¹ A bukka ko nyibiyu a suwʊng, Mariyamʊ Magadaliya tən Mariyamʊ nee Yakoboi na Salomi ka sʊtta wʊ jɨnii mətəmətti swatǝ na liiboti go na tə swaratən a bwiya Yesʊwi bəra dəgtang. ² Rə mori wʊllag a ko rə jiguwi a nyibiyu, ka diya suu hi fʊlla ko jɨrei. ³ Kə sʊgarə go, ''Wunɨ ba mɨrgo bəmən wer dən məra suu hi gərən?'' ⁴ A jəgang, ka chuu kən mɨrgo wer hən, kʊʊni, bəra ki nən kʊntangən deni. ⁵ A dɨgii a suu hiyəng kə chuurə bwelli a mai jɨnii kwaʊ, a chiichii a kullo kangkə nyangngi, ka məna bʊni. ⁶ Ka sotənna hamjiimi go, ''Taate kara magənne. Tə faʊ Yesʊ, wa Nazaredi, wʊng yʊwa riyang yʊwarang ka nǝbbǝngi. Ka gun! Me gwe. Tə chuu gʊ məna ti wi. ⁷ Tə di na tə sotəna məssarbə ba gəm na Bitrus to ka kakkan jɨnəng yɨgiira Galili. Bətə chuu hangʊ a gai, nyəngka sʊgəmǝn gərǝng.'' ⁸ Ka jịro wa suu hii rə səngniyəng rə taate, bwitə kare rə mənatang a bʊni. A sotən bə yəm a gʊ ni bǝri rə taate. ⁹ Rə mori a ko rə jiiguwa nyibiyu a bukka gunəng, ka nʊng dur dan gən rə jiigu a Mariyamʊ Magdaliya wa jəgtǝn weni bwirai nyibiyu. ¹⁰ Ka di a sotənna bə na nʊ kiinəm, nyəngkə nəngnga bumtə rə tirotangnga witəng. ¹¹ Ka nui go karǝ yuum, kəgə chuu, məni hamjiim a nəbənbə yəmbə nyam. ¹² A bukka jɨnii yaiyəng, ka nʊng dur da gən nəb bəsʊ bə di yɨgiira jʊwiyəm rə kagi biyang dang. ¹³ Kə hamjiim a kaʊbwi a sotənna bagi məssarbəng, mənni a nəbən bə yəmba nyam. ¹⁴ Yesʊ ka jɨrtəne wa məssarbə ba gəm kwu a jɨr kwan, a jii wa kawʊr ganang jarə jɨnii jaʊriyʊ, ka milatən yəm a jiiya bʊnaiya nəbətang a yəmbə nyami na furni nɨgɨnni yan jiiyu, bǝrka nəbbəmbə yəm bə nyam a ba sotən go kətə chuu Yesʊ ka guna suuwum. ¹⁵ Ka sotənna hanjiimi go, ''Tə diya mura gʊsəte tə waʊ yəmbə ləmmangngəm a təm warigʊ. ¹⁶ Wa nəbən yəmbə nyam na nəngngatən batismai ba nya jəgtang, wa nəbən bə yəmbə nyami ba kiya. ¹⁷ Wʊllai jɨnii ba nəngnga bwiyʊ ba nəbba nəbbən yəmbə nyami, a mura dunda miyən, ba dəmən a jəg weni bwirai, ba sʊ langtə tə fi dəndang. ¹⁸ Ba dəbba sootə rə kanni, ba no sam bə bwiram me ba nuitən bwaate, ba təyatən kanni a nəbba bwarabwarayəm ba kwara. ¹⁹ A bukkə Bɨgsɨr mwarmən yəməng kən dəb yɨgiira jii ka chiiya kangkə nyang ka Taajiiyuwʊng. ²⁰ Kə məssarba diya gani warigʊ warə yəm a jii wʊ Bɨgsɨr nəngnga swiyer tən hanjiimi kə jəggatən bwante a mura jɨnii wulloni ya nəngnga bwiyʊ.