¹ Rə mori wʊllagngəng nidʊwa nəbbə tung jɨniiya chəriya Taajiiyuwi a chiga na nəb mǝsarəm ba soriya Mussai na rə dəntəllən da Yahudawan warigʊ, ka taʊ Yesʊwʊng. Ka di gǝra ne Bilatusəng. ² Bilatus a gʊl hangʊ go mən Nidʊ a Yahudawai ga? Ka nga hangʊ go "mwe sʊwe nyang." ³ Kə nidʊwa nəbbə tung jɨnii ya chəriya Taajiiyuwi ka sʊ nyatǝ dǝndang a dur ra Yesʊwiyəng. ⁴ Bilatus a kaba gʊl Hangngʊ, go, me mənǝ ji bən sʊwei ga? Jəga nyatəttǝ mwam sʊra mwiyʊ te. ⁵ Mənni Yesʊ a kaʊbwi ba jaʊtən yəm a Bilatusi go nyar, nyangngǝng ka ne mənnatangnga bʊni hangʊ. ⁶ A jiiya bwiləmriyʊ, Bilatus ka jamən kang a ni wa jarəmmi wʊ nəb a faʊ go jaməmni. ⁷ A mura jarəm ka nəbbə gug dutəm na nəbbə juuwo nəbbəm. Ka gʊ ni juuwo nəbi bɨrɨ mo Barabasi. ⁸ Kə kʊlən a be təna Bilatusi chəllarə go nəngnga bəmən nyəng kə gəra bugəng. ⁹ Bilatus a nga təna hanjiimi go, “Tə faʊ to jamən kangnga Nidʊ wa Yahudawai ga?" ¹⁰ Ka yəm go bəra rə nuggun ka dəg nidʊwa nəbbə tung jɨniiya chǝriya Taajiiyu ka nəbən Yesʊ a hangʊwʊng. ¹¹ Mənni nidʊwa nəbbə tung jɨnii a chǝriya Taajiiyuwʊm ka swi kʊlən rə wurte go jagəmən Barrabas a nyii ya Yesʊwi. ¹² Bilatus a kaʊbwi a gʊl hanjiiməng, "N'nəngnga wʊllai rə Nidʊ a Yahudawai?" ¹³ Ka nga rə wurtǝ go "Yuwa hangngʊ a riyang yʊwarang ka nǝbbǝng." ¹⁴ Bilatus a sotənna hanjiimi go, "dɨnɨ bwiran dǝ hangʊ a nəngngan?" mənni hanjiim ka maʊ wurtə a jii a jii go, "Yʊwa hangʊ a riyang yʊwarang ka." ¹⁵ Bilatus farə go gə lǝmbwi nəbbəng ka jamənne Barabasǝng. Ka buktǝ Yesʊwʊng, ka yagtəna hanjiimi go a dirəga riyang yʊwarang ka nǝbbǝng. ¹⁶ Kə nəbbə barə kərangngəm a digǝre gwa duuti (a mura gʊ nəbbə gram chiiwi). Ka buwei nəbbə barə-kərrangəm bə ka gaiyəm warigʊ. ¹⁷ Hanjiim ka maitən dʊk kə rə hiya doriyəng a Yesʊwi kən hanjiim a dəgtən gurmong ka graatəng ka tʊttəng a hangʊwiyəng. ¹⁸ Hanjiim ka sʊ nəngatən sʊrang go, "Kənən sənne, Nidʊ wa Yahudawai!" ¹⁹ Hanjiim ka wʊtən damər a dur da gen ka sugtən sugəm a hangʊwi ka ruro a kak ka gəng da bə ne graatə hangʊ. ²⁰ A jiwʊ hanjiim a nəngngatən nʊr a hangʊwi kən hanjiim a jəgmən dʊkə rə hiiya dori ka maitə dʊkka gəngngəng kən hanjiim a di rəga tari natə yʊwa a riyang yʊwarangngəng. ²¹ Kən hanjiim a dəg gʊ ni suuri kwag wʊ dɨgiirɨ yɨgira mura bɨri go dəb riyang yuwarang ka Yesʊwʊng, ni hi mən bu mo Saminu Bakairawani teen Alexandai tǝn Rufusi. ²² Nəbbə barə-kərrangngəm, ka yigi nən Yesʊ a golgota (a gwa kʊssiya duri). ²³ Kə hanjiim a mʊrga hii chʊllʊwi tə wʊ rangngi ka ne Hanggʊwʊng, ka kwilla notangngəng. ²⁴ Ka yʊwa Yesʊ a riyang yʊwarangngəng ka wutugo dʊtǝtta