¹ Shy ryvyre, avy opaite pyroja espiriture, pyhãã rãnishu ko espiritura ou Ñanderu Tumpaivi, ñymby hetave rãnga oho Tumpa ĩñẽẽ mbeu’ia japure ko yvy ĩãrẽ. ² Kỹrãpo pikuaa kui haira ouva Ñanderu Tumpaivi. Opaite Espiritu heiva Hesukristo ouva tapyy rãimi ko yvy ĩãrẽ, vokova hai ouva Ñanderu Tumpaivi. ³ Opaite heiva kyrãã rãnga vokava, ouã Ñanderu Tumpaivi. Vokava rãnga hai Kristo rã ãnga, Kristo ñymbyvaisho ihea espíritu rãnga vokava, pee pyhẽnduma rãnga Kristo rã ãnga ou verã haereka ĩmẽma ẽ ko yvy ĩãrẽ. ⁴ Shy ray haereka shy rajyre, pee rãnga hai Ñanderu Tumpa ryhevare, hãrã pee pymbyhovai Tumpa ĩñẽẽ mbeu’ia japureivape shara pỹrãtave hai ẽvã pyndy pyape, ko yvy ĩãrẽ õvãivi. ⁵ Haireta rãnga hai ko yvy ĩãrẽ õvã, hãme rãnga haire ĩnjetahe ko yvy ĩãrẽ õre, hãme yvy ĩãrẽ õre hẽndushu ĩñẽẽ. ⁶ Ñande rãnga hai Ñanderu Tumpa ryhevare, hãma Ñanderu kuavare katupo ñanyrẽndu kui, hãrã haimbava Ñanderu ryheva hẽndua pokui ñani ñẽẽ kyrãpo ñambivachera jaikuaa espíritu añeteva haereka espíritu japu. ⁷ Shy ryvyre, jaijaihupo. Ñanderu Tumpa ña ãpova rãnga hai jyhaihu. Opaite pyryhaihuva rãnga hai õhẽva Ñanderu Tumpaivi haereka kuaashu. ⁸ Hãma pyryhaihu mbava kuãã Ñanderu Tumpa Hai rãnga jyhaihu añeteva. ⁹ Ñanderu Tumpa rãnga heshaka ñande ñandy raihuva, ñande pevarã mbou Tay pẽntereva ko yvy ĩãrẽ, hai rupii jaiko verã opa ara. ¹⁰ Jyhaihu ãñeteva rãnga ou Ñanderu Tumpaivi, kyrã heshahaka ñande, ñande rãrĩã jahaihu Ñanderu Tumpa, hai rãrĩ rãnga ñandyraihu, mbourã vẽkua Tay ko yvy ĩãrẽ hejarei ñandy hevi mbai porãmba jajapo vekua. ¹¹ Shy rayre, Ñanderu Tumpa ñandyraihurã, ñande jaijaihupo jyve. ¹² Mba'ety rãnga Ñanderu Tumpa hova hesha verã ñande jaijaihurã Ñanderu Tumpa pyta ñandy pyape, hãma jyhaihukue pyta kavi ñandy pyape. ¹³ Kyrã rãmẽĩ jaikuaa ñãĩmẽ ñaĩpyrã, haereka hai ẽjyve ñandy pyape. Hai mẽẽ ñande Espiritu Santo haikaviva. ¹⁴ Hãrã ore heshaha haereka Kuaahaka Tuu mbouva Tay mondojepe verã kuaretare. ¹⁵ Ĩmẽ'ẽ heiva Hesukristo hai Ñanderu Tumpa ray, Ñanderu Tumpa pyta pyape, hãrã hai pyta jyvepy Ñanderu Tumpa. ¹⁶ Ñande rãnga jaikua kavi haereka jaroja Ñanderu Tumpa ñandy raihuva, Ñanderu Tumpa rãnga hai jyhaihu añeteva, opaite kyrãvã jyhaihu ãñetevapy ia, pyta Ñanderu Tumpa pyape, hãrã Ñanderu ou ẽẽ jyve ñandy pyape. ¹⁷ Kyrã jyhaihu ẽẽ hekope kavi ñandy rykovepe, hãrã jakyje veama, vyape ñahãrõ ñãĩ pirimbivachea va jy ara ñandy rykove hai rãimima jy verã Hesukristo rãimi jaiko. ¹⁸ Jyhaihupy mba'ety kyjeva, jyhaihu haikavi õ opa mõhẽ jyve kyjekue. Kyje rãnga veru mbai porãmbave, hãme rãnga kyje iva rekoã teri, jyhaihu hekope kavi õ. ¹⁹ 19 Ñande rãnga jahaihushu, hai rãrĩ ñandy raihurã. ²⁰ Ĩmẽ'ẽ heiva she ahaihu Ñanderu Tumpa, tẽvã heshatãã hapisharã, japurei i. Ko haihu mbava hapisha hesha revarã, marãrapo Ñanderu Tumpaĩ haihujy heshamba õ. ²¹ Jareko rãnga shi ko jajapo verã, ko haihuva Ñanderu Tumpa, haihupo jyve hapisha.