Djawupuku 61

1 Nandje rekoatygi Jaweh kriegatueche ĩ cho , llabu. Chope prawo pyrema ; chope buema djawuwã idja djawuwegatudjiwa , go bue rekollãgipe , okryrã mẽwã oachygipe emi djawuwẽrã go mbuchãbyregiwywype go ichã mondopyrã, go tapy djawãllãpua ĩmbawegi puiwerã. 2 Cho djawuwerã go Jaweh kuwẽgatudjiwa go ruy'y wẽbu idja ekuãdype, go ruy'y wẽbu nandje rekoaty Jaweh pepywerã go bue buchã djapowedjiwa , okryragatu go djaã achygi puarã 3 Go Jerusalenpua chĩgatuwype ĩgi gope mẽwerã ãwãgatu , krembo me'ẽrawe: tapia kãchigatu , chĩga rawe , tyru begatu urygatudjiwa , chĩga ruwy rawe,bykuapyrã wyra buegatu djapo , go Jaweh pechewerã gorupi wechawẽrã idja , dja'ã bypegatu 4 Go tapy wapawe djapogatupawerã emi miĩgatupawera go ekoandy wapawegi go ita kuichononga idja irondy wẽwẽrã 5 Duwe ekuãdypua warõ rekowerã pendje wachupurã wywydji emi duwe ekuãndypua pendje wechãllãdygi tyrõwerã pendje ywy tyrõadype emi chipo purã wywydji 6 Pendejepe bykuapurã Jaweh paiwywy emi pukapyrã Apã Wachu buetygi wywy. Mẽwerã pendjepe duwe ekuãdy pua bue tãrã wywy emi pendje ekõgatuwerã go llapowedji 7 Pendje cha'ã wycho endawepe pepyrekowerã pendjepe urygatu eche go llabu mẽwerã pendje llaporã bue biribucha wywy pendje urygatuwã pendje ekuãdype go kreybu wywy. 8 Cho Jaweh prowogatu bue djapo gatu. Cho byllã narõ emi kobewã , goware cho djawu mẽwerã , go kreybu wywy go djãpollãpe ekõgi emi cho pepywerã go djapogatudjiwa 9 Go dja tey rey ekõwerãgi wechãbyrã ekudypua bychepe , emi djypywaregidji kuwẽwegatuty go duwegiwy wechãbu gogi wywydji , kuagatuwerã jawehrõ gogiwywype kuwẽwegatuty 10 Cho dja'ã urygatuwerã Jawehdji, emi cho djwã urygatuechewerã go cho rekoatygi dji , chope pypyware idja kuwẽgatu djiwa tyrupe chope djuwy gatuwerã tyru chepegatu go tyrugatu udjawã nongagidi. Chope mĩgatupamadjo , go mĩgatu nonga daregi udjawãgidji, tyru biriechegi nonga. 11 Go ywy wẽgatunonga bue ã'ã pechypyre , go wyraputy ã'ã wẽ'ẽ gatu nonga , gononga, Jaweh, go yma chigja wachugi wẽgatuve rã idja bue djapo, gatu , preerekowerã ekuandy wywy bychepe.