¹ Hãrã, pee shy ryvyre, pyvya katu Ñanderu Tumpa hỹnondepe, sheepe ha eã maĩ nunga ãñonova kuatiare, voka ãñonoma he pevekua, hãrã haikaviva verã pojy pee. ² Pingareko katu pijehe shi voka tykove ñaũmba raĩmi ivare, haere mbai porãmba japo ia retaivi, haereka tãnta rekova voka tapyy reta hãỹ pire myndorova. ³ Ñande rãnga hai añetevape ñandy rete ñambijicheva Tumpa pevarã, ñamombai vasushuva Ñanderu Tumpape ñande espiritupe, haereka javya pyva Kristo Hesupe, ñande rãnga hai ãñete ñanyrãỹ chĩchĩhãvã jairoja mbava kuaretare japo vekua, katuaivi ouva retare. ⁴ She shy kỹrẽy airoja kuaretare hoo japo iva retarerã, airojave mba pojy ỹnga retaivi. ⁵ Chĩchĩ ã shi piremi hãirã aavape ocho aravape, she Israelvi aimoñavajy pẽnteva, Benjamin retava: She hebreo teiva haere hebreo ray, Moise jykuatia japova pevarã aĩjy, she pẽnteva fariseore. ⁶ She rãnga ahaihuiteve ko yvy ĩãrẽ õ tyroo japovarã, ãpuã he vekuajy tupao ryhevare, haere Moise mbypara vekuapy shimbi vachea potarã mba'ety ñoĩ he ia shy rehe verã. ⁷ Opava ko maĩ nunga amomba'e aryka'e, tẽvã ã'ẽ mbai veãma she Kristo reheva. ⁸ Ãñeteitẽva ã'ẽ ahesha kavi maĩ nunga porãmbava ko yty raĩmi, hãrã haikavi vepo she ãmbi jiche, haere amombo ytype kova maĩ nungare, Hesukristo ahaihuva rehe, hãrã avy aiteve aikua amondo Hesukristo hai shi Ijarã. ⁹ Haivi añymy pẽnte hãndi, ha eã shy rykove kyambava Moise japovekua rupii, voka teko kyambava rãnga japity Kristore jairoja rãmeĩ, teko kyamba rãnga Tumpa meẽva Kristore jyrojava retape. ¹⁰ She shy kỹrẽy aikuave Kristope, haere mbaikatupe ñy myngove jyshu vekua, shee, she mbareteve verã, hãrã jyhasa asy hai hasa vekua mano rupii. ¹¹ Jaheshara apity jyvekui, tykove opambava, Ñanderu Tumpashu mũpuã jyvẽrãve manoma vare mbyteivi. ¹² Ha eãny pope opama apityva maĩ nunga haereka aikomava hekope kavi. Ãñehã paite katy aha verã tynonde jaheshara apityã jyvekui. Kristo Hesu rãnga tynonde shi pityva. ¹³ Shy ryvyre, she rãnga ha eã pee opama apityva, pẽnte maĩ nunga katy ajapo: Ãñymby sare shi opava hasama vekuaivi, hãrã ãñehã ã apity verã shynonde ẽvã. ¹⁴ Avata aha ãvãhẽ verã japyape, haereka apity verã ñyrãrõva repy Ñanderu Tumpa ñany rẽnova Kristo Hesu rupii meẽ ñande verã vate arapy õ. ¹⁵ Ñande opa kavima ñaĩva jyrojape, ñandy pya ñambi jetapo he, ñavãhẽ verã japype. Hãrã ĩme piñanduã kỹrãrã, Tumpa pyny mby kuaaka pokui. ¹⁶ Tẽvã, japityma ñaĩva pee ny ñañehãhe jaiko. ¹⁷ Shy ryvyre, piko katu she aikova raĩmi, haere pymaĩ jy he voka ore hesha haka peva raĩmi. ¹⁸ Hetama hai jyvyĩ peva raĩmi, hãrã ã'ẽ shysay ẽẽ shyrovare, ĩmẽ'ẽva heta hesha tamba Kristo jukurusurã. ¹⁹ Vokava oñehũndi verãre. Hye reta rãnga nũ tumpare oñembo tuisha tẽvãre, iko ñymy marãpe, yvy ĩãrẽ õvaĩ pyape ĩmere reta. ²⁰ Ñande jaiko verãpe rãnga hai ẽvã vate arapy, haivi ñahãrõ jyve ñany mondojepe verã Kristo Hesu rupii. ²¹ Hai ñono kavijy verã ñany retepy hai hete ova verã hĩmbipe kuepe, haere ñymbaikatu rupii opa ñono verã ipo ipe opava maĩ nunga.