¹ Pymaĩhe marãva jyhaihura Ñanderu Tumpa mẽẽ ñande, ñany mby hee verã tay haereka tajyrã, vokava reta rãnga hai ñande. Hãme rãnga yvy ĩãrẽ õre ñandy kuaa, shara kuaashu reta. ² Shy ryvyre, jaikuaama rãnga jaikoma tay haereka tajyrã. Jaikuãã teri mbaivarapo iko ñandy hevi. Hãma jaikuaa rãnga voka ara, hai ijeshaka ñande verã, ñande rãimi pokui, jahesha pokui hai ẽvã rãĩmi katĩ. ³ Opaite kova ñyhãrõ rekovare pyape, tiñymby heko kavi, hai heko kaviva rãĩmi. ⁴ Opaite japo ia mbai porãmba rãnga hẽnduãshu Ñanderu Tumpa ĩñẽẽpe heiva, mbai porãmba rãnga he'ise pũãva Ñanderu Tumpa ĩñẽẽre. ⁵ Pee rãnga pikuaa Hesu Kristo ijeshaka heky ñandy hevi verã mbai porãmba vekua, shara ijehe mba'etyre hai mbai porãmba. ⁶ Opaite pytapyare japoã mbai porãmba, mbai porãmba japo ia retany kuãã haereka heshãshu reta. ⁷ Shy ray haereka shy rajyre, avy mbava pynymby tavy. Opaite mbai hekope kavi japo iare, heko kavima Hesukristo rupii. ⁸ Mbai porãmba japo ia retany Ãñã ña ãpova hai, shara õñepyrõaivive Ãña porãmba japo, vokava rehe rãnga ou Ñanderu Ray, opa mambai verã Ãñã japo vekua. ⁹ Opaite Ñanderu Tumpaivi õhẽvã katuã porãmba japo, shara Espiritu Santo ẽẽpy, hãme katuãma porã i. Shara ikoma hai tay haereka tajyra. ¹⁰ Kyrã ijykuaa kavi mbavara hai Tumpa haereka ãña tay hãndi tajy. Opaite heshatambava hapisha ha'ẽã Tumpa tay haereka tajy. ¹¹ Hãrã pyhẽndu õñepyrõãivive heiva ko ñẽẽ Jajyhaihupo. ¹² Avy jaiko Cain iko vekua rãĩmi, hai rãnga tyvyite tẽvã juka, shara iko Ãñã ipope. Marã ĩrãra juka tyvy: Cain juka Abel, Abel haikaviva japorã. Cain porãmba japo. ¹³ Shy ryvyre avy pykyje papishare pyndy reshatãã irã. ¹⁴ Ñande rãnga jaikuaa jahasama ñymano, tykove kyty, jahaihu ñanda pisha retarã. Ko pyryhaihu mbava katy ĩmẽĩ teri ẽ ñymanope. ¹⁵ Ĩmẽ'ẽ hapisha heshatãmbarã iko puruka ia rãimi, kyrã pikuaa puruka ia rekoã pyape tykove opambava. ¹⁶ Kyrã jaikuaa kavi Hesukristo jyhaihu, shara hai mẽẽ ñandy rehe hykove. Hãme rãnga ña mẽẽpo jyve ñandy rykove ñandapisha rehe. ¹⁷ Ĩmẽ'ẽ iko kavi ia hesha hapisha mbai mba'ety rearã, mba'ẽã mẽẽshurã, marãrãpo Ñanderu Tumpa jypareko ẽẽ pyape. ¹⁸ Shy ryvyre avy ñandi juru haereka ñani ñẽẽ pẽĩ ñõĩte japyryhaihu, ãñeteape rãngapo japyryhaihu mbaikavi jajapova rupii. ¹⁹ Kyrãvãpe ñande jaikuaa ãñẽtẽĩ teva hai, ñande tay haereka tajy, hãmẽĩpo ñandy pyapy õre haikavi ẽ. ²⁰ Ñandy pyapy õvã porã ñani ñono Ñanderu Tumpa hỹnonderã, tẽvã jyparekokue ĩãrẽvẽ ẽshi, ñandy pyapy õvãĩvi. Shara opa kuaa hai ñandy pyapy õvãre. ²¹ She ahaihuvare ñandy pyapy õre haikavi ẽrã, jareko pẽnte ñyhãrõ, hai rupii. ²² Kyrã mẽ ẽã ñande jairureva, shara jajaposhu hai potava hãmã hai mby vya. ²³ Hãrã hai potava hai kova Jaroja verã Tay Hesukristo hee haereka jaijaihupo, shara Kyrã hai jurure ñande. ²⁴ Hãma japova hai heiva, vokava Ñanderu Tumpa ẽẽpy, hãrã hai ẽẽ jyvepy. Haivi ñande jaikuaa jyve hai iko ñandy pyaperã, Espiritu Santo rupii hai mẽẽ ñande vekua.