¹ Hokavare shyryvyre heko kyambare, Ñanderu hēnoãmamba ña'ãmporãre, pymaikavi Hesukristore, Ñanderu mboumba arykai pairasu rãīmī, Jairojahe verã. ² Hesukristo japo haipekavi Ñanderu potava, Moises japova rãimī haipekavi Ñanderu potava jyrojavare mbytepe. ³ Hesukristoima momba'eavasuve Moiseivi, momba'eavasua rãimi oo japoava japovape. ⁴ Opaite oo japoava reta rãnga, hai hoka mbai opa japoorã hai Ñanderu. ⁵ Moises haipekavi opa japo Ñanderu potava, opaite jyrojava mbytependa iko'i jokuerea raimī, kuakaverã Ñanderu potava hãndi japovekua, Moises jykuatiape mbyparava raimī. ⁶ Hesukristo rãnga hēndapekavi opapo japo Ñanderu potava ta'yraīntepo opaite Ñanderu hēnta īrūre mbytepe, harã hoka oo Ñanderu mupuãva ñande jairojara pyasymi ryheve ñai hãndi ñaharõ kavirã hãrã hoka mbai ñapyrymboi ñaihea va'hēpeve. ⁷ Hokavare Espiritu haikaviva hei ã'ē pyhēndupo Ñanderu inēē ⁸ avypo pyndypya pymytãnta Isrraelvare japoa raimī, pūahe Ñanderure harã pyarãshureta yvy ikoambaipi (desierto), ⁹ Haipe pynytynondevare shypyarã reta heshamba heshateãre 40 año pukukuekavi hei pynderu. ¹⁰ Hãmearã shyposhyshu, hareka hai: pyamõnkueñoi reta, hãrã potãã kuareta shyrape. ¹¹ Hãmearã she hai poshype: Icheõpo reta putu'uharape. ¹² Pymaihe, shy ryvyreta, avypo peeave pyndypya mokue'i harã pypoi Ñanderu haikavivevaivi. ¹³ Pyñymykyrēypo opa'arape, imeteri'ē mby'opareivara (perdon) potmba pynymbyteivi'ē pya mytãntavãm, hoka mbaiporãmba pynymbytavi. ¹⁴ Ñande, Kristo ryhevare, tãnta katu ñai jairojakuepe japyapeve, jarekova ñañepyrãvaivive. ¹⁵ Hãmēara he'iha: kova arape pyhēndurã Pynderu iñēēra avypo pypya pymbyheta, Isrraelvare japoa raīmi Perure añemoihereva. ¹⁶ 9 Mbavetara Ñanderure oñemoi'iãrē. Ha'eara Moises Ejiptoivi õhē hãndi vekuare. ¹⁷ Hara mbara anderu poshyshu arykai 40 año kavi. Hokava Ñanderure ñymbyvaisho iare yvy ikoambaipi. Hameara ha'õvekue pyratei yvy ikoambape. ¹⁸ Harã mbavapera mēē iñeē isheapo putu'uavape. Hoka ñēē hēndumbava yvy ikopambaipi isheãpo putu'uara jy'arape. ¹⁹ Hãrã kyrã jahesha haire katuã ishe retarã Ñanderu putu'arape jyrojãheretarã.