¹ Jyroja ranga he'ise japityva katupo hai ñaharoñai hama hai he'iseva haima jaheshamba tẽva mai nunga nandypya mokue ira jaikua kavi haima. Hae heimavekua katupo ikove hai. ² Kyrava jyroja rupi ñandypykuere jyrojavekua myvya haima jyrojahe Ñanderuitepe hara haire haipe rojaiteve shureta. ³ Jyrojakue rupi jaikua kavi Ñanderuitepe japovare iñe'ẽ eipi ko yvy haima arape haima opaite mba'e ñande jaheshavare ã'e Ñanderuite japoma vekua heshaha araivi. ⁴ Abel jyrojaivi kua aite pente me'eava haikaviteva Cainvi hameara Ñanderu Tumpa heivekua Abel re. Haima ahesha pentei heko kiambava hai vya me'eva ryheve kyrava jyroja kaviva rupi Abel ijeta teri'iñande ajema manote. ⁵ Enoc jyrojarã hupiha shupe arape haima hesha jyvy'ashu yvyiare Ñanderu Tumpa rahashu Enoc mano haipe hupishu mbe'uavera jyve hai mypya'hory hague Ñanderu Tumpape. ⁶ Jairojara namypya horya Ñanderu Tumpa haima vaheva hendape jyrojapo he Ñanderu Tumpa oihai haima ha'e rahahapo hara hekavape. ⁷ Noe jyrojaitera omomba'e Ñanderu Tumpa haima iñe'e renduivi japo barco mareyva osalva vera henta irũre heshambateva jyroja Ñanderu Tumpa iñe'e katu iko po amu vasu jyroja rupi Noe mbyevaje tata iyretape haima jyrojarupi iko shi pente heko kaviva. ⁸ Abraham jyrojaivi iñe'erendu Ñanderu Tumpape hei ravekua shupe oho vera pente tetape me'eha poshu haima Abraham ohe kuambiateva imera vahepo. ⁹ Abraham jyrojai iko tetã yngavare haima tetã Ñanderu Tumpa opromentevekuashu hai iko pente yvy hyveshope ha'ea tevi ñaampora haima ho hymba pirekueivi iko Isaac haima Jacobo handi kovape me'eha jyve ko promesa. ¹⁰ Abraham jyrojaivi harõ rahaha tentavasupe Ñanderu Tumpape ñui mbyhaikavi haima mupu'a ipy henda mbareva iare. ¹¹ Jyrojaitera Sara memby mbaiva haima kuakuaitema teva imvera baretejy memby verã haima Abraham jyrojarã Ñanderu Tumpape japo hai opromentevekua shu. ¹² Hameranga Abraham kuakuaitemarã ta'y vera haima ñymoñare heta hokava jasytata raimi iva arare haima yvy kui yvasu hymbey raimi katu mba opa hekyhava. ¹³ Kova opamano hipity mbateva opaite mbai Ñanderu opromesa veua opai jyroja rupi heshavekua mbyryivive haima mba'e jyroja ipope ñimimishy haima iko mbuhupa haima teta yngare ko yvype. ¹⁴ Haima heiva kyrãva ñe'e ambishaka ai heka terireta hentaiterã. ¹⁵ Mandua irã hentakue oherã haima rekova teverã tiempo oujyverã. ¹⁶ A'hẽ katu haire pota pente tetã mashyava vate'iva haima Ñanderu marã'ã ikovera tuite raimi hai ñui mby hendama hama hentavasurã. ¹⁷ Abraham jyrojaivi kuave Isaacpe ta'y haima heno orecebimavekua promesa rupi Ñanderu harõmava jyrojakue. ¹⁸ Haima hai promete Abraham rekombapo hetapo ñymoña Isaac rupi. ¹⁹ Abraham rangama pareko Ñanderu katu myngueva jy Isaac manoma teverã me'ha jyshupe Isaacpe pyta ñandeverã ñe'e mbivajeavera. ²⁰ Isaac jyrojaivi