¹ Pee rãnga, shy ryvy reta, pikua kavi ohoa reĩã pee pẽĩvape. ² Hãma tẽnta Filipope heta poshyha ore haereka yry rekoha asy tẽvã, pikuava raĩmi Ñanderu Tumpa ỹrỹmbory jyve mbe uha pee verã ĩñẽẽ, jyroja kuepe heta mbai pohyva pãũpe. ³ Hãrã voka ore mbe ua vekua ha eã mbai porãmba ryheva haereka pyrỹmby tavyha i verã. ⁴ Ñanderu Tumpa jyroja jyve yryreherã, meẽ oreva raĩmi voka ñeẽ kavi mbe ua verã, hãrã kỹrã ĩnjetaha. Hãrã ha eã myvy aha verã kuareta reta, koñeĩ Ñanderu Tumpape, opa kuaava ñandy pya. ⁵ Pẽẽ pikuava raĩmi, mãpemba poryhava ñeẽ mỹpopõrã vape ti pynỹ mbytavyha mba ikohava kyrypoti potaha irã, Ñanderu Tumpa katy opa kuaa hai japoa vekua. ⁶ Mãpemba hekaha ia pyndy hevi ñemombai vasu ti yngava retaivi, tẽvã katu tẽpo pymby kuaaha pee ore hai Kristo jy Apostol. ⁷ Kỹrã tẽvẽrã, heshahaka pee ore jyhaihupe, ko tesy memby ñyngareko kavi haereka mbykuakuava raĩmi. ⁸ Tivishaete ore rekoha jyhaihu pyndy reherã rãnga meẽhã jyve pee, ha eã Ñanderu Tumpa ĩñẽẽ kaviva ñõĩteva, yry rykove katy jyve pyndy haihu hai terã rehe. ⁹ Shy ryvy reta, pee rãnga pymãndua mãrãra mba'apoha haereka yry kangy seve. Mba apoha ia ara kõĩvape haereka pỹnturã, potãã mbai pohyva pee pevarã yry rykovepe, mbe uha ẽ perã Ñanderu Tumpa ĩñẽẽ. ¹⁰ Pee pikua kavi haereka Ñanderu Tumpa jyve, ore ikoha tykove kyamba ryheve haere hekope kavi, pee pirojava Hesure mbytepe ĩnjeta kavi yryrehe verã raĩmi. ¹¹ Pikua jyve apyrỹ mykỹrẽy haereka apurũmbu putuurã opaite peeva pepentẽĩ, mbai haikaviva japova raĩmi teru tay retare. ¹² Ore jurureha jyve pee piko verã hekope kavi Ñanderu Tumpa heiva raĩmi, Ñanderu Tumpa pyny rẽno vate arapy õ haereka hai ẽvãpe. ¹³ Hãrã vokava rehe mẽ eã ñoĩshu yry vy akue Ñanderu Tumpa, pee pyhẽndurã vẽkua Ñanderu Tumpa ĩñeẽ mbe uha i perã haereka pyrojarã vekua, haimba tapyy ĩñẽẽ raĩmi. Hãrã ãñete Ñanderu Tumpa ĩñẽẽ pynỹ mby heko kaviva pee pirojava. ¹⁴ Shy ryvy reta, pynỹ rẽta ĩrũ reta rãnga pynỹmõña i voka Judiore moñava raĩmi jyve Ñanderu Tumpa tupao reta Kristo Hesu ryheva Judeape õre. ¹⁵ voka Judiore rãnga juka Ñanderu Hesukristope, haereka Tumpa ĩñẽẽ mbeu’iare arykaiva, hãrã opa ỹrỹ mõhẽ vekuare. Japoã Ñanderu Tumpa potava, haereka oñemõi he kuareta retare, ¹⁶ haereka irijocha potã ĩnjetaha opaite Judio mba retape, haire potate oho jepe verã jy verã. Hãrã kỹrã mby heta mbai porãmba vekua; hai rehe Ñanderu Tumpa poshy pohyite veva ẽma ĩãrẽ reta. ¹⁷ Shy ryvy reta, õĩhã penendie sapyaiterã, opa ara ñoĩte shy pyape apyryrekova jaijesha mba tẽvã; hãrã ỹrỹkỹrẽ ỹinte ohoha pyndy reshaha verã. ¹⁸ Potate ohoava pee pẽĩvape, she Pablo, hetajy potate ahava, tẽvã Ãña irijocharã katũã ohoha pẽĩvape. ¹⁹ Mbaivara voka ore hãrõhã kuaa verã, ỹrỹmbyhory ti mbai mẽ eã oreva rehẽira ỹrỹmby vya?, pee ñõĩ rãnga hai Ñanderu Hesukristo hỹnonderã hai oujymarã verã arape. ²⁰ Pee rãnga hai voka ore ỹrỹmy pyrãtãva haereka ỹrỹmby vyava.