\c 10
1
Moises japovekuara ova ko mbai kaviva ẽteriva vate arapy, terã mba'etyre ñyvyipe vate arapy'õ vãimiva heko, havã Moises japovekua katũa ñoipo opa pyrymbyheko havi opaite iko'ipyare, harã veruha ñoijypary mymba jukaha verã pẽnte añomajyrã.
2
Kyrana katuvẽambatepo meejy mymba jukaverã kyavẽama pyta retarã, haereka katuvẽambatepo ojepy'apy jyhereta mbai porãmba japovekua rehe.
3
Ikoimbajyre pẽnte oũovape mãnduaheverã mbai porãmba japojyre vekuare.
4
Toro ti avisha ti kavara kuimbai huvy katũa ñoi heky kuimbai haereka taupe heko vaikuere.
5
Hara Kristo oumã ko yvy'iãreva Ñanderu Tumpa heimbashu: Nde ripotã mbai mymba me'ẽara jukahava koñei nĩñono kavishe pente tyrete.
6
Mymba me'ẽava hapyhava hareka me'ẽãva mbai porãmba ryheva rymby'ããpo Ñanderu.
7
Haipemã hai: "Kope aima, Ñanderu Tumpa ajapoverã nde nipotava, he'iha shyreheva rãimi kuatia iñepe.
8
Tynondeite vãnga hei Ñanderu Tumpa potãa haereka mbyhoryã mymba jukahava ti mymba hapyhava ti mbijichehava mbai porãmbavekua rehe kuatia mbyparahava haiva rãimi japoha verã rãimi vokava mbai,
9
Haivi katy hei: "Kope aima, Ñanderu Tumpa ajpo verã nde ripotava", vokava rãnga he'ise hai hekyjya mymba mẽ'eha'o tynondeva ñonoverãjy hendakuepe ĩru mymba mẽ'ẽhava ryheva.
10
Harã Ñanderu Tumpa potava rupĩi haitei ñany mbypya katujy, Hesukristo mẽvekua rupĩi hai manorã vekua pentejy opavere.
11
Opaite pa'i haereka Israelitare opa ara mba'apo reta tupaope mẽẽ'ẽavare japova, mba'erãmba hekytyheviva mbai porãmbava.
12
Hesukristo mẽvekua pentejy mbai porãmbaekua rehe. Pentẽi mẽe hai opaveãma, hara haivi vapyjy Ñanderu Tumpa jakatakyty.
13
Haivi hãroima'ẽ yvaishare ñonoha peveshu ipy'ipe.
14
Shara pẽnte mbai mẽeva rupĩimba opaite mbyhai kavi ñoivera hai mbypy katushuvekua.
15
Harã Espiritu Santo kuaaka jyve ñande opaite kynã ikova, shara jypyivi hei:
16
Shi ñee ajapo handi verãre vokava arajyrã, kyrãpokui, hei Ñandeja: Añonoposhureta haire pyape she ajapovekua harã kuatia iñerãimipo haire ñakape;
17
Harã hykuay heijy: Mbairãmba shymandua jyhevera mbai porãmba japovekuare, ti ñymbai porã'ãkuere.
18
Harã, vokava rupĩi, mbai poramba hejaha reimãra, tekotẽveveama mẽ'ẽhavajy mbai porambarehe.
Ã'ẽ katuma ñavahe Ñanderu Tumpa ẽvape.
19
Vokava rehe shyryvyre, ã'ẽ katuma jaiche jyrojakue ryheve pya katuiteveva õivape Hesukrito huguy ruĩi.
20
Jahava rupi pee py´ahuvaipi haereka hykoveva shara hete rupĩi pea ñande myndoro ravekua sabana savava' o mbyteipi rãimi.
21
Harã kyrã Hesukrito pyta ñandy pai vasurã Ñanderu Tumpa hẽnta vasupe.
22
Hãrã ñaimbojahe Ñanderu Tumpa ẽvãpe pya kavi haereka jyrojakue pyrãta ryhevepe, hai opa ñandijohe verã ñane'ãkue jy kyambavapy ñandijohea.
23
Jaikopo pyrãtape hareka jairojakuepe ñamymba vape, Ñanderu hei vekuavivee opapo japo.
24
Hãrã ñañehããpo ñañymykyrẽỹ hareka jaijyhaihu verã, jajapove jaraha mbai haikaviva.
25
Mãhẽkui japoishi ñande iglesiaivi, opaite ẽẽva rãĩmi japova, ñaymykyrẽỹ jyve, pyheshama ara Hesukrito aoujy verãpe kõõma ourã.
Ynteñoma mbai porãmbape piko
26
Ñande potai mbai porãmba jajapo javatateri pe ãñetevarerã, kyrãrã mba'etyma yngava me'ẽava (sacrificio) mbai porãmba vekua opa heky ñandyhevi verã,
27
haire kyje ryhevepo hãrõ ñimbivacheva ohũndishu verãre tata hendyõpe.
28
Imẽ'ẽ Moises mbypara vekua mbijicheva hareka ñẽẽ hẽndumbava jukahapo parekoambape, ñyhẽndu mõkue mãĩrã mbahapy heshavare.
29
Katupo pohyiteve voka ñunũpa Ñanderu Tumpa rehe pyrũva haereka mbaimbaa rãĩmire Hesukrito huvy haereka pẽnte ñẽẽ py'ahuva huvype, johema Espiritu jyparekokue py, opa mypotishu vekuapy.
30
Jaikuaa rãnga Ñanderu heivape: She apirimbivachepo, haereka ambyhepypo. Hãrã heivejy: Ñanderu ijeta parããpo jyheve hai ryhevare.
31
Kyjeitevepo akua Ñanderu Tumpa hykove'ia ipope oava.
32
Pynymãnduapohe opaite ara ty{onde vekuare, Hesukrito re peñepyrõ pirojaherã marãra pee pijepy kavihe pyhasa porãmba ñyhãrõ kuaava ryheve.
33
Pija'opei, pyhasa asy yngavare hyñonde hareka pimi'ĩru jyveshu hasa asyvava retape.
34
Pee pyparekoshu opaite mbyperesohavare, hareka vy'ape pyma'ẽi jypea pa'ampova, pikuakavi imẽpyre peĩĩ pa'ampova haikavivera haereka opa ara vetepy pyta verãpe.
35
Avy piñymykangy pirojakuepe, vokava rupiipo me'ẽhape mbai me'ẽha verã.
36
Pikotẽvẽhe ñyhãrõkuaa, pijapo verã Ñanderu Tumpa potava hareka pipity verã Hai mbeupe vekua.
37
Ñanderu Tumpa ĩñẽẽpe hei: Areãpo oukui ou'ẽ verã, kỹỹvããmapo'ẽ.
38
Akua heko kyambaa sha'ampova, iko pukupo jyroja rupii; hai ohojy haykuerã shykove mbyvy'ããpo.
39
Teva ñande jahããposhi yngaity kova pe potãã ñañehũndirã, jaha jepe verã, haereka japity verã tykove opambava.