¹ Hãrã pee shy ryvyre, apyry haihuva, haere shy kyrẽy apyryreshava, pẽi tãnta katu Ñanderu Tumpa hãndi. ² Airure Evódiape, haere Síntiquepe jyve, tĩñymby pya pẽnteĩ jipive Ñanderu Tumpa heepe. ³ Nde jyve shymi ĩrũ riva, airure nde rymbory verã jyve ko ñaniindy retape jyve, hai reta rãnga heta shimi'ĩrũ kova ñee kaviva ambeu airã, Clemente haere ĩrũ retajy. Haire hee opa ime ẽ Ñanderu jykuatia ñeẽpe. ⁴ Pyvya ñoipo Ñanderu Tumpa hãndi opa ara. Hai jyvyĩ pee: Pyvya verã. ⁵ Opavare tyhesha pee pyny mbaikaviva shara Ñanderu Tumpa kõõima oujy. ⁶ Avy pejepy apy maĩ nũngare, opa pymbeu Ñanderu Tumpape pimboimarã, pirureshu haereka pymeẽshu pyndy rorykue. ⁷ Ñanderu Tumpa meẽ pope pya symyĩ, hai tivishaveva kuaretare hãrõvaivi; hãrã ko pya symyĩ ñyngarekopo pyndy pyare haereka pãkãpe õvãre, Kristo Hesu rupii. ⁸ Koñema hea shy ryvyre, pypya pimbi jeta katu he opava maĩ nũnga añetevare, kyambava, pyrỹmby horyva haereka hyrãkua kavivare. Ĩmẽrãea mbai haikaviva haereka katu ñamombai vasuva, vokava reĩpo pypya pimbijeta. ⁹ Pijapo katu shee apyrỹmboi hevekua haere aheja peva pijapo verã, opaite pyhẽndu haereka pyhesha ajapo vekua; kyrã pijaporã Ñanderu Tumpa ñany mbypya symyĩva ẽẽpo penendie. ¹⁰ Shy rory rãnga, Ñanderu Tumpa heepe pyny manduajy shy reherã. Pyndy sareã shy hevirã, pỹvãheãshu rãmei rãnga marã rapo shy mbory pi. ¹¹ Ha eã pee kova aikotẽve airã, ahasa kuaa ñoĩ rãnga tẽ opa ĩmẽ areami rehe. ¹² Aikatu aiko shy pavete ryheve haereka aikatu ĩmẽ arejy maĩ nũnga. Opava pevãrã aĩ jyve, shy vãta haereka shy mbahy verã, opa ĩmẽ are vape ti mba'etyite are verã. ¹³ Mba'ety shee pevarã katumba, Kristo rupii hai shymỹ pỹrãtã. ¹⁴ Kỹrãrã, pee pijapo kavi shymborypi aikotẽve vaperã. ¹⁵ Pee Filipope õre pikuaa jyve, ãñepỹrõ ãmbeu ai ko ñee kavivarã, ahajy Macedoniaivi, koñẽĩ pende tupaovi ñõĩte rahaka she Ñanderu Tumpape mẽ'ẽãva. ¹⁶ Hãrã aĩ teri Macedonia perã, pee pyrahaka ñoĩ sheva Ñanderu Tumpape mẽ'ẽãva heta she aiko tẽvẽra pevarã. ¹⁷ Ha eã rãnga shee, Ñanderu Tumpape mẽ'ẽãvare ñõĩnte shy manduava; koñeĩ aipota Ñanderu Tumpa opa meẽ jy pee pymeẽ she vekuare. ¹⁸ Ã'ẽ peruka sheva opama ĩmẽ are. Voka peruka she vekua Epafrodito ipoipi, hãrã mbai veama mba'ety ẽ she. Ko Ñanderu Tumpape mẽ'ẽãva peruka sheva, haĩny mbai pisheka incienso pishe katuva raĩmi, mbai mbi jichehava haikavi ryheva Tumpape. ¹⁹ Ñanderu Tumpa meẽpo jype opava maĩ nũnga pee piko tẽvẽva, haereka jaiko katu ouva vate araivi Kristo Hesu rupii. ²⁰ Toñemombai vasushu opa ara Ñanderu Tumpa. Amén. ²¹ Pymỹ marãndu Hesukristo heepe opaite Ñanderu Tumpa ryhevare. Ñandy ryvyre aiko ai hãndi vare, pyny mymarãndu jyve. ²² Opaite kope õre Tumpa ryhevare, haereka mburuvisha vasu hoope õre, pynymỹ marãnduka jyve. ²³ Ñanderu ray Hesukristo jyhaihu tõĩ penendie, Amén.