''Kwan a mura bə kwu a jɨr bəsʊwʊm, wʊnən dəg kang kiini a kasi kʊ nyəngki. ²¹ Yəlla Niyʊ ba di nyəngkə yəm bə yʊlgoiyəm a sʊwe gərə a n'giyəng. Mənni kʊnang a wai ni we ba miiyu! ''Ba litən kə kari məna bɨrɨng." ²² A jii ka jarə jɨnii jaʊriyʊ, Yesʊ ka dəb mwan də fʊm-fʊmən a dəgtən kang, ka wʊlang. Ka ne hanjiiməng, a sʊwe go '' Tə yʊ. Gən bwiya miyʊ.'' ²³ Ka kaʊbwi a dəb chʊlle, ka nəngnga wʊnnannəng, ka ne hanjiiməng, waringəm ba jiiyəm a no mura chʊlleng. ²⁴ Ka sʊwe go ''Bən dʊgʊm ba miyəm ba yəm bʊrəmǝm, bən kwiissəre bǝri nəb mwamməm. ²⁵ Bə nyam mən sʊgəməne me bən kaʊbwi no hiya inabiyʊ bo, məni ba chiiya ko wʊ bən no figʊ a mura Dʊʊtǝtta Taajiiyuwi.'' ²⁶ A bukka ma fiyangəng, ka diya bang ka Zaitunəng. ²⁷ kə Yesʊ a sotən go, jɨn warigʊ bətə təlna tə yəra bəra nən me, bəra ki a mʊla-mʊlla bwi go, 'Bən baʊ yaari, maatə ba kuwo. ²⁸ Mənni a bukkǝn guneng ki, bən lugən yɨgiira Galili. ²⁹ Kən Bitrus a sotənna hangʊwi go, ''Ki bagi ba yar warigʊ ki, me bən yar.'' ³⁰ Yesʊ a sotənna hangʊwi go, bə nyam kəmən sʊnǝnne, a mura kum we kolong me ba dʊlga kən sʊwʊng ki bən jaʊ buriya miyʊ kali tə bwanbi." ³¹ Mənni Bitrus a sʊwe go, ''Kə bənə bwiya kiin ki, me bən jaʊ buri yamʊ. Waringəm ba jiiyəm ka nəngnga bam yəm bʊrəm. ³² Ka laʊwa gʊ ka bɨrɨ mo Gesmani, kən Yesʊ a sotənna bwiranəm bagəm go, ''Tə chii a gwe, mən di rʊwa nyiini. ³³ Ka dəb Bitrus, Yakobo, tən Yohana, ka sʊ nui kʊnang rə switangnga bwi rə kwani. ³⁴ Ka sotən na hanjiiyəmi go, "Yuum ba miyǝm kə nui kʊnnang a nəngnga da men bwiya. Tə yami a gwe na tə chii rə yamtang.'' ³⁵ Yesʊ a kɨra kag baniyeng, ka ru a rʊwanyiini go, ki ba nəngnga bwi ki, dəb gəmən wai jii we. ³⁶ ka sʊwe go, "Abba, Tai, wunɨ ji warigʊ ka nəngnga bwi a gwa mwiyu, dəbbimən chʊlle kʊnnəng kangki. A nyangngi bo men faʊtang ka miyəng, məni kʊmang a rii bwi. ³⁷ Rə kaʊtang ka bwiyəng ka nya hanjiiyəma dumni, ka sotənna Bitrusi, Siman, mʊwa dum ga? Bali me bən dəmən chii rə yamtang a jii kwan ga? ³⁸ Tə chii rə yamtang tə rʊwa nyiini kari bətə yarra bɨngorang. We ka fare, mənni bwi me rə kumnii. ³⁹ Ka kaʊbwi a rʊwa nyiini nyara rə bwantə tərə jiiguwi. ⁴⁰ Nyang bo a kaʊwe bwiyəng a nya hanjiim a dumni, bəra ki dum ka riiromən kəmtə rə kwani ka bʊna ji ba sotənna hangʊwi. ⁴¹ Ka kaʊwe bwi kən bwanbiyəng ka sotən go, "Tʊ wa dum tə gərmənə nyang ga? Ka switən nyang! Fʊlla ka nəngnga. Kən nəbbən Yəlla Niyʊ a nəbbərə jɨnii bwirayəm. ⁴² Tə gun tənən di. Tə chuu ni miiri ka diye rə do. ⁴³ Ka mura sutangnga yəməng, Yahuda, kwan a bə kwu a jɨr bəsʊwʊm ka be, tən kʊlən da nəbbən rə dampotə rə gumte, rə nidʊwa nəbbə tung jɨnii a chəriya Taajiiyuwʊm, na nəb mǝsarəm ba Mussaiyǝm, tǝn taabe. ⁴⁴ Wai wʊ miiri ka bɨngotən go ''Wʊbən kʊm rə surangngi gən ni hi, tə taʊ tə di rəge tə məra." ⁴⁵ Yahuda laʊwe rə kwa rə kwang, ka be gwan Yesʊwi ka sʊwe go "Rabbi", ka kʊmǝng, ⁴⁶ Kə hanjiim a taʊ a di rəgəng. ⁴⁷ Mǝni kwana jiiyʊ ba sirasiraiyəm a jǝgge dampo a