Djawupuku 54: Apã Wachu prowo Israel Puarã

1 Ury ga mondo dje membyllãngi dje mēbyllanpe dje ekõgi, preega mondo puka emi urygatupe dje mēby rekollã wyche buerã, kudjã wedjapyregi wywy memby tãrã rēkowerã kūdjã udjagidji. 2 Tapy namina wachu djapo ga mondo bue pirewedji. Tyru kryrallã mimba ga mondo dje tapy djawãpe. Dje kawãime ga mondo, dje tapy puku wachu ga mondo bue pirewedjiwa ichã wywy wyra tykõmbyre wyko puku ga mondo. 3 Dje irõndy tãrãwerã emi dje llachu rekuaty; dje irõndy wywype mēwerã chupa pua llapo go wywy ekõwerã go chupa duwe ekõ endawepe. 4 Dje kryballãeme, djepe wedjallãwerã dje chã teychewã. Dje chã teychellãwerã, dje kuallãwerā dje kbuchuwe dje chã teychewedji, go dje chã teychewe dje ime rekollãware nonga. 5 Dje djapoare rõ dje ime, Jaweh chidjaechegi dja re bykuapy ywadjiwa Rekoatygi; Israel Rekoatygi djã gatugi rõ djepe pepyare, kowe ywy wachu rõ nandje Rekoatygi llapo. 6 Dje Rekuatygi djepe pukabu dje ekõ endawe kudjã dja ime wedjawe nonga go uryllã nonga dja kreipe. Dja ime kuallãwerã ko dja breko rekopywegidji, ina dje Rekoatygi Apã Wachu. 7 Cho wedja prowi endawe djepe, gobu cho eruwerã go, dje wechãwerã cho prawo gatu djepe. 8 Cho chã'ã djemi prowi djedji cho prãndjãware djeji. Kowebu cho chingadjeky reko, ina go Rekoatygi, dje kuweãdygi. 9 Noepe wēbyre nonga, cho me'ē cho djawu gogi wywype, ype cho pechellãwerãmã ko ywy wachu; go nonga cho me'ē cho djawu, cho prãndjãllãma djedji, cho pachollãwerã djepe, 10 Ita kuambuku ichakrãngi kuerapabu djepe, ita kuambuku ryrypabu djepe cho prawo gatu rõ wedjallãwerã djepe, cho djawu mewe djepe krãmpillãwerã, ina go Rekoatygi djepe chingadjeky rekotygi. 11 Llu, llu, go oachygi! Dje uryllãngi go prawollãmbytygi, kowebu cho djepe wapy miwerã ita wera tuwy bychepe. 12 Dje tapy djawã mini cho djapowerã ita wera pirãndji, dje tapy djawã pekatygi ita wera tuwydji, dje tapy bue mamabyre ywa wachu ita wera biribuchãndji. 13 Go dje tey wywy ekõwerã go Rekuatygi djawu kiuatygi, go okryra gatu tãrã o werã gogi wywy puarã. 14 Bue djapo gatupe djepe puãbyrã, djepe biribechewerãwa dje rekollãwerã krymballã, ryry buchã djepe wēllawēra. 15 Djepe buãmbu gogi wywy, kua gatu ga mondo, wēllãwe cho dja'ã go ka chidjagi djedji wawerã dje chã ruwa. 16 Mai gatu, cho rõ djapoare beta krere djapoatygi, dja pedju reko tata endywã djapowã dja llapora bue kreregi tõ mmubu puarãgi go nonga cho djapo emi djuei djapoaregipe, djueidjapowã emi. 17 Ĩllãwerã tõ mubuatygi puruatygi djepe bue buchã djapowã go djuru djawu buchãbu djedji dje wēndullãwerã, kowe rõ pendje Rekoatygi djapo buetygi wywype cho me gatu pyre gogi wywy djiwa