ohovasa Jacobo haima Esaupe ijetava haima mbai pevarãnga. ²¹ Jacobo jyrojakueivi opaserimate manova ijeta kavi he Jose tay mokue õvã, hare omombai vasu Ñanderupe; ijyjoko yvyra puku'i ovare. ²² Jose jyrojaiterã manoserima'irã manduahe Israelpe'õrẽ õhẽ verã, Egiptoivi hare hei japoaverã kavẽkueivi ²³ kyraĩ jyve Moises oarã (onace) tu hare ishy jyrojaivi. Ñomi shu mbahapy jasype, heshahe sanjay kapyryitevarã, hameara kyjeã jyve mbijiche verã Tenta juhuvisha japovekua, ñehẽnduã shureta. ²⁴ Moises jyrojaiterã, syryoho'ira ikosevẽama faraón tajy menby kuimbai ²⁵ Pyhyrõ jy hasa asyverã Ñanderu henta'irũ handi, iko kavi véte handi verã heta ara vy'ape porambava ipope. ²⁶ Moises heshakua Hesukristore ohasa asy haikavivete shu verã, Egipto mbai hepyivi hai kuaa kavi Ñanderu mbyhekoviajy poshu. ²⁷ Moises jyrojaiterã hesha Egipto, hare hyjeãshi hetã huvisha poshy hendyivi; hai ijijoko jyve Ñanderure heshaha kashuvekua. ²⁸ Moises jyrojaiterã oñepyrũ mba'arete pe pascua hare kytykahe avisha havykue Israel henta hõnchere juri, Mãhe vate'õ jokueavare poko hekui, juka ñynoi Egiptope'ore tayretarã, tynondevekuare (Exodo 12.7). ²⁹ Moises jyrojaiterã hasa y vasu mbyteipi yvy tinivã rãimĩ Egiptope õre potate hasajyreva opa kanỹpy'reta y. ³⁰ Jyrojaiterã Jeriko mangorapya opa oa, Israelpe'õre opa jere reta jurirã 7 ara he'iashuvekua raĩmi. ³¹ Rahab hai pente taype heko vaiva, jyroja herã manoa ñẽhendumba handiva, myvahẽ havi hentape mokue Israelpe'õre jakueavare, ñamivapeĩ Jeriko hẽta re. ³² Hare mbaivara haivepojy koĩpĩma ẽshe ara, aijeta heverã Gedeonre, Barac re, Sanson re, Jefte re, David re, Samuel re hare yngavare tumpa iñembeu'iare rehe (Profeta). ³³ Jyroja rupi Israelpe'õre mbysypereta yngava Tentape'õre, pirimbivache hekope hipity Ñanderu mẽshuverãre, opa mboty shireta java juru. ³⁴ Mbove tata imbareteva, kañi kyse pukuivi ojemaĩ opa hangy ñymypyrãta jyvyĩ, katu ñyrãrõverã japovape hare ñaikañi verã heshatambareaertape. ³⁵ Ime'ẽ taypere vya jyvekua me'ẽãjyshureta hoo retarã (hogakuera) manovekua. Ime'ẽjy porãmbava hasavekua jukaha peve poiãshi jyrojakuerã, harõ hipity verã tykove py'ahu haikaviva. ³⁶ Yngavare ñymbyhoryahe hare ñupãhã vai tukumbype hare ñaipitihãrã opa minjeha carcelpe. ³⁷ Yngavare jukaha itape, jasyjahashi hete mbyteipi, Jukaha kyse puku vape, yngavare ñimimonde kavara pirere, iko vata'i kyvỹty hare hokaty. Ohasa asy reta hareka ajejopy vai, hare mbyhasa asy jyshureta. ³⁸ Haire iko ñemipe vatamba'oĩpi (Desierto) yvytu rusuipi cerro yvykuape hare itañyvỹvamarẽỹvape. Kova yvy (Mundo) tentare potãá haire ikoverã mbytepe. ³⁹ Hare opaite kova mbyvyajy, Ñanderu jyroja rupi, hipityã teri me'ẽverã. ⁴⁰ Ñanderu ñonokavima ñande pevarã pente mbai haikaviva Hai potavavi haire hipity handi jyve kova mbai haikaviva.