¹ Ĩme Kristo meẽ pe ñymbaikatu pypyrỹmy kyreỹ verã hai jyhaihupe pãtẽrã, pypyrỹ mbyvya, opava pipityma pẽnte Espiriturã, pikatu pypyry parekorã, ² shymby horypo, piko jipive pẽnte ñeẽ perã, pẽnteva jyhaihupe, pẽnteva pyape jipive reta, pẽnteva mbai potava raĩmijy. ³ Avy pijapo maĩ nunga pee pevarã vẽĩ, haere pota peñemombai vasuivi, jejapo mbapeĩ rãnga jyve, haere pepentei tyreko hapishape mbai vasuve shiva. ⁴ Avy mbava tyheka hai, haikaviveshu veraĩ, tyheka jyve haikavi verã ỹnga retape jyve. ⁵ Piko jipive pẽĩvã rãimi Kristo hãndi. ⁶ Hai rãnga Ñanderu Tumpa teiva, tẽvã ñymy kate ỹã ñu Tumpa hekore. ⁷ Heja jyve hai rekova, hãrã japojy ijuhuvi hai teiva jokueha reva raĩmi, oa jyva tapyy raĩmi. ⁸ Hãrã ikoma tapyy raĩmirã oñemomba'eã ijehe, ĩñeẽ renduijy Ñanderu Tumpape mano peve kurusure. ⁹ Hãrã Ñanderu Tumpa ñonoshu vate opava retaivi, haivi meẽshu pẽnte tyree ẽvã opa vare ĩãrẽ. ¹⁰ Hesu heepe hỹnypya jatyka verã opava maĩ nunga ẽvã vate arapy, yvy ĩãrẽ ẽvare haere yvy ipe ẽvare, ¹¹ hãrã opa vare hei verã Hesukristo haiva Ñanderu Ray, oñemomba'e vasushu verã Ñanderu Tumpa Tuupe. ¹² Hãrã, shy ryvy reta ahaihuva, pinĩñẽẽ rendu ñoĩva raĩmi, pijapo ã'ẽ pykyje haere pyryry vape voka pyny mondojepe verã ryheva, hãrã avypo pijapo kavi ñoĩ piva raĩmi, she aĩme aĩ pyvacheva rãmẽĩ, ã'ẽ mbyry aĩme aĩva rehe katy jyve. ¹³ Tumpa rãnga pyndy parekoivi pyny mbory pijapo verã voka haikaviva, haere pyny mbory pojy pymy vahe kavi verã japype. ¹⁴ Pijapo katu opava mbai, pinjeta rei mba haere pijaka mbavape. ¹⁵ Avy mbava hesha pyrehe verã, mbai porãmba piji javy vare, pikoĩ jyve tykove porãmba reta poshyva mbyteipi, Ñanderu Tumpa ray reta raĩmi, haere himbipeva raĩmi jy ko arapy õ jasy tata pỹntumarã. ¹⁶ Pẽĩ tãnta katu voka ñeẽ kavi meẽva tykovepe kỹrã rãpo, oujyma Kristorã shy pya hory pyndy rehe, aikuama añani reĩã, haere amba'apo rei mbavarã. ¹⁷ Shy rykove hekyha tẽ shy heviva, opave ẽvẽrã pee pimbijicheva Ñanderu Tumpape pirojakue rupii, she avy a hãrã ambijao jyvepe vy a ĩme areva. ¹⁸ Pyndy rory katu jyve, hãrã she avy a verã jyve. ¹⁹ Ñanderu Tumpa potarã she kỹrẽy amondo pyndy koty Timoteo, avya verã aikuama marãra piko. ²⁰ Mba'etyjy ỹnga hai raĩmi pya pẽnteĩ she ndieva, haere ãñete ojepy apy pyndy reheva; ²¹ opava reta rãnga heka ijupe pevarãvẽĩ, hãrã voka Hesukristo ña ãpova ryheva katy mba'ety hai. ²² Pee katy pikuaa marãra mba'apo Timoteo, shĩmi ĩrũ verã ñeẽ kaviva amyhỹrãkua verã, sheei shy ray raĩmi. ²³ Shy kỹrẽy amondo pykoty, aikuaama verã mbaivara ikopo shy hevi. ²⁴ Tẽvã airoja Ñanderure she jyve aha apyryresha verã jyve. ²⁵ Tẽvã, haikavi jy she amondo verã shy ryvy Epafroditope, mba'apo i she ndieva, haere shĩmi ĩrũ iva, hai pee tei pymbou shy koty vekua shĩmi ĩrũ verã shee aiko tẽvẽ vape; ²⁶ hai kỹrẽy pyndy resha opavare pee pẽĩva, haere ojepy apy, pee pikuaa ñymbairasy irã. ²⁷ Ñymbai rasyarak ãñete, hãrã ajete mano. Tẽvã Ñanderu Tumpa katy parekoshu, haere ha eã ha ẽĩ she jyve, potãã ñĩmi ĩrũ vejyshu she jepy apyrã. ²⁸ Hãrã narẽ aĩteva amondojy pyndy koty, pyvya verã jyve pyheshajyshurã, haere she jyve avyave jyvẽrãve. ²⁹ Pymby horyshu Ñanderu Tumpa heepe, ñande ryvy teiva raĩmi, haere hai raĩmiva pyryhory ñoĩ pojy. ³⁰ Ajete rãnga mano Kristo rehe vapẽĩ. Haereka haihu mba hykove shĩmi ĩrũ i verã, pee katumba pijapova, mbyry pẽĩ shy hevirã.