Djawupuku 65 "Jaweh djapo gatuwã ekuandype ikê parawã"

1 Chope kuara reko chodji djawullãngi, doroma cho kuarallãwegi, cho djawuwe: kowepe cho î, kowepe choî, cho rõ etakrã ekuãndy wywype raillãngi cho bykuapyre. 2 Krampî kreybu cho pouma go cho ipo, etakrã ekuãndy ka chidja buãngi chodji, emi watagi etakrã ape kbeigatuillãngipe emi go tõillangi nõnga, dja ekuãndygi nõnga. 3 Go ekuandy gogi gorãwẽ chope buã reko mê buare go keîmbyrãngi go pechepyregidji, emi mendy go teiwu gatu ita wywy llabu. 4 Gogi wywy wapy go mano pechepyre rupi emi wacha roma go chãwã rupi, emi uma chachupurã o'o, emi dja karape baku mymba o'o kuchillãmbyregi. 5 Go kiu'u gogi wywy: puã ga mondo gope ekõeme cho djãwê, cho rõ îgatu we, kowe wywy ekõ tachî emi tata êndygi nõnga, krey wywype cho pytadji. 6 Wechã gatu gami, kowe wywy cho parapawe etakrã djawu gatupe emi gogi î cho chã ruwa emi cho wi'ibechewerã, cho mewerã emi cho pepywerã go ekuandy pewe. 7 Pêndje emi pêndje apã wywy bue buchã djapo, go mendy buare go teiwu gatu ywy kuambu emi ywy kuãmbu ichakrã llabu pendje rekoatygi buângipe buarã, go nõnga pendje djudja reko chodji, go buare cho djapiwerã bue buchã djapogipe emi cho pepywerã gogi wywype, ina pendje Jaweh. 8 Go nõnga pendje Jaweh ina: go chipopurã lla'a ty'y nõnga ina kbeigatuillã wedjallãwã werã krampîwã, î buare pendje Jaweh kuwẽ gatu membyre, kowe nõnga cho djapowerã cho ekuãndydji, go kuichopallã emi. 9 Go nõngabu krãmpîbechewerã Jacobo irõndydjiwa wywy bychepe emi Judadji wewerã cho ywy kuãmbu rekuatyrã, go duwe cho matãmbawegi mewerã wywy dja ywy llapo, emi cho kuere mudjãndygi ekõwerã gope. 10 Go wachupurã ekõwerã Saron ywype, emi Akor djõmpe ekuawã achipurã wywy, kowe wywy rõ ekõwerã cho ekuandygi wywype, emi chope kuara rekogipe emi. 11 Pendjerõ wedjama mondo Jaweh emi Isuallã roma cho ita wachu cho prawowegi, djapowã kaimbyre duwegipe emi pendje me'ẽ (djara) gogi wywype pendje chipo purãlla'a ty'y. Kbegatugi buekaimbyre nonga . 12 Cho me'ẽwera pendjepe djawã pychopyrã pe'empe pendje marãwerã cho pendjepe bro'okawã. Cho rõ pukare, pendje kuwellã cho djawarõ djepe wendull!a, pendje djapo djuete bue buchã cho chã'ã ruwa pendje prawo bue buchãngi cho byllãngi. 13 Go buare Jaweh pendje Apã djawumal maingatu cho kuere mudjãndygi rõ cho kuere mudjãndygi itykuwerã wywy, pendje ydjuewera; cho kuere mudjãndygi ury gatupe iwerã, pendje cha'ã wychowerã. 14 Mai'ĩgatu, cho kuere mudjãndygi pre'ewerã djawaechedji ury gatuchepe, pendje chingawerã chinga ruwype iwerã pendje djã'a emi djawã reko emi pendje chinga pawerã. 15 Wedja papyra pendje bykuapyre djapipyra emi cho prawo papyredji wywy go baure Jaweh pendje djukapyrã cho kuere mudjãndygi mewerã bykuapyre pou. 16 Go puka djue egi kuwerã kowe ywy llaby puka gami Apã Wachu, kainallãngipe mẽ waregi ywy llabu mẽ mondo ywadjiwaty Apã kainallãngi bykuapyre dji, djuei'i biriwerã nõdjewaredji, cho kuambe chewerãma illãma cho chã ruwa. 17 Maī gatu, cho djapo po'u werã ywadjiwa emi ywy po'u; nadje buaregi īllãma kua reko go wywy kuaīllama, go wywy kuaillama mondo gogi. 18 Go buare ekōwerã dja urype emi ury gatupe krey krapipewe, gogi wywy cho djapowerã, go kuã'aga mondo, cho rõ eruwerã Jerusalenpe, ury gatuechepe, emi cho ekoandype djã ury gatupe. 19 Go cho djawã ury gatu werã Jerusalen dji, emi ury gatu werã cho ekuandy wywydji; emi go ruwawe wēndubeche werãma go djawã puagi chinga emi tue'ē omatãgi. 21 Go krumi kãtykugi manollãwerã, go chuepurã manollãwerã emi idja we'ē nandje kre'y'ybu. Etakrã manobu (100) etakrã, tapa tapa tãrã ruy'y jawuwerã idjadji emi manowe kbuchuwe kreybu go ruwyllãgi (100) etakrã, tapa tapa ruy'y jawuwerã idjadji bue buchã djapopuredjiwo djapipyre. 20 Gogi wywy djapowerã emi, pechewãgi chipopurã emi werã idja lla'a. 23 Djapollawerãma tapy duwe wywy ekõwõ go djawãpe, go pechellawerã gogi wywy iwã, go wyra manollã ekõ buku nonga, go nongaeche emi cho yrondy wywy ekõ buku werã, emi cho prawopawegi djawã okryra gatuwerã idja djapowe djiwa. 22 Ka tyrõllãwerã gogi wywy, emi erullã werã krumi ywy llabu mano bitaillãwã, cho kuwē gatuwerã wyche cho irondy wywy idja teywe wywy. 24 Go puka nondje emi, cho pepywerã, djawu krãpī nondje cho djapowerã. 25 Go krachowa wachu emi wachupurã teypē uwerrã edji, go djuku uwerã djõrã o'o achīpurã nonga, membo uwerãngi rō ywy tachi go ita wachu cho prawowepw, go chinga ruwyllãma djapollama bue bucha, inama Jaweh.