gʊwʊng, ka nəngnga saʊrangngəng go na tə chu kə wunɨ gə ba jaʊki. ²⁵ Hanjiim a yʊwa Yesʊ a riyang yʊwarang ka nǝbbǝng, jii a koi tə bwanbi. ²⁶ Kə hanjiim a mʊlatən bwiran da gən a riyang go :Nidʊwa Yahudawai." ²⁷ A yʊwa hangʊ tən kuubǝ bəsʊ, kwan a kang kə nyang ka gəng mənni bo kwan a kə gwilang ka gəng. ²⁸ Kən yʊwa hangʊ tən nəbbə yamənna soriyəm. ²⁹ Kə nəbbə suurəm kəbbarəng, məga dutte, sʊga rə ''go!, mʊhai wʊ bən nyɨng kan da rʊwanyiiniyən na mʊ a mura kote tə bwabiyən, ³⁰ jəg dur da mʊn, na suwe wa riyang yʊwarang ka nǝbbǝng!'' ³¹ Nyang bo nidʊwa nəbbə tung jɨniiya chəriya Taajiiyuwʊm na nəb mǝsarəm ba soriya Mussaiyǝm ka nʊraa go ''Ka jəg bagi, məna dəmənbǝ jəg dur da gən. ³² Masi na Kristi Nidʊ wa Isra’ilawai, a suwe wa riyang yʊwarang ka nǝbbǝng kʊ nyengke, na nən chuu na nən nəbbən yəmbə nyam'' bən yʊwa kiin a riyang yʊwarangngəm ka nəngnga tən nʊr. ³³ Jii nukkuni yigəra jii wurwinni, kum ka məra təm yullu. ³⁴ A jii wurwinni Yesʊ ka maʊ wʊri rə kumnii go. ''Eloi, Eloi, Lamathsabathani?'' Bə sʊwe go! ''Taajiiyuwa miyʊ, Taajiiyuwa miyʊ wʊllai ya ma kən ni yɨlliyəng?'' ³⁵ Kə ba sira gai na nui yəm ba gəməm go, ''Chuu, hangʊ kə bɨrɨ Iliya." ³⁶ Kə gʊwa mwa a dəgge sʊn a hii rangngiyəng ka gugga sweng a yagtən go no, kə ni a sʊwe go, ''Bənən chu kə Iliya ba be a sɨgge ki.'' ³⁷ Kən Yesʊ a tiwi rə jiir də kʊntan rə kumniiyəng ka bwiyang. ³⁸ Kə dʊk kə ka kan dən rʊwanyiiniyən a bura fangni təsʊwʊng a dǝbe wa jii bera təm. ³⁹ Kweli a nəbbə barə kərrangngəm ka gai ka chuu nyəngkə Yesʊ a bwiya rǝgəng, ka sʊwe go, ''Bə nyam ni waiwe nanʊ Yəlla Taajiiyuwi.'' ⁴⁰ Ka nyuim ba sira prem jɨga wʊrəm, nyuim həm nən Mariyamʊ Magdaliya, Maryamʊ (Nee Yakobo na Yusufuwi) na Salomi, ⁴¹ Nyuim bambe ka tən hangʊ a Galili nəngnga tən swiyer. Tən bagi nyuim mwam ba fʊngngəm be ra Urshalima. ⁴² Yʊwa maang, bəra ki a ko sʊrbwi rəgi nyəngkə gə ko fʊngrə ko gɨriiyu. ⁴³ Kən Yusufu niya Armatiyai ka be gai ni nəb ne graata mura dəntəlləni, yam dʊʊtǝ ta Taajiiyuwi. Ka di dura səssi a gwan Bilatusi go nəggən bwi ya Yesʊwi. ⁴⁴ Bilatus ka mənna bʊni rə bwiyatan Yesʊwi ka buwe kweliyəng go nagə nui ki Yesʊ ka bwiya ki. ⁴⁵ A nya yəm bə nyam a gwa kweliyu tən nəbbə barəkərangəm go Yesʊ ka bwiyang. Ka ne bwiyan Yesʊwi Yusufuwʊng. Yusufu ⁴⁶ ka sʊttawe dʊk kə bwiyatǝn ka sɨge liboten Yesʊwi a riyang yʊwarangngəng ka nǝbbǝng. Ka be rǝ dʊk kə bwiyatǝn a məra Yesʊ rəgəng, ka ti ya mura suu wʊng sʊlla mura weri wʊ dəgmən bə ni wi ka tʊngnge wer a məra suu hi rəgəng. ⁴⁷ Mariyamʊ Magdaliya na Mariyamʊ ne Yusufuwi ka chuu gʊ dəg Yesʊwi.