Djawupuku 9

1 Go chupa ekõngi okryrallãpe gorãwe chãwãpe ekõ bitallãwerã, go o achyllã nonga go nondjeware Zabulon go Neftali chupape; go krãmpĩpe ywy embepe chapi wachupe Jordan Galilea chupa ruwa. 2 Go chupa Watagi chãwãpe wechãwerã chapi wachu, go ekốngi mano ruwype wechawerã krey chapi gatu idja llabu. 3 Tãrã miwerã chupa kuwẽ wywy dje urywerã gogi wywydji urygatuwerã dje chã ruwa. Go urywerã bue ã'ã pechewe nuãwã nonga, go ury gatu nonga tốãllangi bowo rekombu gogi erupawegi duwe chupa puare. 4 Dje kiowe djata djiwatygi py wachugi, go wyra puku dja djata llambu emi dja djueitygi pachoty Madianpe ekõwe nonga. 5 Mendypapyrã tõ allãngi llapo pychãmbire wywy go tyru puku pirã pirywe tatape mendypapyrã. 6 Etakrã krumi opowerã nandje puarã kowe ywype. Etakrã tey mewerã nandjepe, dja djatagi ĩwerã dja ymachidja chidjaechegi djo bykuarã djã gatu kainallãngi rekoatygi chidja gatugi, krymbaechegi, Apã Wachu krãmpillãngi go ymachidja okryra gatu djiwa. 7 Dja chupa okryra gatu manollãndygiwerã djã okryra gatu krãpillãwerã. Idja wapywerã David wapy endawepe dja kuwerã dja chupa matãwewerã ape gatupe watawã bue djapo gatu kainallãpe, go kreybu krey krãpĩpewe ywadjiwa rekoatygi djapowerã kowegi. 8 Go rekoatygi mema dja djawu Jacobope Israel puawã. 9 Efrain go Samariapua ekõngi kuawerã kowe djawu, ka chidjape djawu reko. 10 Itadji djapopyre wapawerã. Ore puãwerã emi wapapyregi. Kichipyre higo dja tapy puarã nonga, ore pepywerã cedrope. 11 Go Rekoatygi rõ kuwewerã Rezindygi byllãndygi go nuãmbawerã dja byllãndygipe. 12 Krey wẽ rekuaty go Aran puagipe kreywa rekuaty Filitea puagipe; go dja djuru mokõwerã Israel puagi wywype. Go nongabu djepe Apã Wachu prandjã kãndjallã. Go nongabu djepe dja ipo pou gogi wywy llabu. 13 Israel pua wywy wedjallã bue buchã djapoty, pachobu djepe kuara djuellã Apã Wachupe. Ywadjiwa Rekoatygipe. 14 Go buare Apã Wachu akã mini emi 15 Israel tõ rõ chuepurãngi go kiutygi. Bua rõ djamo profeta kainangi. 16 Kowe chupa kuwẽandygi rõ kaina. Go buare dja ipope ingi kãndjãmbawerã. 17 Go ware Apã Wachu djã urullã kbuchuwe wywy dji, chingadjekyma krãwegi, prowegipe go kaina djã buchã, go djuru ka djawu. Go buare Apã Wachu prãndjã krãpillã. Go buare dja ipo pou wyche gogi wywydji. 18 Dja prandjã endy tata nonga, keipawã kueity emi achĩ ka'a chãwãpe, tata tãchi oma ywadjiwa. 19 Rekoatygi chidjaechegi prãndjã buchã roma kowe chupa emi dja chupa pua chinga ruwyllãwerã dja irõndy wywype. 20 Mokõmbawerã dja llu rekuatywagi lleillã wyche emi uwerã emi dja llachu rekuatywagi emi, go nongabu djepe llellã emi etakrã etakrãngi uwerã dja djywa o'odji. 21 Manases mokõ djue Efraindji, Efrain Manasespe, go mirõngi Judape. Kowedji Apã Wachu prãndjã. Go ipo pou wyche reko gogi wywy llabu.