1 Hãrã katuveama jepyha herã, ore pytahaima ỹrẽĩ Antenaspe, 2 hãrã mondoha ñandy ryvy Timoteo pee pẽĩvape. Hai rãnga Tumpa jokueva ỹrỹmbory ia ko Kristo ĩñeẽ kavi mbe uha ĩrã vekua. Mondoha pee pẽĩvape pynymy pyrãtã haereka pyny mykỹrẽy verã pirojakuepe. 3 Avy peeva reta pyny kãngy kova mbai jyhasha asy rehe. Pee rãnga pikua kavi, ñandy jahasa asy ñõĩ verã. 4 Hãmã ikoha teri penendierã, he iha jyve pee ñande jahasa asy ñõĩ verã, hãrã kỹrã jehu pee pikuamava raĩmi. 5 Hãrã she, katuveama ãhãrõrã amondoshu Timoteo aikuaa verã mãrãra piko jyve Ñanderu hỹnonde, she aipotãã Ãñã pindirity jy mbai porãmbape haereka oparei verã ore japoha vekua. 6 Hãmã ã'ẽ Timoteo oujyma tẽnta Tesalonicaivirã, hei ore pyny mandua kavi yryrehe pirojakuepe haereka jyhaihu rehe. Hei jyve ore pyny mandua ñõĩ yryreheva jyhaihupe haereka pota ñõĩ yryresha piva, ore pota pyndy reshahava raĩmi jyve. 7 Hãrã shy ryvy reta, kova mbai jyhasa asy haereka jepy apy pãũpe ore yrypya putuu kavi pyndy rehe, kuaaha tãntã piroja Ñanderu Tumpare. 8 Haĩ yrykove py ahu jyva raĩmi, kuaaha piroja kavihe Ñanderu Tumpa hãndirã. 9 Marãrapo katu opa mẽ ẽhã yryvya Ñanderu Tumpape, pyndy rehe haereka heta vya pymeẽ ore vekua Ñanderu Tumpa hỹnonde? 10 Arape haereka pỹnturã jururehashu Ñanderu Tumpa pyndy reshahajy verã, haere opa ñõnoha kavi verã ndei teri ẽvã pyndy jyrojape Tumpa ĩñẽẽ. 11 Ore jurureha Ñanderu Tumpa hỹnonde Ñanderu, haereka Ñanderu Hesu, ore ỹrỹmbory ohoa pyndy reshaha jy verã. 12 Hãrã Ñanderu Tumpa tijapo hetave pyndy hevi jyhaihu pindi jupii verã, haereka opaite kuaretare hãndi; ore pyndy raihuha Ñanderu Tumpa pyryhaihuva raĩmi. 13 Pyny pyrãntã katu pyndy pyape haereka piñymby haikavi hekope kavi Ñanderu Tumpa hỹnonde, oujymarã Ñanderu Hesukristo opaite jyroja heva reta hãndi.