Djawupuku 10

1 Illu llu go ymachidja paratygi djawu membyre emi kiuatygi go djawu membyregi, chidjape mbiriwãpichape. 2 Gogi wywyrõ bue djapo gatullã jepywã prowegipe emi bue rekollangi idja bue wywy chidjape matãma gobu krawengi llapo narõma. 3 Buciõ pendje djapowerã djueĩ puy wachu ekõmbu awadjirõ pendje djapowerã pendje kuwêwã go duwe chupa pua ekõmbu pendje bro'opawã Matydjemiwerã pendje bue tãrã wywy. 4 Cho îllã buare, rawerã muchambyre chidjape malãwerã wapawerã go mano endatype godji Jaweh pradjã kãdjãllãwerã idja ipo chidja miware gogi wywy llabu Asiria Apã Wachu llapo wyra minĩ (substituto). 5 Cho prãdjãware ina pendje Apã, cho rekowerã Asiri puagipe cho wyra mini emi wywa pachowãnongagi idja ipope miĩma cho pĩdjã. 6 Cho buewerã Asiria pua wywype browã go chupawachu chodji prãdjãndygi llabu (Israel llabu) ache wywy chodji djembĩ ware chidjape matawerã idja bue tãrã biri mbuchãgi, we puchi pyrõ nonga aperupi ĩngi pyrõwerã. 7 Asiria yma chidjagi djawullã tõ djawu reko bro'opawã emi krãpiechewã tãrû ukuãndype. 8 idjarõ inawe; go cho ymachidjagi wywy, gogi wywyko y machidja wachu wywy ekoandy wywy puagi. 9 Cho puarã kalno emi karkemis enonga, Hamat emi Arfat enonga emi go Samaria Damasko nonga. 10 Go cho mimbawe cho ipowydji emi ekoandypua apã cha'ã nongagi Jerusalem emi Samaria rekogi. 11 Cho djapollawerãko Jerusalen emi idja apã cha'ã nongagidji 12 Go wêwerã Apã Wachu idja mbitaty krãpĩbo Sion ywy kuadji emi Jerusalempe, idja pacho puywerã Asiria ymachidjagipe idja ka chidja bua'ã emi ka y'machidja bua'ã ware idja djã'ãpe. 13 Idja rõ inawe kowe nonga: cho chidjarupi, bue kugaturup emi cho tõ gatu rupi ache, wywy miwe cho ipo wydji emi achĩpurã chue wywy chidja nonga mombowe ymachidja wywype idja wapyty endagatupe. 14 Cho ipo rupi matãwe akuandy pua bue biri buchã wywy go ra'a nonga kuyra pia'a idja eyty puare, go nuã nonga kuyra pia idja pyregi, go nonga cho ymachidja reko chupa pua wywydji ĩlla duwe kueragi idja pepo illã emi djuru krellagi chĩgawã. 15 Go djy'y ko krymbawerã idja rekotygi chã'ã ruwa, wyra djua'a rekobu go wyra kichitygi wyra mini chidja werãko idja reko'atygidji, emi wyrako pachawerã idja rekotype. 16 Go ware Jaweh ymachidjaenchegi achypawerã go ache chidjagipe, idja cha'a bype rupi gogi wywype krapîwerã tãtaendype. 17 Go Israel tata endy wa'ã werã go dja'ã gatugi tata endygatunonga werã, go mendywerã idja kueity emi idja djupikãwywy. 18 Go Jaweh krãpĩwerã ka'ãgatu emi ywytyrõandygi, idja djawã emi dja eche achywerã mano ruwy nonga werã. 19 Mawebu etakrã krumi kua'a werã manongaĩ emi para kuagatuwerã go wyradjuapa wedjiwa ĩngi kadji 20 Ekõwerã mawembu go Israel ekoandy pua manombawedjiwa ekõgi, go kadjãwegi Jacob tapy pua warõlla duwe chupa pua idjape browegi djepywã go rõ prarugatuechegi. 21 Go manillãmbyregi ekõwerã wyche emi Jacobo djue manollãmbyregi gogi wywy kuagatuwera Apã Wachu chidja echegipe. 22 Dje Israel dje ekoandypua tãrã djepe go ywy kui tãrã nonga ypurã embedjiwa, go manollãbyregi ekõmba werã go wyche djuei wachu ekowerã idja inawenonga, wyto chidja nonga. 23 Jaweh chidjaechegi djapowerã idja idjawu pawegi wywy idja ekoandydji. 24 Go ware Jaweh chidjaechegi pendje reko atygi, kowe nonga ina, dje cho ekoandy dje îngi Sionpe krymballãeme Asiriadji, Asiria pua puãbu wyra minidji djepe pachowã go Egipto djapowe nonga. 25 Warõ tãrãlla werama Cho prãdja bro'owã Asiria pua wywype. 26 Gobu Jaweh chidjaechegi upiwerã idja wyra pachoatygi ekowerã wyche go browachu ekốwe nonga go Madiandji go oreb ita wachu djãwe, go upiwe nonga idja wyra mini go ypurã wachudji. 27 Gobu ekõwerã go mawebu, dje chy'y llabu matãwerã bue fuygi emi kiowerã wyra congulla rupy rekoatywa djuwyatygi go to'ã allãngi chidjagi chãruwa. 28 Asiria ekõma Ajat rekoaty, wachama Migron rekoaty: Micmape djawu etakrãdjiwa manongaî to'õallãngi wywy. 29 Gogi wywy wachama y upia wachaty rekoaty, ekõma geba chupape gope kêma Ramapua krymballãroma. Gibea go Saul llapo kãdjaroma. 30 Puka chidja mondo, Galim tey kudjã go Lais pwew wenduwã Anatot puka illu, llu! 31 Madmena dja'ã kambo buchã romo, go Gebimpua ekõgi Kãdjamadjo. 32 Ekõma nobpe gope wapy etakrã krey, gopu Sion upima idja ipo Jerusalen ywy kuãbuku rekuaty. 33 Maĩ gatu gami Jaweh chidjae chegi mondowellã chidjape go wyra akã bukugi go wyra wapawerã. 34 Gobu mondwerã djy'ype go ka'a prana go Libano chidja wabu pambu wachuwerã go idja djuabu.