Djawupuku 55

1 Ache wywy y wema, ekõbamodo y'ebedji, go butarekollangi wywy ekõ rawã bue'ã'ã upyrãgi. Pedjẽ bu'eutygi buepepylla go djepe ka mebyrã go chipopura ty'y go kã ty'y. 2 Buerã pedje purudjue buta bue wikytãlladjyi go emi pedje bapo tãrã djiwa. Wedugatugami go upyrã pedjẽ urygatupe ugatugamodo. 3 Wedjapa gamodo pedje cho edape ekõwa go pedje djã'ã ekõgatuwerã go mudjã etakrãpe gorãwẽ gonoga cho kabewalla emi cho hĩgadje ky emi djawu djawupyregi Dawidpe. 4 Kuagatugamodo, cho pukawe go mibyre gogi mechãregi noga ymachidjagi go kiuatygi chupakua wywy puarã yma chidja. 5 Mai gatu, dje pukapawerã go chupakua kuallãdygi, go mynobawerã dje rekuaty go chope kuallagi go Apã Wachu pedje rekoatyygi prawo gatu ware. 6 Kuaragareko Jawepe, go wẽbyrã wyche gogidji, pedje pukagamodo gogi rypyllabudjepe pedje djawẽ. 7 Go djã buchãgi wedjapagamodo bue buchã, go djapotygi, Wedjagamodo djapipagamodo bue buchã go kuatygi go ollawerãma gogi Jaweh, go chĩgadjekywerã emi kuwewerã gogi wywype. 8 Cho kuatygirõ duwegi kuatygi nogalla go pẽdje ape wywy gonogalla go hoga Jajawe ina 9 Go ywa pukueche nonga go ywydji, go nonga cho ape wywy ywa pukueche, pendje ape wywydji cho tốpe kuaty nonga, go pendje tốpekuaty wywydji. 10 Go baky emi pya'tywe waty nonga ywadji ware, wallãma ywadji ware, pendje ywy piri gatuwã, bueã'ã pechepyre wêmbawã emi yma gatuwã go bueã'ã pechepyregi, go ywy tyrõandygi rekomã dja bue u rekowã. 11 Go nongaeche emi cho djawu, cho djuru rupi cho djawuwugi, ekõ bechewerãma cho endape djopollãmbu cho inawe nonga, go wemba pewe go cho inanmbawe wywy. 12 cho kabellãwerã, ury gatupe emi djã ury gatuechepe pendje owerã, emi okryra gatupe pendje djewypawerã; go ita kwãbuku emi ita kwã, emi go wyra ka'a pwatygi wywy ipo pachopa rekowerã. 13 go achî buchã endawepe îwerã go wyra Cipres, gollãrã ypigi endawepw ymawerã go mirto (arrajon) kowe bue rupi mundjãma Jawehpe, ko idjaiwerã go rawe îwerã wechã rekopyrã