¹ Galatas hasy mbai pikua verãva! Mbavara pyny mbytavy, ñee pyhendua mbashu ãẽteva heiva rãimi. Heshahaka kavi rãnga pee marãra Hesukristo mano kurusure. ² Aipotãi pymby hovaishe ko ãpyrãnduva: Vãhẽ rape Tumpa Espiritu Santo Moise mbypara vekua pijapopirã ti pyroja ko ñee kavivarãra? ³ Mbai ãiteira pikuaa, kỹrã peñepyrõ Espiritu peva ã'ẽ pota pymby opa mbai kuaretare hekope õvã? ⁴ Heta mbai haikavivara pota opa mbai mbava rãimi? Katuã rãnga mba'eã. ⁵ Ñanderu Tumpa meẽpe je Espiritu haereka mbaikavi hesha verã japorãra, marã ĩrã japo? Ha eã Moise mbypara vekua pijapo pirã, ñee kavi pyhendu vekua pyroja rãmeĩ rãnga. ⁶ Kỹrãi Abraham jyroja Ñanderu Tumpare, hãrã Ñanderu Tumpa kuaa vokavarã hei he Abraham heko kaviva jyroja rupii. ⁷ Hãrã pikuaapo ãẽteite Abraham tayreta hai jyrojavare. ⁸ Ñanderu Tumpa ĩñeẽpe hei vekua rãimi, Judio mbare mbytepe ẽ po jyve Tumpa rekoshua heko kaviva rãimi, jyroja rupii. Hãrã myvãhẽshu Abraham ko ñeẽ kaviva: “Opaite tẽntare ohovasapo nde rupii." ⁹ Haima Abraham rãimi jyroja vare ohovasa jyveshu. ¹⁰ Opaite jyroja ihea Moise mbypara vekua japoã verãrã, jaheapohe. Shara Ñanderu Tumpa ĩñeẽpe hei: “Jaheapohe opaite japo mbava hekope kavi, japoa verã heivã rãimi." ¹¹ Hãrã jaikuaa kavi mba'ety rekohashua heko kaviva rãimi Moise mbypara vekua rupii. Ñanderu Tumpa ĩñeẽ pe rãnga hei: “Heko kaviva ikopo jyroja rupii." ¹² Moise mbypara vekua rãnga hendã jyrojape, shara Ñanderu Tumpa ĩñeẽ pe rãnga hei: “Opaite japova hekope kavi Moise mbypara vekua, hai rupiipo iko verã." ¹³ Hesukristo rãnga ñany ñohẽma Moise mbypara vekua jyjaheivi, hãrã jaheatẽ ñandy rehe verã vẽkua oa ĩãrẽ, shara Ñanderu Tumpa ĩñeẽpe hei: “Jaheamahe manova yvyrare." ¹⁴ Vokava jehu, mbaikavi Tumpa meẽva Abrahampe hipity verã reta jyve hai mba Judio vare, Hesukristo rupii. Kỹrã jairoja rupii opaitea mẽ eã ñande verã Espiritu Tumpa hei vekua meẽ verã. ¹⁵ Shy ryvyre, ãpyry mymanduaka pohe kuei jehu ñandeva: Pente kuimbai ẽ hãndi ynga pẽnte ñeẽpe, ñonohe hee kuatiaperã, mbaveamapo mbaiva ñono jypy, japoa verãima ẽ. ¹⁶ Haima Ñanderu Tumpa meẽshu ĩñeẽ Abraham haereka tay. Ñanderu Tumpa ĩñeẽ he ĩã “ndy rayre”, pẽntereĩ rãnga injetarã hei “ndy ray”, vokava rãnga hai Kristo. ¹⁷ Kova hai she haiva: Ñanderu Tumpa meẽ mbashu Abraham ĩñeẽ, hãrã my añetẽ mba. Hãme rãnga Moise japova, ou vekua 430 añoma asarã, katuãpo my põrã voka ñeẽ ñỹmeẽva haereka hejapo mbai mbava rãimi Ñanderu Tumpa ĩñeẽ. ¹⁸ Ñanderu Tumpa hei vekua meẽ ñande verã ẽẽmba Moise mbypara vekua perã, haiveama mbapo ñeẽ ñymeẽva. Ijykuaa kavi rãnga Ñanderu Tumpa hei mbashu Abraham mbai meẽ reishu verã. ¹⁹ Haima, mbai verãra heikavi Moise mbypara vekua? Moise mbypara vekua rãnga meẽ hã kuaretare heko kavirã, tẽvã Moise mbypara vekua heshauka kuaretare japo porãmba reta, ou peve tyray mbe ua vekua ou verã. Kova japoa verã mbeu Tumpa jokuevare, Moise rupii. ²⁰ Hãrã ikotẽveãjy he pẽnte kuaaka verã mbouva, shara Ñanderu Tumpa pentẽĩ ẽ. ²¹ Hãma kovarã he'ise Moise mbypara vekua puãva Ñanderu Tumpa ĩñeẽ meẽ vekua? Mba'ety! Mẽ eã mba pẽnte japoa verã meẽva tyko verã, ãẽte Moise japoa veraĩvitẽ ou verã mba tykove haikaviva. ²² Tẽvã Ñanderu Tumpa ĩñeẽ pe heiva rãimi, opaiteva hai mbai porãmba pysyva, pota opaite jyroja hea Hesukristo hipity Ñanderu Tumpa ĩñeẽ meẽ vekuarã. ²³ Ko jyroja ndei teri ourã, Moise mbypara vekua ñaniñapiti i, ñahãrõ kova jyroja, kuaaka peve. ²⁴ Ou peve Kristo, Moise mbypara vekua ñandy reko ipope, japity peve tykove haikaviva jairoja rupii. ²⁵ Tẽvã ã'ẽ vãhẽma ko jyrojarã, ñaĩme veama Moise mbypara vekua ipope, ²⁶ shara pirojaivive he Hesukristo, iko pyhevi Ñanderu Tumpa tay. ²⁷ Piñy my pẽntema hãndi Kristo ñymynga rai rupiirã, pikoma piñymondeva rãimi Kristoivi. ²⁸ Mba'etyma Judiovara ti Grecia vara, jokuehareara ti ha eãra jokueharea, kuimbaira ti tauperã. Pirojama Hesukristo rerã, opava pee pẽntevaĩma. ²⁹ Hãrã pee hai Kristo ryhevarã, pee hai Abraham tayre, haereka pipity Ñanderu Tumpa ĩñeẽ meẽ vẽkua.