¹ Ã'ẽ, shy ryvyre jurureha haereka he iha pee kova Ñanderu Hesu heepe; pupuãve pekua opa ara teko haikavivape pyny mbo eava raĩmi, pymbyvya verã Ñanderu Tumpa, pijapoma pẽĩvã raĩmi. ² Pee rãnga pikuama pijapo verã, mẽ eã pee vekua Ñanderu Hesu ñy mbaikatu rupii. ³ Ñanderu Tumpa potava rãnga hai tykove haikaviva, avy mbava typory ñeẽ porãmbava haereka avy tiko hãndi taupe õmenda mbape, ⁴ pepentẽĩ ĩmẽ tyre ha eire hỹreko heko kaviape haereka mãrã mbape. ⁵ Avy piko mbai potape haereka mbai porãmbape, Ñanderu Tumpa kuaamba raĩmi. ⁶ Avy mbava kova mbaire tymyngya haereka tymbytavy hapisha, Ñanderu Tumpa rãnga purũnũpa kova mbaire, he iama peeva raĩmi. ⁷ Ñanderu Tumpa ñany rẽnoã ñandy rykove ñamyngya jai verã, ñandy reko kavi veraĩ rãnga. ⁸ Hãrã mbijicheva ko pyrymbo eahea, mbava kuimba'e peã mbijiche, Ñanderu Tumpa teiva rãnga, meẽ pevekua je Espiritu Santo. ⁹ Jyhaihu ryheva ny ambyparã pee kuatiare, shara Ñanderu Tumpa teiva pynymboi he mãrãrapo pepẽntẽĩ pijyhaihu. ¹⁰ Kyrã rãnga pijapo he opaite pyndy ryvyre ẽvã tẽnta Macedoniape. Tẽvã jurureha jy pe shy ryvyre pijyhaihukue tupuãve toho opa ara. ¹¹ Peñehã piko kavi haereka pijapo peii pijapo verã, pymba'apo pepo rupii, jururea peeva raĩmi. ¹² Kyrãrãpo mbai vasuva raĩmi pindi japo hai mba ñandy ryhevare, haereka ĩmẽ ñoĩpo pyre maĩ nũnga. ¹³ Shy reyvyre, potã rãnga pypyta pikua mbape mbaivara ikoshi mãno vare, mãhe pyvy ã jyve yngavare raĩmi, mbaimba hãrõ õ. ¹⁴ Kyrã jarojava raĩmi Hesu mãno haereka kuerajya mãno vare pãũvi, kyraĩ jarojajy Ñanderu Tumpa mby hykove jy verã Hesu hãndi; jyroja ryheve mãno vekuare. ¹⁵ Hãrã he ia pee, Ñanderu Tumpa pyrỹmboiva raĩmi, ñande ñandy rykove teri jaiva Ñanderu oujy peve, ñañymỹ tynondeãpo shi mãno vekuare. ¹⁶ Shara hỹnatupo iñyhẽndu pẽnte ñeẽ, Tumpa jokueva ĩñeẽ haereka ñimĩmby ipukue, hãrã vate araivi Ñanderu Tumpa teivapo vejy. Hãmã Kristore jyrojava mãno vekuare, hai reta rãnipo kuerajy; ¹⁷ haivi, ñande ñandy rykove teri jaiva, ñandy rahapo hãndi ãvãpyntupy, jajyhesha hãndi verã Ñanderu Tumpa vate arapy, kyrãpo ñaĩme hãndi Ñanderu Tumpa opa ara pevarã. ¹⁸ Hãrã kova ñeẽ rupii piñymỹ kỹrẽy.