1 Ja'eva haikaviveva hai: Ĩmẽ jare pẽnte Pairuvisha vate arape, vapyma'ẽ Ñanderu Tumpa vapypya jakata kyty. 2 Hai mba'apo'ẽ pai rãĩmi oo ijeshahaseape, Ñanderu Tumpa japova vate arape, ha'ẽã kuaretare japova. 3 Pai reta rãnga ñonohã mbishaka verã me' ẽãvã haereka mymba jukahava Ñanderu Tumpa pevarã, hãme rãnga Hesukrito jyvehe mẽẽ verã. 4 Hai iko teri ko yvy ĩãrẽrã, Hai ẽẽã pa'irã, shara ĩmẽ teri'ẽ pai me'ẽãvã mbishaka'õ Moise mbypara vekua heiva rãĩmi. 5 Kava paire mbishaka me'ẽãvã haire mbishakahashua rãĩmĩ japotẽjyve reta, vate arape'õ rãĩmi; Ñanderu Tumpa teiva rãngamba heishu Moise, hai japorã vẽkua oo ijeshahaseape: mãĩ kavi nymbyheshakava rãĩmi japo yvyturusu ĩãrẽ. 6 Tẽvã ã'ẽ mẽ'ẽã ñande Hesukrito pẽnte pai heko kaviveshia ã'ẽ pa'irã ia retaivi; shara hai hãndi ẽjy ñẽẽ py'ahu mẽ'ẽãvã, Hai rupii katu vãhẽhã Ñanderu Tumpa ẽvãpe ara vate'õpe; Hesukrito rupii Ñanderu Tumpa pya mypẽnteĩjy hãrã kova haikaviteveshi, Moise arape ẽvẽkuare. 7 ñẽẽ me'ẽãvã tynonde vekua haikavi'ẽrã ikoatẽveãpojyhe, py'ahuva. 8 Õñepyrõ hãndi retarãvãĩmba hei: Vãhẽpokui ara ñẽẽ me'ẽãvã py'ahuva ajapojy hãndi verã Israel haereka Juda. 9 Haiveamapo tynondevare ajapo hãndi vekua rãĩmi, ipope apyshyshu reta ãnohẽ verã Egiptoivi. Israelitare syryshi ko ñẽẽ ãmẽẽvarã, ãĩngareko veãjyvehe reta. 10 Hãme rãnga Ñanderu Tumpa hei: Kova ñēē ãmēēvã ajapo hãndi verã Israel, vokava ara hasamarã kyrãpokui: Shi ñēē ãñonopokui ñãka retapy haereka pya retape, she ãīposhu retakui Ījarã hãrã hairetapokui shy rēta īrūre. 11 Voka arape mba'etymapokui heishu verã hēnta'īrūre haereka hapishare: kuoave Ñanderu Tumpa; opava retapo area shykuakui, ndeiteriva hareka kuakuavare. 12 Ahejareiiposhi retakui mbai porãmba vekua; shymandua veamapohekui haire japo porãmba vekuare. 13 Hai hei ñēē me'ēãvã py'ahuva haiva tynonde me'ēã vēkua, hekovia. Hãrã tynonde vekua tujamarã, opa serima.