1 Jerusalen prawodjiwa eche cho djawu chidja reko, go wapyllãche go ikãwera wyche go bychepe bue gatu krey chapi nogagi go kuwe gatu tata endy noga. 2 Kowe noga ekuandy wywy go wechã werã wywy dje djã gatu go wywy ekuandy ymachidja wechãwã go kiu gatuwerā go nandje Apã djepe dje bykuarã pougi dja djuru rupi 3 Go īwerã Jaweheche ipope ekuady ymachidja awã gatugi go ywadjiwaty go ekuandy wywy wechawã Jaweh rekuaty ipope. 4 Djawullãwerãma cho pukabechewerã kudjã puidjiwa go dje ekuandy wembechewerã go īmbechewerã go ywy dje bykuarã cho buetygi. Emi dje ekuandy cho breko. Jaweh gatu īwerã ku dje djãwē: go dje ekuandy ywy puagi rekowerãma dja imerã. 5 Etakrã buchuwe udjawa go daregidji, go nonga dje djapoare udjawerã djedji go ime ury gatueche nonga dja brekodji gononga emi dje Rekoatygi emi ury gatuwerã djedji. 6 Jerusalen, go ekuandy tapy pecheatygi go warõndygi warõ djedji, gogi wywy wapyllãeche krey emi chãwãmbu. Gonoga emi pendje kuatygi Rekoatygidji inama go wapyeme. 7 Wapyeme wēwapewe go Jerusalen go wēngatuwã go Jerusalen djapo gami prei, gatu kowe ywy wichallabu. 8 Rekoatygi mema dja djawyu go buwebu chidjaeche rupi: cho mellãwerãma dje trigo dje byllãdygipe byllãdygi: mellãwerã chipopurã tyy. Dje tyrõ puy wachu chipo purã ekuandy. 9 Bue nuandygi go ikowerã. Gonoga pre rekowerã nandje Apã echepe. Go emi djãmi werã chipo purã lla'a, tykuwerõ emi chipopurã ty'y. 10 Wacha kua tapy djawã rupi djapeche tapy kua wywy gatu gami ekuandy ape, ape mi gatu gami ita gatu gope djono emi ekuandy buarã. 11 Meĩmbyry. Nandje Apã eche kiupyregi kowe bue'e. Ywy llabu wyche go djawu Jerusalen ekuandy wywy. Gononga gogi ekõ djepe kuwēwã dje wedjawãdjiwa go dje djapoaredjiwa i'i edji: 12 duwe wywy bykua djonombawã Israelpe ekuandy kbeigatupe. Nandje Apã eche picha nonga go bykua: Ekuandy go prawodjiwa nandje Apã eche ekuandy.