¹ Shy ray haereka shy rajy kova ambyparape ĩmẽ'ẽ porãmbape ivarã avy kyrãĩ pyheja porãmbape pikuaa rãnga pẽnte ĩmẽ jare ñany mbory verã ñanduruvisha voka hai Ñanderu Hesukristo haipo injeta ñandy rehe kui. ² Haipo mẽẽjy ñande pya kavi ko porãmba tẽvã ha'ẽã ñandeĩ heko porãmbava heta ẽ ko yvy ĩãrẽ heko porãmbava. ³ Hai rupii ñande jaikuaa jajapo ãñeteva Ñanderu Tumpa potava jajaposhu. ⁴ Ĩmẽ'ẽ heiva she rãnga aikuaashu tẽvã japoãshu hai heivarã japu haereka pyape mba'ety ãñeteva. ⁵ Ñanderu Tumpa ĩñẽẽ japo katuva haihu jyveshu haereka pyape haikaviva ĩmẽ'ẽrã japopo Ñanderu Tumpa heiva. ⁶ Ĩmẽ'ẽ pyape heiva ikova rãimipo aiko jyve. ⁷ Ha'ẽã rãnga py'ahuvaĩ ambyparashuva kova ambypara jyveshu hẽnduma iare. ⁸ Kova ambypara jy veshu kova kuatia py ahu kova añete pyndy pyape, pyntu kõĩvã pema pehẽvẽ. ⁹ Ĩmẽ'ẽ heiva kõĩvãpe ãĩ, tẽvã hapisha haihuarã pyntuape teri i. ¹⁰ Hapisha haihuva haipo kõĩ vãpe ẽ, ha'ẽãjy sapy ãĩ oho jy verã porãmbape. ¹¹ Ĩmẽ'ẽ hapicha haihu mbavarã pyntuape teri i, pyntuvape vata teri i, tẽvã kuaa mãtyra oho. ¹² Kova ambyparape shy ray haereka shy rajyre, Ñanderu Tumpa rupii aha jepe porãmbapetẽ aikova. ¹³ Ambyparape terure, shara pikuaa jypyiterã vãĩ ẽvẽkua, kunumire kova ambyparape shara pẽhẽma mbai porãmbaivi. ¹⁴ She ambyparape sanjayre, pikuapojyve Ñanderu Tumpa heiva pijaposhu. Ambypara jyvepe terure, pee pikuaa kavi. Ñanderu aryka'e vãĩmba ẽ, ambyparape kunumire ombyparape Ñanderu ĩñẽẽ rupii pitaso hynonde. ¹⁵ Avy ko yvy ĩãrẽ õvã jahaihu, ĩmẽ'ẽ ko yvy ĩãrẽ õvãĩ haihuva Ñanderu Tumpa haihuãrã japu rei i. ¹⁶ Avy ñandy rete potava jajapoite, pya poshykue ĩmẽ'ẽjy ko yvy ĩãrẽ, pota ñymbyvate iarã vokava oua Tumpaivi. ¹⁷ Kova yvy opapo hai porãmbape iare ryheve, koñẽĩ e Ñanderu Tumpa heiva japovaĩpo iko puku, haereka ohopo vate tykove opambape. ¹⁸ Haipope shy ryvyre, kova avisha pire pe ñimi mondeva oupo vãhẽ ñande ñavãhẽma verã. Tẽvã pikuaa pojyve ñavãhẽma yvy opa verãpe. ¹⁹ Õhẽ ñanymbyteivi kova pyrỹmby tavyĩ iva ãñete hai ñandyry hevarã õhẽã mbatẽ ñandy hevi, mbai porãmbape. ²⁰ Ãñete ñande Ñanderu Tumpa mẽẽ ñande Espiritu Santo jaikuaa kavi verã mbavara ãñete haereka mbavara ha'ẽã. ²¹ Pee jyve pikuaa mbava rãĩmi pei pikuaa tẽvẽrã mbavara japu hãndi mbavara ãñete. ²² Mbavara hei kova, hai Ñanderu Tumpa, kyrã jairã ñañymby tavykapo. Haereka opaiteva Ñanderu Tumpare jyrojava, opapo mbytavy. ²³ Hetapo kova ẽ Tumpa rãĩmi ouva, mbytavy haereka tay, tuu mỹ ãñete vape. ²⁴ Kova aryka'e pyhenduva, pynatu pyndy pyape. Haereka ã'ẽ pyhenduva pyndy pyapepo pyreko Tay haereka Tuu hãndi. ²⁵ Kovapo mẽẽpe tykove opambava. ²⁶ Kova ambympara pe pikuaa kavi verã marãra iko, pota pymby tavy ia. ²⁷ Pipityva rãĩmi Espiritu Santo momohẽãvã Ñanderu Tumpaivi piñymy pyrãta katupy. Hãrã katuveama mbava pynymbo eite. Ko Espiritu Santo teiva rãnga pynymboi opa mbaire, haereka ẽ hãndi ãñeteva, hai japuã hai pynymboiva rãĩmi pypyta piñymy pẽnte hãndi Kristo. ²⁸ Kova haipope shy ray haereka shy rajyre piñiñono katupo Ñanderu Tumpa ipope, mãhãjera ãvãpytupy oumarã ajera ñanymarã hỹnonde ja vy ãĩma tẽvẽrã. ²⁹ Pikuaa rãnga Hesu heko kavi pymãĩ kavipo jyvehe, jyroja heva tiko heko kaviva rãĩmi.