¹ Mbaipera vãhẽpo ara haereka mbai peitera shy ryvyre, katuany mby paraha pee kuatiape. ² Pee rãnga pikua kavi Ñanderu Tumpa oujy verã ara, vãhẽpo hãrõã veama ẽrã, manãrõ ia ouva raĩmi pyntumarã. ³ Kuaretare heima jyrerã: “Haikavi rãnga ñaĩ haereka mba'ety ñany mby vyamba õ”, haivi sapy aĩpo vãhẽ ĩãrẽ reta ñehũndi vasu, taupe purua ia vãhẽshua raĩmi mbai hasykue, hãrã mba'ety pokui ñemi shi verã. ⁴ Tẽvã pee shy ryvyre pimeã pẽĩ pyntuape, pyndy sapya verã Ñanderu Tumpa jy ara, ouva manãrõ ia raĩmi. ⁵ Opaiteva rãnga pee mbai sapeka haereka ara kõĩva peva. Ha eã ñande pỹntu haereka timimbia pe õ; ⁶ hãrã avy jache ỹngavare raĩmi, jasareko haereka jaiko hekope kavi. ⁷ Opaiteva ocheva reta rãnga, oche pyharekue, hama kau ia retãny pyharekuẽĩ kau. ⁸ Ñande, ara kõĩvape jaiva ny opa arapo jaiko kavi. Jai jocha popy jyroja haereka jyhaihukuepy, syndaro ijochapya raĩmi pitiaipi, ñymyhẽva õ ñyrãrõ verã, syndaro ñãka jochapya raĩmi ñañõno ñandi jehe ñyhãrõ haereka oho jepea ryheva. ⁹ Ñanderu Tumpa rãnga ñanyrẽnoã mba ity ñaneãrẽ verã ñunũpa vasu ou verã, jaha jepe veraĩ rãnga Ñanderu Hesukristo rupii. ¹⁰ Hesukristo rãnga mano ñandy rehe, ñandy rykovepe ti ñamano marã, jaiko hãndi verã. ¹¹ Hãrã piñymykyreỹ haereka piñymy hãta ngatu pijupi, kuei pijaposea raĩmi. ¹² 12 Shy ryvyre jururea pee, pyreko verã mbai vasuva raĩmi pyny mbytepe mba'apo ia, pyndy raha ia Ñanderu Tumpa kyty haereka pyny mbarakua ia. ¹³ Pymby vete haereka pyhaihu poshu heta mbaikavi japova rehe. Pyndy pya kavi ijupe. ¹⁴ Jurureha pee shy ryvyre, piñimĩñẽẽshu verã hekope kavi ñatẽỹ mba'apo vare, pymy kỹrẽyjy ñatẽỹma heare, pymbory jyrojape kangy vare haereka opavare pyhãrõ kuaashu. ¹⁵ Avy pymby hekovia porãmba, porãmba pẽĩjy; haikavivaĩ pijapo ijehe haereka opava retare. ¹⁶ Pyvya ñoĩpo. ¹⁷ Opa ara pirure. ¹⁸ Pymeẽshu Ñanderu Tumpa pyndy rorykue opa mba'ere, vokava rãnga hai pota pyndy hevi, pee pyrojava Hesukristo. ¹⁹ Avy pymbove Espiritu Santo hata. ²⁰ Avy pijahe he iko verã mbeu'ia. ²¹ Opa rãni pikua kavi, hãrã pymy mbyta pijehe haikavi vare. ²² Pijyheky shi opaite mbai porãmba vekua. ²³ Ñanderu Tumpa teiva meẽ ñandeva pya symyi, pyny mby heko kavi haereka tiñono kavi pyndy rykove, espiritu, pyndy kove haereka pyndy rete, kya mbape ẽ verã, Ñanderu Hesukristo oujyrã verã. ²⁴ Ko pyny rẽnova rãnga hai jyrojaha hea, hãrã kova mbai hekope kavipo opa japo. ²⁵ Shy ryvyre, pirureve yry rehe. ²⁶ Pymarãndu opaite ñandy ryvyre, ñyhẽtu haikaviva py. ²⁷ Airure pee Ñanderu Tumpa heepe, pimbijetashu verã ko kuatia ñeẽ opaite ñandy ryvyre. ²⁸ Ñanderu Hesukristo ti ñohẽ pyndy rehe ñymbai kavikue, Amen.