¹ Pota hai peva rãnga kova: Opaite maĩnunga ijarã ndei teri irã, hẽntape jokuearea raĩmi jyve opaite maĩnunga ijarã ẽjyve hoo ipe. ² Ndei terirã hetare maĩnunga rã imere jy ñyngareko heshuva ña ãpova reta, tuu heishua ara peve. ³ Kyrã iko jyve ñandy rehe. Ñande sanjay teri jaikorã, jokuearea raĩmi jaiko jyve kuaretare ipope potava raĩmi. ⁴ Vãhẽma voka ara ñonoha vaperã, Ñanderu Tumpa mbou mbashu Tay, oa vekua taupeivi haereka ou iko Moise mbypara vekua heiva raĩmi ipope. ⁵ Kyrã ou hai ñandy heky verã Moise mbypara vekuaivi, Ñanderu Tumpa ñany meẽ vya tayray ñandyrehe verã. ⁶ Hãrã tay rupiima peerã, Ñanderu Tumpa ñonomba Tay Espiritu ñandy pyape, haima voka Espiritu sapukerã hei: "Abba” he'iseva “Sheru!" ⁷ Ñande haima Ñanderu Tumpa tay haere hai veama jokuearea. Ñande hai Ñanderu Tumpa tayrã rehe, Tumpa meãpo voka maĩ nunga haikaviva Kristo rupii. ⁸ Arykai, ndei teri pikuaa Ñanderu Tumpa perã, pee hai jokuearea ỹnga tumpa rã ãnga haykue. ⁹ Ã'ẽ pikuamashu Ñanderu Tumpa, ti haikavivera jairã, Ñanderu Tumpa pyndy kuama perã. Hãrã, marã ĩrãra pee peijypo paykue piko jy verã arykai pee piko vekua raĩmi, hai heko kangy, pyratãmba jokuea re verã? ¹⁰ Pee kuareta reta rãnga pymby arete teri arete arareta, jasyreta haereka año reta. ¹¹ She akyje ĩmerã amba'apo reira pyny mbytepe ¹² Shy ryvy reta; airure pee she raĩmi, aryka'e she aikovekua jyve pee raĩmi. Pee rãnga maĩnunga porãmba pijapoã shy rehe. ¹³ Pikuamava raĩmi, she tynonde ambeu pee rãvekua ñeẽ kaviva, haivi she shymbai rasy. ¹⁴ Hãme shymbairasykue ĩme'areva pyndypyarãã verã raĩmi, hãrã ha'eã vokava mbairasy rehe shyreshatã haere shymymorã pii vekua. Tẽvã kỹrã te verã, pee shy mỹvãhẽ jyve pyny rẽntape Tumpa jokuevape raĩmi, pyrahashuva raĩmi Hesukristo. ¹⁵ Pyndy saremara he pee voka vya pyreko vekuaivi? She aikuaa, katu potarã, pee pynohẽ te verã pyndyresa teivaivi pymeẽ she verã. ¹⁶ Hãrãra ã'ẽ, she pyndyvaisho rãma aĩ, ambeu pee voka añetevarã? ¹⁷ Ĩme rãnga ẽ pyndy raihuva, tẽvã ha eã haikavi verã pota pyndy reky yryhevi, haivi pota haykue pehorã. ¹⁸ Haikavi rãnga ñaĩkatẽỹ he mbai haikavi verãre opa arape, ha eã shee aĩme penendie rãmeĩ. ¹⁹ Shy ray reta, shy rasyite jy pyndyrehe, tesy memby ẽ verã hasyshua raĩmi, Kristo ijapo pyndy pyy peve. ²⁰ Mãrã ngamba tẽpo aĩme aĩ penendie ã'ẽ peve, aĩnjeta he pe verã yngaiva henda vape; aikuãã mbaivara ajapopo pyndy hevi! ²¹ Pee pota pẽĩva Moise mbypara vekua heiva raĩmi, pere she kova: Pyhenduã ngamba voka mbyparava hei vekua? ²² Ñanderu Tumpa jykuatia ĩñẽẽpe rãnga hei Abraham imereva mokue tay, pẽnte Agar voka taupe jokuearea memby, haereka ĩrũ katy hỹrekoite Sara memby, voka taupe ha eã hai jokuearea. ²³ Ko jokuearea memby hai oa vekua taupere sanjay oava raĩmi; voka taupe haimba jokuearea memby katy oa hai Ñanderu Tumpa ĩñẽẽ mẽvã raĩmi Abrahampe. ²⁴ Kova hai ñymyhã ãngarã. Voka monkue taupe rupii rãnga he'ise monkue ñeẽ Ñanderu Tumpa meẽ vekua. Taupe Agar rupii ñande jaikuapo voka ñeẽ mẽ eã vekua, ita vate ouva Sinai ryheva. Hai memby retaivi oa jokuearea ñoĩ verã. ²⁵ Voka Agar hai ita vate ouva Sinai raĩmiva, ẽvã Arabiape, ã'ẽ ova tẽnta Jerusalenpe õre, ĩmẽĩ ñynoĩ jokuearea raĩmi membyre hãndi. ²⁶ Voka tẽnta Jerusalen vate arapy õ hai kova taupe haimba jokuearea, vokava hai opaiteva ñande sy. ²⁷ Ñanderu Tumpa ĩñẽẽ mbypara vekua hei: Vy aĩ, nde taupe memby mba ia. Sapuke ryvy a kueivi nde rikuaa mbava jyve purua iva hasyrã! Voka taupe memby mba ia hetapo membyshi, taupe imerea ĩme retaivi. ²⁸ Shy ryvy reta, pee rãnga hai Isaac raĩmi, pee pe ava jyve Ñanderu Tumpa ĩñẽẽ meẽ vekua rupii hai tayrã reta. ²⁹ Haima voka arape Abraham ray oa vekua kuareta puruava raĩmi, voka oava ñono vaishu verã Abraham ray Ñanderu Tumpa heiva raĩmi oarã vekua. Hãrã kỹrã jyve ã'ẽ. ³⁰ Hãrã mbaivara hei Ñanderu Tumpa ĩñẽẽ mbyparavape? Kỹrã hei: “Mohẽshu taupe jokuearea memby ryheve, ko taupe jokuearea memby katũãpo ĩmẽre voka taupe haimba jokuearea memby tuu ña ãpo heta vekua rehe." ³¹ Hãrã kỹrã, shy ryvy reta; ñande ha eã ko taupe jokuearea memby raĩmi, voka taupe haimba jokuearea memby rãnga ñande.