¹ Hasama 14 ãñorã ahajy Jerusalenpe Bernabe hãndi, araha jyve shendie Tito. ² Ahajy haipe shara Ñanderu Tumpa heshaka she ahajy verãrã. Haipe Jerusalenpe ñakãrã õre hỹnonde ambeu Ñẽẽ kavi, ambeu aiva Judio mbava retape, haereka ambeu kavishu reta ñemiape. Kỹrã ajapo, potãa she ajapova pytarei haereka opa reirã ³ Tito Grecia pe õvave, ẽvã shendie, jurureãshu chĩchĩnka verã hãkue pire, haimba tẽvã Judio. ⁴ Ĩmẽ ãmo ẽ ñandy ryvy rã ãngavare ñemiape icheva ñany mbytepe, maĩ ñemi ẽhe verã jarekova tykove py'ahuva Kristo rupii, pota ikojy ñandy hevi Moise mbypara vekua japo iarã. ⁵ Tẽvã hejahãshu yryraha reta, shara pota ñoi ñee kavi ãẽteva ĩmẽ'ẽ pyndy pyy. ⁶ Tẽvã mẽ eã she mbai py'ahuva ambeu verã, opaiteva tupao miñakã iare, she pevarã mba'eã marãvã retaramba hai, shara Ñanderu Tumpa tyrete reiã maĩ hai. ⁷ Kỹrã, haire hesha Tumpa meẽ sheva ko ajapo verã ambeu verã ñee py'ahuva Judio mbavare pãũpi. Pedrope hejahashuva rãimi jyve mbeu verã Judiore pãũpi. ⁸ Tumpa teiva rãnga mondo Pedro apostolrã Judiore pãũpi, she jyve apostol shy mondova rãimi Judio mbavare pãũpe. ⁹ Santiago, Pedro haereka Juan, rekoavare Tumpa jy tupao juhuvisha, kuaa reta Tumpa meẽ sheva ko ajapo verã, haereka heshaka reta yry rekova ñi'ĩrũ rãimi, meẽ ore ipo shee haereka Bernabe, hãndi hesha kavi reta ore ohoa mba'apoha verã Judio mbavare pãũpe. ¹⁰ Koñeĩ pẽnte mbai jurure ore mandu a he verã pavete'ia reta, hãrã she aĩngareko kaviape ajapo. ¹¹ Tẽvã Pedro oho tẽnta Antioquia perã, hovape tei aĩngãtashu shara hai porãmbava japo. ¹² Tynondeite rãnga karu i hãndi Judio mbavare, vãhẽ oho peve Jacobo mondovare. Haipe õñepyro syry shi retarã, karuveã hãndi, shara kyjeshi Judio retaivi. ¹³ Hãrã ĩrũ Judio reta jyrojava Hesure, õñepyrõ hova mõkue jyre, Pedro japova rãimi japo, kyraĩ jyve Bernabe haivi oho hãndi reta. ¹⁴ Hãme aheshama haire ikoã ñee kavi ãẽteva heiva rãimirã, opavare hynonde aĩngãtashu Pedro: “Nde Judiova, rikori Judio reta mba ndeva rãimi, marã ĩrãra akuarã pota, rimĩñerãshu Judio retamba, iko verã Judio rãimi?" ¹⁵ Ñande rãnga hai Judio reta jaa rãvaĩ, ha eã mbai porãmba japo ia haere Judio mba reta raĩmi. ¹⁶ Ñande jaikuaa, Ñanderu Tumpa meẽa poshu kuaretare heko kaviva rãimi jyrojava Hesukristo, Ñanderu Tumpa me'ẽa ãposhu kuareta reta heko kaviva, ajemaĩ tempo japo kavi Moise mbypara vekua heiva raĩmi. Hãme rãnga ñande jaroja jyve Hesukristo, Tumpa ñandy reko verã heko kaviva rãimi jairojahe rupii Hesukristo, ha'ẽã jajapo jai Moise mbypara vekua heiva rãimirã. Ñanderu Tumpa jykuatia ĩñẽẽpe rãnga hei, mba'ety hejaha rei verã heko kaviva rãimi, japo i Moise mbypara vekua heiva raĩmi. ¹⁷ Hãrã ã'ẽ, ñañehãã ñandy reko kavi verã Hesukristo rupii, jaheshajy ñandy rehe mbai porãmba japo ia. Vokavarã he'ise, Hesukristo ñany mbory heva mbai porãmba jajapo jai verã? Mba'ety! ¹⁸ Hãrã she ambai pẽnte Moise mbyparava, haere ãmupuã jyrã, she haima mbai porãmba japo ia. ¹⁹ Moise mbypara vekua pevarã rãnga she ãmanomava raĩmi, haima voka Moise mbypara vekũaĩshuka. Ã'ẽ Ñanderu Tumpa pevaraĩ aiko verã. ²⁰ Voka kurusure she amano vekua Kristo hãndi, hãrã ã'ẽ she aikoveã shi jupii verã, Kristoima iko'i shypyy. Hãma ã'ẽ shy rykovepe, aikovee airoja rupii Ñanderu Tumpa tayre, shy raihuva haereka shy rehe mano vekua. ²¹ She katuã ambijiche Ñanderu Tumpa jyhaihukue, Ñanderu Tumpa ñandy reko kavi haereka ĩñẽẽ ñahendu Moise mbypara vekua rupiirã, Kristo mano rei tẽvẽrã.