1 Puka chidja mondo dje kuetã rupi, djawullãeme: puka chidja mondo mimby nonga, kiu mondo cho chupe djembidjiwa Jacóbo tapy pua bue buchã. 2 Gorãwe gogi wywy chope kuara reko, go kuadje cho ape dja lluãwã, go kua gatugi nonga, chodji emi wedjallã nonga Apã wachu djawu mewegi: Puka chope cho kuwewã gogi wywype go warõ reko Apã wachupe ĩwã dja bychepe. 3 Gogi ina: Buerã ore bue ullãcherã go kua djuellãmbu oredji, buerã ore chã wychocherã go orepe kuẽllãbu: meĩ gatu, go krey pendje bue ullãdjiwa bua'ã djapowã go pendje djapoty nonga go pendje reko buchãwã go tyrõandygipe bita puywã. 4 Maĩ, gatu, go bue ullã kreype pendje edji djaka pachowãemi edji djueiwã, gononga bue ullã ko webu, gononga bue ullã rupi wendullawerã ywadji. 5 Cho ury ko gonõnga bue ullãdji, edji djuei reko go chã wycho wyra o praru nõnga, pypy tyru buchãgi go krembope wapy, go pendje ina bue ullãdji, go kreyrõ ury gatu Jaweh puarã. 6 Go bue ullã cho prawogirõ kowe nonga: Bue buchã wedja ga mondo, djura mondo go ichã chĩga djekyllã djiwa, pui mondo go bue puywachuty go kio mondo achĩpurã rupy djiwatygi duwegi pendje miwe picha djatadji. 7 Memondo bakupyre llellãgipe, go bue rekollãgipe memõndo dja ike endarã dje tapype, pypy mõndo tyru go eche pechewã emi kuwẽ gatu reko pichadji. 8 Gonongabu dje bype gatu chapiwerã krey wẽ nonga, pendje eche buchãndygi kãdjãbawerã go bue gatudjiwa owerã pendje chã ruwa go Jaweh bype chidja gatuechegi ĩwerã dje kuerewepe. 9 Gorupiwe pendje pukawerã Jawehpe go puka pepywerã, pendje puka omatãwerã, go ina werã; kowepe cho ĩ, go buare ka reko buchãeme pichadji, ka paroeme pichape go pendje djawu chidja rupi. 10 Go bakupyre mẽga mõndo go llellã buchãgipe, emi kra gotu ga djono go okryrallãpe ekõgi, gononga pendje bype chapi werã go chawãpe, go dje chawãrõ krey buche nonga. 11 Jaweh gorãwẽ pendjepe matã rekowerã emi pendjepe kra gatu djono werã go pendje ywy buchãmbu djepe gorõ mewẽrã pendje eche chidjawã pendjerõ ekõwerã ka gatugi ywy piry gatu nonga kreybu wywy, go y upu krãpĩllãgi nonga, typa bechewerã. 12 Pendje puã mĩverã wyche go ytypapyregi, go djypywaregi tapywe peche gatu djonowerã pendje bykuapyrerõ: Djãwã peche atygi emi ape mi gatuatygi. 13 Dje djono gatu bu go bue djapo llãndy kreype dje tyrõllãmbu go bue djapollãndy kreyrõ praru gatueche Jaweh puarã emi wata pukullãmbu, emi go dje bue pepyllãmbu emi ka kiueme ka djaweme, kua'a reko go bue djapo llãndy kreype. 14 Dje ury gatueche werã Jaweh dji: cho djepe upi tawerã go ywy kmamby llabu, cho mẽwerã bue uwã go dje ãpa Jacóbo llapo: gononga inama Jaweh djuru rupi djawuma.