¹ Melquisedec, selem (jerusalen) havisha, haereka Ñanderu Tumpa vatēõ pai, õhe yvãityshu Abraham, hai oujy rãvekua ūrūndy (4) mburuvisharetape (genesis 14,1-20) . ² Harã Abraham mēeshu melquisedec diesvi pēnte mē'ēava opava mbai veruvekua, Melquisedec he'iashu he'iseva pyry^mbyheko kaviva huvisha, haiva he'ise pyavapy juhuvisha. ³ Hai tuñã, hēntãvã, jypyivi oñepyrõã hykove japyã, harã'ova Ñanderu Tumpa tay ēva paivasu opamba verã rãimi. ⁴ Pymãihe mãrãnamba mbaivasuite ko Melquisedec haipevarã rãngashū Abraham teru vasu meshuvekua diesvi(diezmo) pepēnte opaite mbai veruvekua nynãrõaivi. ⁵ Vokava rehe, Levi ñymoñaheave pa'irã'iare katūi juruveshu yngaa isrraelitaivi, tyvyhea retaivi pēnte diesvi me'eava mbyparaha vekuope evã raimi, vokava outevãjyve Abrahamvi. ⁶ Harã Melquisedec haimbatē hairyheva pai tevã Abraham meshu diesvi penteva teva Melquisedec ījeta kavīiheshu Abraham opaite kova Ñanderu Tumpa imereheva. ⁷ marã he'iashua: mishīveva injeta kavihe vateve'ia ipopi. ⁸ kope rãnga mē'eha diesvi penteva kuimbai mano verãpe, tēva haipe mē'ēha diesvi penteva jykuahaka verã hykovēi teri'ia. ⁹ Levi haereka ñymoñahare pa'i rãmbojyre mē'ēha ñoimbashu diesvi penteva Hara katu jajyveshu, Levi mējuvea diesvi pēnteva Melquisedec Abraham vupīi. ¹⁰ Levi Abrahampy ikoma, ñemivape rãimi, Melquisedec õherā vekua yvãitishu Abraham. ¹¹ Tentã isrraelitare mē ēhambashu Mbyparãra ñonohavekua, (ley) ko pai Levi vyhevare ipo rupīi, harã isrraelvare Levi haereka Aarón rupīi Ñanderu Tumpa hekokavivare kyãrã tekotevēambapo ynga pai, Melquisedec naimiva(hesukrito teva). ¹² Shara okambia'ahajy pai Levi ryhevarã okambiaha jyve mbyparara japohavekua(ley). ¹³ Horã Hesucritore hēiha hevekua yngare haivi vokava tribuivi mba'ety mbava ikova pa'irã. ¹⁴ Shara kuahahakavi Ñanderu Tumpa ouva Juda tribuivi, harã Moise Mba'ēa heihe kova tribu injetahe pairetara. ¹⁵ Kova jahesha kavivema pūajyva pēnte pai Melquisedec rãimiva. ¹⁶ Ikoãmbashi pa'ira mbyparaha japohava rupīi, Levi ñymoñahea ñoivera koñeī tykove opambava mbai katu pêi. ¹⁷ kyrãhãiranga Ñanderu Tumpa hei he: Nde rãnga hai pai japymba Melquisedec raimiva. ¹⁸ Vokava rehe, tynonde mbyparaha japoaverã ikangy hara, mbijicheha shara opa porãa. ¹⁹ Moiase japovekuaranga, mainanga ñonoā hekope, hãmerãnga vokava henda kuepe ã'ē īmejare pēnte ñaharova haikaviveva,harã vokava rupīi ñavãhe Ñanderu Tumpa ēvape. ²⁰ Ñanderu my'ãñetē hai heivekua, iñee mēe rupi hare yngava paire katu ikoshi pa'irã Ñanderu meē mbateva. ²¹ irū pairetarãnga ñonoha iñee membavekuarehe,teva hesu iñee mêryheve, heiva rãimi Ñanderu tumpa Kuatia ñēepe: Ñanderu mēe iñee hara okambiãpojy: "Nde hai pai opambaverã ryheva Melquisedec rãimiva". ²² Vokova rehe Hesu my'ãñete pente iñee mēe haikaviveva, tynondeve kuaretaivi. ²³ Hara ira paire hetambate, opã manorã ñonoha ñoimba iru hendakuepe. ²⁴ Hesurãnga puãjykua hairã ñonohãjy japovekuape irū paire rãimiva. ²⁵ Vokava rehe katamã mõndojepeshu opite vaheshuvahai rupīi Ñanderu tumpa ēvape shara hykove jyvara, jurure'i arēhe verã. ²⁶ Harã kyrãva pai vasu rãnga ñaikotevehea: heko kaviva, ñymbai kavia,heko kyamba jihiambava mbai poramba'iare heko porãmba vekua rehe haereka vate aravi vateve hapiha vekua. ²⁷ Hai ha'ēa irū pai vasu reta raimiva opa arape ikotēveva mee mbãi mymba jukahava, ñymbai porãmba vekuare rãni haivi yngare ñymbai porãmba vekuarejy shara Hesu penteimba mee hykove opmba verãma. ²⁸ Moise jykuatia rupīi ñonohamba pai vasu kuaretare heko porãmba, Ñanderu Tumpa iñee meva rupīi mbyparaha ñonoavekuaivi ñonoha pai vasura ko Ñanderu Tumpa tay ikoshi verã pai japymbava ryheva hekokavivape.