Djawupuku 59

1 Pendje maî gatu gami, Jaweh ipo praru beche kawêwã, emi idja pycha wenduwã. 2 Go pendje bue buchã djapo rupi pendje Jaweh roma îbechema go pendje bue buchã djapowe peche roma mondo go pendje Apã Wachu chã´ã go wendullãwã pendje puka. 3 Pendje ipo pirãmbama, go pendje ipo akã bue buchã djapowedji, pendje djuru embe kaina, emi pendje kbere kiu reko bue buchã. 4 Kainama, go kabewãwãdjiwa rama pichape go djawu bowoatygi endape. Gogi wywy djawu reko emi kuareko ka djawudji, dja djêmbidjiwa, brawoma gogi wywy membyma manombawã 5 Gogi wywy membo pia´a aku roma mondo, emi gogi wywy pychyma reko go djãndu eity; go ugi dja piawedji go manombawerã, go piawe bowobu godji wewerã membo. 6 Go djãndu eitywedji tyru djapo kuallãwerã emi pypy kua bechewerã go bue dja djapowegipe, go dja djêmbidjiwa djapowegi go rupi rõ pichape reko buchã djue. 7 Dja pychã wywy myrõ paîllã bue buchã djapowã, wata bitallã ekõ nuêwã go praru gatugi pirã, go dja djãwãpe îma andjãwê djapoty; mano emi djuei buchãî dja lluawãpe. 8 Gogi wywy kua beche go okryra gatudjiwa emi go bue djapo gatuwã îmbeche gogi wywy lluawã wywy rupi. Gogi wywy lluandy rõ ape chapa buchã emi go duwegi go rupi watabu dju bechewerã okryra gatu kainallãngidjiwa. 9 Kowe bue kowegi rupi nandje rypy roma î buegatu emi nandje djapowãdjiwa, rekollã go kainallãngidjiwa; nandje warõ endawe bype go kowe chãwã wê romambu go bype endawepe, go buare nandje wata llambarã chãwãpe kowe bue buchã djapo rupi. 10 Go chãillãngi nonga nandje kuaraga reko go tapydji, emi nandje pudjepe ga ekõ go chãillã maîllãngi nonga; kreype nandje watabu nandje watabuwapima go chãwã pua nonga, nandje ekõ chãwã wachupe go manombawegi wywy nonga. 11 Nandje chinga reko go chery wachu nonga, emi nandje chinga omatã waruku nonga, nandje warõ reko go bue gatu djapowã ekõwã emi wẽllã wyche, go kuwẽmbyrã rupypeĩ nandjedji. 12 Ore ka chidja buõ djedji, go ore bue djapo buchãwe wywy djawu buchãma oredji, ore rõ kua gatuma ore ka yma chidja buã endawe djedji, emi ore kua gatu ore bue buchã djapowedjiwa. 13 Ore ka ymachidja buã, ore upiama go ore Jaweh ape puare, ore wedjama idjape; ore wenduma go ka djawa orepe reko buchãma, go kabewã ĩma ore djãwãpe. 14 Go nonga ore djapollãma go bue gatu djapowã, ore rypydji roma ĩ emi go bue kainallã djiwa djapowã, go kainallã wama go djadja llambatype, go bue gatu djapowã rypype roma ĩ. 15 Go kainallã dorobechama go rypy pua ĩmbawegi wywy, bue buchã djapowedjiwa pypyma tapy djawãpe, Jaweh ró wechãmbama emi pradjãma 16 Apã Wachu chã opoma bue wechãmbu, ĩ llãeche etakrã djepe kuwẽ djue go tapy djawãllãpe pypypyregipe, go buare idja djywa chidja gatudji chidjama mondo gogi wywype. 17 Idja pypyma mondo djã gatupe go pane, pecheaty nonga bue krerepe, go dja tõ'õdji mima kuwẽgatu, go dja tõ'õdjiwaty nonga bue krere rekopyty, pypyma bue pepywãdjiwa tyrupe, go eche pecheaty nonga, go djã achy buchãpe tyru puka wachu dja eche djiwaty nonga. 18 Apã Wachu pepypawerã etakrã wywype dja bue buchã djapopawedjiwa, go djapopyty nonga djapoma wechãmbyrã prandjãma mondo dja byllãndygipe, emi idja pachowerã go idjape ka chidja buãmbawegi wywype, go tapy tãrã pua go ekuãndygi wywy go ypurã embedji, pepypawerã emi dja bue buchã djapopawedjiwa. 19 Go krey waty rekuaty ekuãndygi wywy krỹmballã rekowerã Jaweh bykuapyredji, go krey wẽndy rekuaty ekuãndygi wywy, chã opopawerã wechãmbu chã bype chidja gatuechegi. Go Jaweh krei Gatu wytu nonga pendjapa roma mondo gogi wywype, go wytu chidja buchã pendjawe nonga rupi. 20 Apã Wachu ekõwerã Sionpe kuwẽwã go dja bue buchã djapopawedjiwa, bue bucha djapo djuellãmbu go nonga inama Israel Rekuatygi. 21 Kowe djawu cho mewegi wẽwerã wyche, inama pendje Jaweh: Cho Krei Gatu ĩma dje llabu, go cho djawuwe cho mĩ endawe dje djurupe, go ĩwerã dje djurupe emi dje tey wywy djurupe, inama pendje Jaweh, Kowe Kreybu emi krey krapĩ pewe.