Djawupuku 66 Apã Wachu pepywerã kainallãpe go Sion djapo pouma ekõ

1 Kowe nonga ina Apã Wachu: go ywadji cho wapy endaty, emi go ywy cho pychã wywy êndaty: mawe nõnga tapy pendje djapowerã cho bitallawã. 2 Cho ipo djapoparê kowe nõnga kowegi, go cho rupi kowe bue wywy djapopapyre, ina pendje Apã Wachu: cho wechã î reko go yma buchãgidji, go chinga djekygidji idja krei emi go ryrygidji wêndudjiwa cho djawu. 3 Tãrã go ywy llãbuwape buarã enõnga wywy keîmbyrã achipurã chuegi emi go djukabu pichape, keîmbyrã wachupurã emi go kio'obu mbegi kuêtã nõnga, keîmbyrã bakupyre emi go chuchupurã pirãwe, keipabu go bue teiwu gatu, emi go mudjãngi go duwe Apã nõngape. Gogi wywy rõ prawo êndawe dja aperã, go idja djãwãpe rõ prawo kowe bue buchã. 4 Go nõngabu emi cho parawowerã gogi wywype buarã ka djudjupyrã emi cho kawowerã gogi wywydji go bue krymballãwãngi: cho puka êndawe gogi wywy go illã djapowãngi; cho djawu êndawe goĩllã wenduwãngi, ĩ, watama eko gogi wywy djapo êndawã go bue buchãngi emi gogi djapo wyche cho chã ruwa, prawoma emi go bue wywy cho byllãndygi. 5 Go nõngabu wêndu gami Apã Wachu djawu, pendje krymballãngi, wêndu gami cho djawu. Pêndje irõndy ka chidja buãngi pendjedji go pendjiepe djapigi tokape cho bykuapyrepe, djawuma gogi wywy: Jaweh wechãmbyrã dja chidja gatu ore wechãwã pêndje ury gatu; go duwe wywy rõ ka djudjawã. 6 Djawu tãrã wendu gatuma go ekuandype, pendje Jaweh tapy wachupe ekõywadji Jaweh djawu, ekõ nõndje pepywã emi idjadji byllãngi djapowegi. 8 Ekõ nõndje go krey wata dja membywã, mêmbyma mondo etakrã kbe'e dja ei'i achy mondo nõndje. 7 Awarõ wênduare bue wywy, awarõ wechawe bue wywy. Bitaillã ko ywy rekowã etakrã kreype. Sion rõ memby opo ruwyma, dja mêmby wywy, mêmby bitallãma. 10 Ury gatu ga reko Jerusalen dji, emi ury gami idjadji, go duwe prawo gatugi wywy idjape; ury gatueche ga mõndo idjadji, duwe chinga o matãmbawegi idjadji. 11 Pyche ga reko pendje kra'a gatu pewe, emi pendje dorowã pyche rekoba (Jerusalen) Ka'ãndji pendje okryrame'e, pendjedjã'ã gatuwã, djawã wera gatuwã. 12 Go nonga ina pendje Jaweh: wechã gatugami, cho po'uma okryra idja llabu y'y wewo nonga, emi go ekuandy idja llapo go y'y wewo chidjagi nonga eruwerã pendje chupape, gobu cho kuwêmbyraã pendje wywype go ei'i djapo nonga dja memby kã tykugi, cho pendjepe rawerã cho ipo llabu emi djandu gatuwã. 13 Go ei'i okryra me'ê nonga idja mêmbype, go nonga cho kryra me'ê pendejpe, emi cho okryra me'êwerã Jerusalen chupape 15 Wechã gatu gami pendje Jaweh dji, idja ekõwerã tatawywydji, emi go idja wyrs wata wywy, wytu djere nonga, idja prandja kawowã prãndjãmpe emi biriwerã tata êndype. 16 Pendje Jaweh rõ djapiwerã tata rupi emi pê mbuku rupi, go duwe ywy llabuwa, pendje Jaweh djukawerã tãrã buchã. 17 Go djã gatupe emi go djawã kuchĩ gatugi go dja apã chã nõnga djapypyregipe buarã tyrõmbyre bychepe, gope ugi chachupurã o'o buja emi duwe bakupyre buchãngi kowegi kuichopawerã, ina pẽndje Jaweh. 18 Cho rõ kuagatu dja djapotygi wywy emi idja chawãpe ingi; wewerã go krey cho nuãmbawerã duwe djawu wywy emi duwe ekuandy; go ekõmbabu wechãwerã gogi cho krei gatu. 19 Dja wywy bychepe cho mi'i werã etakrã bue wechãmbyra, duwe kuwẽmbyrãngi etakrã bue wechãmbyra, dawe kuwẽmbyrãngi gogi wywydji, buewerã duwe ekuãndype, Tarsispe, Put emi Ludpe, wachĩ pira. Tubal emi Javánpe, go ekuandy ĩngi y ẽmbe rypype go kuallãechegi chodji emi wechallãngi cho krei gatu; gogi wywyrõ kiuwerã cho krei gatu go ekuandy bychepe. 20 Gogi wywyrõ eruwerã go pẽndje pawe wywy dawe ekuandy wywy bychepe, etakrã keĩmbyrã nõnga pẽndje Apã Wachupe buarã bepurã llabu, wyra watape, wyra ikẽndy, bepurã djacha emi camello llabu, cho kuãmbuku prawopyre Jerusalenpe, ina pẽndje Jaweh, go Israel irõndy eruwe nõnga dja keĩmbyrãn wywy baydja kuchĩmbyre dja Apã tapype. 21 Pychywerã go dja wywy bychepe pa'irãngi emi go Levi puagi wywy, ina pẽndje Jaweh. 22 Go pẽndje Jaweh djawu wyche: go ywy emi ywa wywy pou cho djapowãngi, ekõwerã krãmpĩ bechewerã, emi ekõwerã krãmpĩ bechewerã pẽndje irõndy wywy emi pẽndje bykuapyre. 23 Djachy pou wẽmbu go bue djapollãndy kreybu nuãmbawerã gogi wywy cho endape chope chã'ã mewã, ina pẽndje Jaweh. 24 We'ẽwerã gogi wywy Jerusalenpe, go wechãwerã go ywy llabuwa ikãwe chidja buawẽngi nõnga chodji; ocho wywy manollãndype, tata uwellãndygi go ywy llabuwa wechãngipe kowe bue wywy bue buchã prawollãwerã.