kammən suu a bwira nigra nəbbə tung jɨnii a chəriya Taajiiyuwʊm. ⁴⁸ Yesʊ ka sotənna hanjiimi go,"Tə jiire nyəra nəbbə tuwa kuubəm rə dampote na gumte na tə tai ga? ⁴⁹ Jii wʊ nən ka kiin jətəkwang mən nəngnga məssarangngi a gwa rʊwaninyiiniyu, nən ka kiin a wunɨ ko mənni tə tai be. Mənni nəngnga nyang na ba rii jiiwʊ dʊndə yʊlgon na sʊwei ⁵⁰ Bə ka tən Yesʊwʊm warigʊ ka dʊ a mwara diya. ⁵¹ Bweli rə dʊg burang kwan na mɨblo bwiyʊ ka fʊngrə Yesʊ. Fʊlla nəb həm a taʊwʊng, ⁵² ka dʊtən dʊg bʊrang həng ka mwa bwi rə kʊnnang. ⁵³ A gai wʊng ka di nən Yesʊ a gwa nidʊwa nəbbə tung jɨniiya chəriya Taajiiyuwi. A gai ka kʊratənne nəbbə gram, na rə bə tung jɨnii a chəriya Taajiiyuwʊm na nəb mʊlarəm. ⁵⁴ Kən Bitrus a fʊng hangʊ pre yɨgiira kaita nigra nəbbə tung jɨnii a chəriya Taajiiyuwi. Ka chii tən nəbbə jəga kaita rʊwa ni nyiini gɨr kərang. ⁵⁵ Kə nidʊwa nəbbə tung jɨniiya chəriya Taajiiyuwi na chiimba taabǝ bǝ gǝram ba Yahʊdawam warigʊ, ka faʊ jʊʊtə ba nya ka juu Yesʊ rəgi. Mənni a nya be. ⁵⁶ Mwammiya jiiyu ka kəra nyətte mini nyiini ya jiiyʊ a swigo be. ⁵⁷ Kə bəgai ya gunne bo a kəratən nyattəng; sʊwe rə go, ⁵⁸ kənən nui a sʊwe go gəbə nyɨng kanda rʊwani nyiiniyən də nəb ba mʊ rə kaniyən, na gə kabi gə mʊ dagi a mura kotə tə bwanbi, də mʊbə rə kaniyən."" ⁵⁹ A nyang bo nyiini ya swigobe. ⁶⁰ Kə nigra nəbbə tung jɨnii a chəriya Taajiiyuwi a guna jʊgʊr da jiiyən a gʊl Yesʊ go, ''Me bə nga yəmbə nəb sʊwera mwiya durəm ga?" ⁶¹ Ka masi sɨu rə kəgang a sʊwe bə gʊji. Kə nigra nəbbə tung jɨnii a chəriya Taajiiyuwi a kaba gʊlləng, ''Mwe mən Kristi Yəlla wʊ dəg kangngi ga? ⁶² Yesʊ ka sʊwe go ''Nən me; bətə chuu Yǝlla Niyu a chiiya kang kə nyang ka nirə kumniiyəng, wʊ be ra mura korəni.'' ⁶³ Kə nigra nəbbə tung jɨnii a chəriya Taajiiyuwi a yəro dʊttətan gʊ ka sʊwe go, ''kɨnɨ butang ka bugəng kəbən nən faʊwʊng bo? ⁶⁴ Kətə nui buməntang ka nəngngang! Tə chuu nyənne? Waringəm ban jiiyəm ka mwetən duuta hangʊwi nyəra wa daʊtən bən juwi. ⁶⁵ Bagi bo ka sʊ sugotən sugum, ka bʊmən kəmte, bʊgtəre sʊwerə go, ''sʊ yəm yʊwerəm.'' Nəbbə gram ba kanda rʊwani nyiiniyən ka bugte hangʊ. ⁶⁶ Bitrus ka təm a tara kaiyu, kə gʊ bwe chʊwi bwira nigra tung jɨnii a chəriya Taajiiyuwi a beng. ⁶⁷ A chuu Bitrus gɨr kərangəng, ka jəga nyagʊwʊng ka sotən go ''Mwe tə ka kiin tə niya Nasaredi we Yesʊ'' ⁶⁸ Mənni ka jaʊ buri a sʊwe go ''Yəmbə ji mən sʊwe ri n'jəgga be.'' Ka jiirewa tara kaiyʊwʊng. ⁶⁹ Bwe chʊwi ka chu bo, ka sotənna ba sirasirai a gaiyəm go ''Hangʊ we ka mura kwan na jiiyʊ'' ⁷⁰ Mənni ka kaba jaʊ buri, ka yɨgtiin bʊniyəng, bə ka sira gaiyəm ka sotənna Bitrusi ''Yəm bə nyam mən ka mura kwan na jiyʊ, bəra ki mən niya Galiliyʊ.'' ⁷¹ Ka su nəngnga nyii a durda gən buwa bʊni sʊwerə go ''Yəmbə ni waiwe tə sʊweri we.'' ⁷² Rə kwa rəkwang kolong ka dʊlga kə sʊwʊng. Bitrus ka kəma rə yəmbə Yesʊ a sotən go ''Kolong me ba dʊlga kali təsʊ ki bən jaʊ buriya miyʊ kali tə bwanbi,'' a kəmma nyangngəng ka yar rə wi.