¹ Oipaiteva ynga pai vasu hekapyva kuimbaire paũvi, hãme ñoñoha mba'apo verã Ñanderu hynõnde hapishare pevarã, mbeu rãnĩpo mẽ'ẽava haereka mẽ'ẽãva heko porãmbavare. ² Hai pyrypareko haereka harõkuapo kuaambãvare haereka jyvavy hãndiva hai jyve kangy kuaarã ³ hãme rãnga hai ñymbeurãnĩ poshu mẽ'ẽareiva heko ky'akuere haivi hẽnta irũretare. ⁴ Mba'ety katu puãhe, hairãnga pai vasu, Ñanderu henõvai rãnga ikoshua rãimi Aarón ⁵ kyrãi jyve Hesukristo iñyñonoã ha'ẽĩ pai vasurã, Ñanderu rãnga hẽnoshu: Nde hai Shyray ã'ẽ arape She arỹmymoñama ⁶ Ynga hẽndaipi Hai hei: Nde hai pai vasu opa ara pevarã Melquisedec heko ryhevarãimĩva ⁷ Hai iko teri irã yvy iarẽ ho'ope, jurure asy haereka heta ñymboi say pypeĩ ryheve Ñanderupe, Hai nõhẽshi verã jyhasa asykuevi hãme Ñanderu hẽndu Hesupe. ⁸ Hesukristo Ñanderu Ray tẽva jyhasa asyipi Hai heshaka ñe'ẽ hẽndurã. ⁹ Jyhasa asyipi Hai hipity tykove haikavi'õva, hãme rãnga Hai jyve pyrỹ mõndo jepeva ija opavare ñe'ẽ hẽndúvare pevarã. ¹⁰ Hãme rãnga Ñanderu ñoñojyveshu pai vasurã Melquisedec heko rãimĩva. AVYPA PIÑYMYKANGY PIÑYMYKYRËY JYVYÏ POTA ¹¹ Heta ñe'ẽ imẽve'ẽ jaiheverã, hasy nũnga opa ñambeu kavi verã pee pevarã, pee piñymbypya tãntarã. ¹² Pee arykaimãte pyrỹmboi'ia, ã'ẽ pymbore apojy heko mbo'eava hasymbare, Ñanderu iñẽẽ oñepyrũa ryheve. Pikotẽve rãngajy kambyre, timbiu pohymavate verã. ¹³ Akua kambyre iko'iva, katuãa heshakuaa haereka ñymboi akua ñẽẽ heko kavivare. ¹⁴ Akua syryva katy hou tĩmbiu pohyva, jypykuamarã mbivavy verã mbai kavi mbai porãmbaa mbyteivi.