¹ A kaʊwe bwi a Kafarnahʊm a bukka kotə baniyəng, kən nui mo ka kai. ² Mwam ka kʊra bwi ya gai me sər we, yɨgiira nyiiya fʊgangngi, kən Yesʊwa sotən yəm a hanjiimiyəng. ³ Kə bagi nəb a be gwan hangʊwi, a be təne rə ni bwi ya bʊbʊriyʊ; nǝbbə gwar a dəbe hangʊ. ⁴ Fʊlla wʊ hanjiim a dəmən ba laʊwe hangʊ rə doi, bərə mwamiya nəbbi, kən hanjiim a gwalmən jiita kanni a bɨngotəna kullo Yesʊ kawi,a bukkə hanjiim a wumən jiita kaniyəng ka sɨg sweti hi rə ni bwiya bʊrbʊriyʊ a dawi. ⁵ Rə chuutang ka nəbbəntang ka yəm bə nyam ba jiyəməng, kən Yesʊwa sotəna ni bwiya bʊbʊriyʊ go, "Yəlli, kən yunonən jɨnii bwirai ya mʊ." ⁶ Mənni bagi nəb mʊlarəm ba soriya Musaiyǝm bə ka chiiro gaiyəm nəngnga kəmmarang a furna jiiyu, ⁷ "Ba nəngnga go nyənnə kə ni waiwe sʊrǝ yəm nyang nyengkəng? Ka sʊ bwandə bwiran! Wunɨ gəba dəmən yunotang a jɨnii bwirai, a lii Taajiiyu gən kwan?" ⁸ Yesʊ ka yəm a wengʊ rə kwa, ji hanjiim kəmmara bwitan jiiyuwi. Ka sotənna hanjiimi go, "Wʊllai ya ma kətə nəngnga kang kəmarang ka furna jiinʊwʊng? ⁹ Wʊllai a lii dəndeni sotənna ni bwiya bʊbʊriyʊ mo, 'Kən yunonən jɨnii bwirai ya mʊ' tən kəbən sotən mo, 'Gun, dəb jɨnii daariya mʊ na di yomba mʊmməng'? ¹⁰ Mənni bo na tə yəm to Yəlla Niyʊ karə kumnii a gʊsəte a yunotən jɨnii bwirai, ka sotəna ni bwi ya bʊrbʊriyʊ go, ¹¹ "Mən sʊnən mo gun, dəb jii daariya mʊ na di ya kai." ¹² Ka gun wʊlag a dəb jii daariya gʊ, ka jɨrmən a kai hi a kak ka nəbbəng, ka məna bʊni warigʊwan jiiyu, ka ne graatǝ Taajiiyu, sʊwe rə go, "Nən chuumən bə gujii wʊ nyang nyəngke." ¹³ Ka kabi ya kɨng ka bwaka hiiyən, kə nəb warigʊ a be gwa giyʊwəng, ka məssatənəng. ¹⁴ A jii wʊ surəng kə chuurə Lewi, bwe Alfai a chiichii a gʊn yərə chəmmər da durən wi, ka sotən go "Fʊngngniye" ka gun a fʊngngəng. ¹⁵ Yesʊ ka jarə jɨnii jaʊri a kaitan Lawiyʊ tən bə kʊra chəmmər da durən nəng rə bə rə jɨnii bwiraiyəm, nəb mwam ka be gwan giyʊ tən məsarbə ba gəm, nəb mwam deni ka fʊng hangʊ. ¹⁶ Nəb mʊlarəm ba Farisawam ka chuu Yesʊ jarə jɨnii jaʊri tən nəbbə yʊrə chəmmər da dʊrənəm na nəbbə rə jɨnii bwiraiyəm, ka gʊl məsarbə go "Wʊlla ma ki jarə jɨnii jaʊri tən bə kʊra chəmmər da dʊrənəm na nəbbə rə jɨnii bwiraiyəməng?" ¹⁷ Yesʊwa nuiyəng ka jaʊtən go "Nəbbə bwitə ləmangngəm me bə farə niya yɨnɨngngi; ba bwara bwaraiyəm ji farə. N’be bə mo na faʊ bərə yobi nyam mən faʊ bərə jɨnii bwiraiyəm." ¹⁸ Məsarbə ba Yohanam tən Farisawa bə so hii. Kə bagi nəb a be sotəna hangʊwi go, "Bəra rə wʊllai ki məsarbə ba Yohanam na Farisawa ba so hii ki bʊməm a so bəng?" ¹⁹ Yesʊwa sotən go, "Kagəm ba bweli rə naati ba so hii a fʊlla ka tən bweli rə naati ga? Ka tən bweli rə naati ki me ba so hii. ²⁰ Mənni kotə ka ba be wʊ bən dəbmən bweli rə naati mənni a yai kote hanjiim ba so hii. ²¹ Me rə ni ba sa dʊk kə fiyəng ka mʊrga tən kə funəng, si be ki kang dug ba bʊra warigʊ. ²² Me rə wʊ ba dəb hii ya inabiyʊ fii ka kwii a mura gulong kə funniyəng, si bə ki ba bwasə gulong həng, ki me gulong we, me hiiya inabiyu we. Nyagʊwi yangʊ kwii hii ya inabiyu fii a mura gulong kə fiiyəng.'' ²³ Yesʊ ka diya kʊna jami a ko gɨriiyu was Yahudawai, kə məsarbə ba gəm a taʊ kwira dutətta jamiyəng. ²⁴ Kə Farisawa sotənə go "Chuuwe wʊllai a ma ki tə nəngnga jiiya chiin soriyʊ a ko gɨriiyʊwʊng? ²⁵ Ka sotən go, "Tə ke bə jɨn Daʊda nəngngai a fʊlla wa nui juun tən nəbbə ka kənəmi ga? ²⁶ Nyəngka dɨgii rəga kaita Taajiiyuwi a fʊlla wʊn Abiyata gə tung jɨnii a chəriyʊ, ka jaʊ jɨnii jaʊra niya daʊtən bʊwa jaʊwi, bo ka netən a bə kiinəməng ga?" ²⁷ Yesʊ go "Nəngnga ko gɨriiyu bəri rə ni me mo ni bəri rə ko gɨriiyu. ²⁸ Bəri rǝ nyang Yəlla Niyʊ n'Bɨgsɨr a jiiya ko gɨriiyu.'',