Djawupuku 8

1 Go Rekoatygi djawu chope: prawo gami etakrã ita wachu gogi paragatuma go djawu gatu: Maher- Salal- has bas. 2 Cho eruma chodji idcha kuãgi djawu kiuatygi Uriape emi Zacariape Jeberequías tey,y. 3 Gobu cho brekodjo, kudjã Apã Wachu djiwe djawutygi, go ekõma brawo memby etakrã krumi. Go Jaweh djawuwe chope mbykua gami Maher-Salal-has-bas, inambyty: narố bitallãbewerã bitaeme gogi wywydji go byllãdygi tomumbuwerã. 4 Go Krumi djawu gatu nodje: cho Apã emi cho ei'i rapawerã Asiria chupa ymachidja endape idja llaporã. 5 Go Jaweh djawu chope, gobu kiuma: 6 Kowe chupa kua kowe djapollãgi mbue Siloe puagi yj wewo gatuma, gobu gogi urywã Resin go Remalia teydji. 7 mechã gatu go rekoatygi mbuewerã gogi llabu y'y wewo chidja gogi llabu Asiria chupa ymachidja toallangi noa wachu chidjaetegi gogi wachawerã y ruwa. 8 Wẽma embepawerã Juda chupape go wachapama go wachawerã gogi wywydji go wẽwẽra idja kuetã pewe: go upiwerã ipo wywy ebewerã dje chupa pua wachu, Emanuel (gonoga Apã Wachu î nandjeji) 9 Pendje chupa pua ytydjepe gogi llabu pendje o achywerã; wendu gami duwe rekuatywa go Kryta muchã gatu djepe okryrallãwerã warõ gatuikõ okryrallãmbama djepe. 10 Pendje chidja mondo praruwã go ekõllãwã bue pendje potagi go Rekoatygi î oredji 11 Apã Wachu kãwa chidja ipo chidjape go kiu gatuma go watallãwã go tapytãrã ape rupi, go kiuwe: 12 Pendje djawueme kabewãgi, go chupa pua go bykuamami kabewagi; gogi krymballãeme gogi wywy krymballãma. 13 Pendje kuagatu ywa nuawachu Jaweh Chidjaechegi godji kryballãwerã emi parowerã. 15 Gobu rõ kuwẽma go Apã Wachudji kuarekogi; go mirõ Israel tapydji ekõwerã ita mimbyregidji go Jerusalen puagi wapawã go mimbyregidji. 14 Tãrã Wawerã gogi kryrallãwerã wawerã go chĩga ruwy go rapyrã muchãmbyre 16 Djono gatu cho djawu gatu reko pichadji go Apã Wachu kuere mudjãndygi. 17 Cho warõ djue Apã Wachupe, go djemillãwerã chã'ã go Jacobo tapydji, gonogabu djepe kuadjuete. 18 Kuagatueche, Apã Wachu inawe emi cho ray wywype mewerãgi bue wechallãdygi mechãmbyrã Israel puarã go maiwerã ywa noawachu reko kuatygi ekuandy Jerusalen djorãpe. 19 Go kiumbu pendjepe: prandu gami (kabewãgi) Cho krei buchã rupi Kuatygi gogi llãpo wywy, go djawu djẽgurupe, kiu gamondo: chupa kua wywype gogi prandumbechema rekoatygi. Kabewãgipe pranduwerã ko go manowegipe go kbe'e emi go kudjã manollãgidji. 20 Go kuadjuellãgi go inawegi go kuallawerã djawu mebyregi gogi wywydji ekõllãwerã. 21 Kowe nongagi chupa oachywerã go llellãwerã go rellãdjepe pradjãma, gogi wywy djawu buchãta chupa ymachidjagi go Apã Wachudji opewerã ywa rekuaty. 22 Gogi mechãwerã dja ywydji, oachywerã go tãchî chawã go dja'ã achy buchã werã, go ekõwerãgi chãwãpe