¹ Nyang bo Yesʊ ka di a kanda nyiinirʊwaniyən ka gʊ ni wʊ kang ka gǝng a bʊrbʊriyʊ a gai. ² Bagi nəb ka kwitən kəmte go na tə chuu kən hangʊ ba kwara rə ni hi a ko gɨriiya Yahudawai ki, natə nya hangʊ rə kiyar. ³ Yesʊ a sotəna ni hi rə kang a bʊrbʊriyʊ go, gun na sisi a muri a jʊgər da nəb warigʊwʊm. ⁴ Ka sotənna nəb go "ka daʊtən we nəngnga jii nya a ko gɨriiyu wa Yahudawai na rə jii bwira ga:" Yiya yuum ga; mʊktə ga?" Mənni hanjiim ka mara si . ⁵ Ka jəga hanjiim rə jwagər, rə fur də yʊlluwʊn bəra rə nɨgɨna furna jiiyuwi, ka sotəna ni hiyəng go wʊ kang ka mʊng. Ka wʊwʊng, kən Yesʊ a kwara rəgəng. ⁶ Mənni Farisawa ka jɨro wʊlag yɨgiira gwa nəbba Hiridʊsəm na tə sʊga nyəngkə bə tə juu gərəng. ⁷ Kən Yesʊ tən məsarbə ba gəm a diya nyiiya wimangngi, mənni nəb mwam ka fʊng hangʊ a Galili tən Yahudiya, ⁸ tən Urshalima na Edon a kak ka laa Urdʊni tən Taya na Sidom. Kʊlən dǝ mwamən ka nui jɨnii hangʊ nəngngari, ka be gwa giyʊwʊng. ⁹ Ka sotǝnna məsarbə ba gəm go a nyagəməne bʊntəlong kə kətəleng bəra rǝ mwamma nəb ba fʊngən. ¹⁰ Ka kwara rə nəb mwam, nyəngkə nəbba be rə bwatəm go na tə nya jʊwi bətə məbra hangʊ rəgi. ¹¹ A jii wʊ weni sirəmi a chuu hangʊwi, ki ka ruro a kak ka gəng mʊwa wʊrte rə kumnii sʊwerə go, "Mən Yəlla Taajiiyuwi." ¹² Ka wʊtən suu a hanjiimi rə kumnii go kari ba dəg n'yəmgən. ¹³ A gwi a jiiya bangngəng, ka bu bə farə go be gwa giyʊwʊm. ¹⁴ Ka samən kwu a jɨr bəsʊ, (ba bu go nəb təmrəm), bə ba chii nən gəm, na gə təmrǝ warə yəm ba gəməm. ¹⁵ Ka ne kumnii ta jəgməntang a səmbatə bwiraiyʊ. ¹⁶ Ka sammən kwu a jɨr bəsʊ: Siman, wa ne dun go Bitrusi. ¹⁷ Yakobo yəlla Zabadiyʊ, tən Yohanna chi ya Yakoboi, bəm bɨrɨ mo Bʊwanandisəm, bətəm ba jɨna jiiyʊwʊm, ¹⁸ tən Andrawʊs, na Filibus, na Bartalomi na Matta, na Toma, na Yakobo yəllang Alfai, na Taddawʊs, na Siman niya Kananiyai. ¹⁹ na Yahuza Iskarioti wʊ ba mii hangʊwi. ²⁰ A jii wʊ hangʊ a dɨgi a kaiyʊ kʊlən ka kaba chiiga bo, nyəngkə me ba dəmən a jaʊ jɨnii jaʊri rəgəng. ²¹ Chəttətangʊ a nui nyangngəng, ka be taʊwe hangʊ a jɨre rəgəng bəra ki mən sʊwe mo "Hangʊ me muri a ngaʊriyangʊ. ²² Nəb mʊlarəm ba sori a Musai birawa Urshalimam a sʊwe go, "Weni bwirai ya Ba'alzabuba ka gwii hangʊ," mǝnni bo, "Rə kumnii ta nidʊ wa səmbatə bwiraiyʊ gʊ kaa weni gərii. ²³ Yesʊ ka bu hanjiim a gwa giyʊ a mura yəm dəgrəm go "Chetan ba jəg Chetan go nyənne?" ²⁴ Məni dʊʊta wʊtugo bwi fangni təsʊ ki me ba dəmən a si. ²⁵ Mənni kai a wʊtugo bwi fangni təsʊ kii bə nəngnga kag rə bwiyang gʊ, tai kai me ba dǝmǝn si rə kumnii. ²⁶ Chetan a guntəna dur da gən, na wʊtugo bwi ki, me ba dəmən a si, bəra ki yartang ka gəng ka be. ²⁷ Me rǝ ni ba dəmən a dɨgiiya kaita ni rə kumniiyʊ ka yəmən jɨna gʊ na sʊba bʊwa ni waiwe rə kumniiyʊ rə jiigu ki, meba dəmən a yǝmən jɨna kaitan gʊwi. ²⁸ Yəm bə nyam kə mən sʊgəməne, jɨnii bwirai yə nəb ba nəngngai warigʊwi bən yunotən, na rə bwantətə bwirai ta sʊwei, ²⁹ Mənni ni wa sʊ bwan də bwiran a jiiya We Yʊlgoiyʊ me bən yunotəna hangʊwi banigʊ, ka chii ni rə jɨnii bwiraiyʊ kʊrəkwang." ³⁰ Yesʊ a sʊwe yai jɨnii yaiye bəra ki hanjiim bə sʊwe go, "Hangʊ ni rə we bwirai." ³¹ Kən neengʊ tən chətəttan gʊ a be sira tariyəng. Ka təmtən na hangʊwi, go be. ³² Kʊlən ka chiiro a kawʊr hangʊ ka sotən go, "Nee mʊ tən chətətta mʊ ka sira tari fanne." ³³ Ka ngatən na hanjiimi go "Ba wunɨ ji nən nee miyʊ tən chətətamiyʊ?" ³⁴ Ka mɨrgo bwi a jəga nəbba chii ya kawʊre hangʊwʊm, ka sʊwe go, "Nee miyʊ tən chətətamiyʊ n’gəm be!" ³⁵ Bəra rə nyang wʊ nəngnga ji Taajiiyu fari gən chiyamiyʊ, tən wʊchʊwiya miyʊ, na nee miyʊ."