Djawupuku 7

1 Kowe bue rô wẽma Jotam tey, go rõ Usias teywe, Juda ekoãndy ymachidja puare kreygipe Resin, Siria ekoandy ymachidjagi go peka Remalia tey, Israel ekuandy ymachidjagi, nuãma reko tõ mumbuwã go Jerusalen puagi wywype gogi wywy buãmbudjepe chidja rekollã miwã idja ipo wydji Jerusalen ekoãndype. 2 Go kiu mondobu David tapype: Siria îma mondo etakrã djawape Efraindji Akas go idja ekoãndy pua rõ djã ryrypa roma î go ka pua wywy nongaeche go wytu chidja pedjuwe nonga. 3 Gobu Jaweh inama Isaiaspe kowebu o gami, dje emi tey Searjasubdji pendje dorowã Akasdji, go y enda ywa pua go akã pytadji go ape ogi tyru kichîaãndy go tyroândygipe. 4 Ina gami gogi wywy maî gatu gami emi okryra gatu dje krymballâeme îme dje djã chînga ruwype kowe mirô tata lly'y minigidji: Resin, Siria pua wywy ymachidja go Peka, Israel ymachidja wachu pradjã buchãechebudjepe. 5 Gogi wywy ka chidja buãbu chodji gogi wywy inambudjepe: 6 Nandje o gami Juda ekoandype nandje paro ga mondo idjape nandje llaporã gogidji nandje mi ga mondo idja ymachidjagirã Tebeel teygipe. 7 Go buare Jaweh Rekuatygi go nonga inama: Go wêllãwerã emi ekollãwerã. 8 Damasko rõ chidja reko Siria ekuandy go Resin rõ chidja reko Damasko; Efrain chidja reko Samaria, go peka Remalia tey chidja reko Samariape. 9 Buachapa ipo ruy'y wêgipe go Efrain puare kadjã roma djo, ĩbechewerãma go ekoandygirã ekoandy pendje kua gatullãbu pendje ĩ pukullãwerã. 10 Go Jaweh djawu wyche reko Akaspe inama idjape: 11 puka mondo dje puarã go dje rekuatygipe etakrã wechâllãndygi go ywy ikua pukueche emi go ywa pukuechegipe. 12 Akas inama idjape: Cho pukullãwerã emi cho buâllãwerã cho Jaweh. 13 Gobu Isaias inama: Wendu gatu gami, David tapy, tarãllã ko pendje ina pukawã ywy llabuwa wywype, kowebu pendje pukadjuema emi cho Apâ Wachupe. 14 Go buare Rekoatygi djapowerã pendje wechawã pendjepe wechãwa go bue wechapyrãgi go ko we kudjã daregi kbe'edji ekõllangi brawowerã dja bykuawerã Emanuel. 15 Idja rõ uwerã kã typouwegi emi myga wedja mi pewe bue buchâ idja prawo kua'a pewe go bue gatugi. 16 Go krumi kbe'e wedja nondje mi go bue buchâ dja prawowã go buegatugi, go mirô ekoandy ymachidjagi dje krymballâgi wedjawerã wyche emi kowe ekoandygi. 17 Jaweh buewerã go Asiria ekoandy ymachidja dje llabu dje ekoandy pua wywy emi dje apã tapy puagi llabu pendje djuei buchã pendje wachallãndy wyche Israel wedja djiwê go Juda puare. 18 Go djuwêrâ go kreygi, gogimbu Jaweh mimby ipuwerã go Tõ aillãngi tãrã buchâ go tõ aillãngi îngi go Egipto y wewo krãpiechegipe, go kue'ê (tõ aillãngi) îngi Asiria ekõandype. 19 Gogi rõ opawerã go kuã buku pewope, emi go ita ikua djawã rupi emi go achî rupi emi go yenda rupi 20 Go krey gogipe Jaweh Rekuatygi eruwerã Asiria ymachidja ekõgi go ypurã wachupe eufrates rypype idja rõ djupîwe pê bukupe pedje tõ emi pendje eche a'a emi pendje buta wywy djepe. 21 Go djuwerâ go krey gogipe go pua dje ekoandy pua kbe'e go pytawegi dja ymabawerã etakrã achîpurã emi mirô wachupurã emi go bechepe. 22 go medjiwa tãrã buchã ka'ã gogi wywy rõ uwerã ka'ã kyrawe go nonga emi go kã krerepyregi (kesu) emi myga uwerã go pytawegi dje ekoandype. 23 Go djuwerã emi krey go kreygipe go chipopurã lla'a llambaty rekogi etakrã wachu (1.000) go chipo purã lly'y idja mewerã go etakrã wachu butagi puty mewerã pytawegi kowegidji rõ ekõwerã achĩ buchãbawã. 24 Machî emi rapa djiwẽ ikẽwerã idja djãwãpe go achî emi djarã îwerâ go rupi wywy. 25 Go kuãmbuku rõ tyrõ endawe wywy tyrõndygipe go djapollãwerã krymballãdjiwa achĩdji emi go djorãdji, wedjapyrã go bue urekowã achĩpurã emi wachupurã bechepe wywy.