1 go dja gatu manobu īllãwerã oachywãngi idjadji go prawogi Apã Wachupe manoma īllã go duwegi idjadji kua gatuwã idja dja gatu rupi djuka endawe gogi wywype. 2 Okryra gatupe romo ī ikē gatu rama ī idja ikēãndype, go kua gatu rekotygi Apã Wachudji. 3 Pendje rõ wēmabu kowepe pendje rõ go kudjã krei buchã djiwa bitatygi memby wywy go kbe'e go kudjã djãwechegi irõndy wywy awadji rõ pendje djudja endawe 4 awadji rõ pendje djuru embetywa endawe emi pendje kbere nuembyre pendje ko go ka chidja buãndygi kowe krewagi go kainagi wywy 5 pendje rõ ka meno urygi wyra terebinto wydji emi duwe wyra akãwachu wydji, pendje rõ keīma mondo pendje tey wywype go kuã buku wywy pewope, go y wē gatugi go ita wachu pewo puagipe. 6 dje Israel kua rekoma go ita prechã gatugidji dje go y'y wewogipe, go rõ djepe mewãdjiwa bue rekowã dje prawopyregi go ita puarã rõ dje nuema go chipo purã lla'a ty'y dje keīmbyre nonga dje keīma mondo emi duwe keīmbyre wywy cho pachollawerã kura pendje bue djapowedjiwa. 7 Go kuã ywa puku llambnu dje djanoma dje ikēandygi, gope emi dje djupima o we keīwã. 8 Go dje tapy djãwa ikē djoãndy toka embe djawē dje mima go dje rekoatygi chã nonga, chodji dje kuallãma gobu dje tyru buima mondo djenowã go duwegidji dje ikēandy begatugipe, dje butadji pychyma idjãpe dje maīma reko dje rekoatygi chã nongagidji 9 Dje oma go rekoatygi Melec endape dje rama tãpia emi bue teiwu gatu echegi idja puarã, rypype dje buema mondo go djawu ratygipe dje kuawa ma nonga rõ dje kua gatu rekowã duwe rekoatygipe emi ma nonga rõ dje wedjywã go manoandygi llãmbatype 10 dje bua buchãbu djepe dje ape puku rupi watabu dje ka djawullã endawe: cho pukallãwerã dje taīllã gatu rekoma emi, dje djã rõ prarullãeche. 11 Awa i rõ djepe paroare dje krymballãwe chadji kua gatullãwã emi dje kua reko djuellama chodji, go krapipe dje wedjaechema mondo chope. Go krey nandjeche buare cho djawullãeche ēdawe go buare rõ dje krymbaeche reko chodji. 12 Kowebu rõ cho djapowerã wechãmbyrã djepe emi bue dje djapopawedji, dje djawã emi dje bue djapopawegi, go dje chidja rõ djepe kuwēllãechewerã 13 Mawebu dje puka rekobu djepe puka omatãpe go dje rekoaty kabewãgi chã nongagipe djepe kuwēwã, dje maī gatuwerã djepe kuwēbechewerã, go wytu rõ emi rapawerã, go wytu pedju rekobu rõ djapipawerã, go chodji kua rekogipe rõ membyrã idjape ywy idja llapoecherã, emi cho llapo kuã buku wedja mi getupyrema mewerãma emi gogi wywype idja llapoecherã. 14 Gobu Apã wachu ina: Djapo gami emi buwy gami, Pei'i go ape, matã mondo cho chupa puagi ape pua goidja go ape wapiatygi. 15 Go nonga ina go ywaechewatygi, go chidjaechegi gorãwe dja wapyatygipe dja bykuapyre rõ djã gatugi: cho chidja rõ ywadjiwaty emi cho ekõ go gua buchãgi emi okryrallãngi djãwe, cho krymba mewã go gua buchãngipe emi ka chidja buãllãgipe 16 Cho prãdjãllawerã go rãwe emi cho pachollãwera go rãwe kreybu wywy, go nongallãmbu djã okryrallãbechewerã emi ache wywy ywy llabuwã okryrallãbechewerã, gogipe cho rõ mē'ē manollã wã. 17 Israel rõ prãndjã emi ka chidja go ware cho prãndjãma, go ware cho byllãma idjadji, cho prãndjãma, go ware cho chã'ã pechema; Israel rõ wata ekõ djã buchã rupi, idja rõ prawowe 18 Cho wēchã gatu dja ape wywy; go nongabu djepe cho kuwēdjue kowebu idjape emi wata mondorã idjape emi cho mēwerã okryra gatu emi g uryllãngipe. 19 Cho idjape pre'e mondowerã: okryra gatu, okryra gatu cho mēdjue go rypype emi rypyllã ingipe, ina Jaweh; emi cho kuwēwērã cho chupa puagipe. 20 Go byllãngi go rõ ypurã wachu prãndjã nonga, go wytu pedju chidja buchã nonga djawu ury emi dja y'y puã rõma bue bra'a emi mõ'õ. 21 Byllãngi djãwãpe ῖllã okryra gatu, ina pendje Apã Wachu