¹ Ka sʊ məssarang a nyi ya wimangngi, kʊlən da nəbbən ka fʊng hangʊ. Mənni hangʊ ka dɨgiiya bʊntəlong. Mənni bo kʊlən da nəbbən ka banggang ka wimangngəng. ² Ka məssatən jɨnii mwam rə dəgtang a yəm a muri ya məssarang, ka sʊwe go. ³ "Tə kaʊ su no, gʊ ni wʊ warə jɨniiyʊ. ⁴ Ka di a waʊtang go nyəng bagi dʊʊm ka kwiiyo a jʊwi, kəlletə ka səbba. ⁵ Bagi ka kwiiyo a jii ya wete, gʊ metəm mwam wi. A lang be bəra ki me təm mwam a jii tang gʊ. ⁶ Nəngnga ko deniyəng ka yʊngnga yʊngngai, yagi ka kʊse bəra ki a dəg bə nɨttɨ deni. ⁷ Bagi bo ka kwiiyo a tʊtte, ka ji, a gǝra, mənni tʊttǝ ka bʊwa, a gwalbə nyagʊ. ⁸ Bagi bo, ka kwiiyo a təm bə nyam, ka gǝra a gwal nyagʊ, kən nya beeta kwaiyʊ a bwarən yagi fur tə bwanbi, yagi fur tə nukkʊn, yagi bee kwan." ⁹ Ka sʊwe go, "Wunɨ ni rə suuniyu a kaʊ suu na nui." ¹⁰ A fʊlla Yesʊ gən kwan ni, bagi nəb na rə məsarbə kwu a jɨr bəsʊwʊm, ka gʊl finita yəm dəgrəmmi. ¹¹ Ka sotən go "N'jɨn bo kən nga gəmən mo tə yəm ji ya bəmən bwiyʊ, a muri ya dʊʊtətta Taajiiyuwi, mənni bo bagi bə tə me kiinəm wunɨ ji ki, bə faʊ dəgtang ka yəmməng. ¹² Na chuutang ki, a chuu, mənni kari ba jəgga. A nuitang ki, a nui na kari ba yəm. Kari ba bukang naki bən yunotən." ¹³ Ka sotən go balli tə yəmbə yǝm dǝgrǝmhǝm ga? Hallə gʊ bətə yəm tagiiyʊ? ¹⁴ Ni warə jɨniiyʊ bə waʊ yəm ba Taajiiyuwʊm. ¹⁵ Ba yar a jʊwiyəm a jɨrgo tən nəbbən waʊ yəm a furna jiiyʊwʊm. Ba hanjiim a nui yəmməng, a langbəng Chetan ka be a dəmmən yəm həm a furna jiiyu. ¹⁶ Nyang bo rə bən waʊ a gwa wetəm, n’gəm ba nui yəm na yʊ rə bwiləmmriyəm. ¹⁷ Mənni bo a dəgbə nɨtte rə kumnii, a jii wʊ fʊmtang na rə kʊnang a bei bəra rə bwan ki a jii bani ki ban hanjiim ka təl naani. ¹⁸ Bagi bo a jɨrgo tən ba kwiyo a mura tʊttem, a nui yəm həməng, ¹⁹ jɨnii ya gʊsəti rə jʊllan da gən na rə jələn da jɨniiyən ka bʊwa a dəmmən yəm həm a yullo me rə fini. ²⁰ Bən waʊ a təm bə nyaməm, gən ba jɨrgo tən ba nui yəm na yʊwʊm, na nəngnga fini gərəm. Kən nya beeta kwaiyʊ a bwarən fur tə bwanbi, yagi fur tə nʊkkʊn, kə nya yagi bo, bee kwan." ²¹ Kən Yesʊ a sotəna ba hanjiimi go, "Mən be rə gʊngor də kweteren a mura kai naki hɨbtǝn kɨlɨn na dǝga swiyettə ga? Tə be rə ge to naki na ti a gʊ tiriyangʊ. ²² Me rǝ jii, a kɨlu-kɨlu bwiyʊ, wʊ me bən yəmmi. Me rǝ jii a məra-mərai bwiyʊ wʊ me ba jəg bwi a tariiyʊ. ²³ Wunɨ ki a kaʊ suu, na nui!" ²⁴ Ka sotən go, "Tə kaʊbwi rə kəmmarang ka jɨnəng a ji tə nuiyʊ. Chʊlle n'baʊ gəri bən banən gəre, kabi yɨngnɨn. ²⁵ Bəra ki mən yɨgtəna ni wʊ ka gəri, wʊ megəri bo, ki kən yəmmən, ne wʊ ka gəri." ²⁶ Ka sʊwe go, "Dʊʊtətta Taajiiyuwi nyərra rə ni wʊ wasə dʊʊm a təmmi. ²⁷ Da na gun ki dʊʊm ka ji a gǝra a yəmbə nyəngkə nəngnga gərəng. ²⁸ Təm rə bwigo ka nəbbən fini: rə jiiguwʊng bari, sʊg-kwaiyəng, ki ka fʊng rə kwai. ²⁹ Kwai ya bi ki, kən dəgtən kii na har, sənang ka ma." ³⁰ Ka kaba sʊwe go bən bɨngo dʊutətta Taajiiyuwi rə wʊllai? Rə bənə yǝm dəgrǝm bǝ bənə bɨngo gərəng? ³¹ Nyəra rə be mustadi wʊ waʊ a təmmi. Ga lii kətəlegʊwi a mura dʊʊm ba gʊsətəm. ³² A nyangngi bo waʊ ki ka gǝra lii yagi rita seiyʊ a nəngnga hakte, ki kəllete ka nəngnga kwiilote a haktihi.' ³³ Rə yəm dǝgrǝm mwam ka sotən yəm a hanjiimi, nyəra kə hanjiim ba yəm gərəng, ³⁴ me bə sotən yəm a hanjiimi me rə yǝm dǝgrǝm, mənni fʊlla gəng kwani ki ka jəgga tən jɨnii warigʊ a məsarbə ba gəm. ³⁵ A ko hi, yʊwa maang, ka sotəna məsarbə go, "Nən yaʊ a yaʊwʊr." ³⁶ Kən ban hanjiim a dʊ kʊlen, ka dəgi a bʊntəlongngəng. Tagi bʊntəlong tə ka gai. ³⁷ Fʊlla səmba gune rə kumniiyʊ longsungta hiyʊ gwigori, na bʊntəlong riiye rə hiiyəng. ³⁸ Yesʊ ka mura buka bʊntəlongəng,a daa dum a jiiya dəntələn. Kən ban hanjiim a be gʊg hangʊwʊng, go, "Ni Məsari bənən bɨtɨro mənni a daanbə ga?" ³⁹ A gunnəng ka mwe səmba hiiyəng. Ka sotən a hiiya wimangngi, kʊra bwi na masi sɨu. Mənni səmba hi ka da, "Wʊnəka ka masi sɨu. ⁴⁰ Ka sotəna hanjiimi go wʊlla ma ki tə nui taatəng? A lawetənkʊ bo tə nəbən bə yəmbə nyam ga?" ⁴¹ Ba hanjiim ka saʊ taatə deni ka sotəna bwita jiiyu nən wunɨ wai we, "Nən wunɨ bo, wʊ səmba wimangngi nuitən yəmmi?"