Djawupuku 53

1 Awarõ wenduwerã are djawu, awaperõ wechãredjiwa Apã wachu chidja. 2 Go wyra wa pawegi nonga, go rupi wē werã go wyra apadji pauwerã ywy bedjupe, idja begatullã emi idja rekullã idjadji bue gatu nandje wechãwã idjadji, go idja chã´ã emi ioja eche emi, îllã go begatu nadje prawaty nonga 3 Go ache wywy chã teycheidjape. Go idja irondy wywy wedjapama mondo. Idja etakrãecherõ kebe´e o achype ekuandygi; gogi wywy wechãllãetema idjape, go buare ache wywy wechãllaete idjape, nadje emi djapima idjape. 4 Idja rapama nandje o achype ekuawêngi. Idja wachama emi nadje djã´ã praru nongabu; nadje kuara reko buerã Apã Wachu wedja idjapa, idjape pachoma idja îgatullã . 5 Kutuma idjape nadje bue buchã djapo pawegi rupi, emi pachoma buchãwe idjape, idja djã´ã buchawê nonga me ware nadje endawepe, Apã wachu pachoma idjape nadje îwa djã´ã okryra gatu, idjape katuwe rupi nadje rawe õ achyllãma. 6 Nandje îwe go wachupurã kãdjãwegi nonga, dje kua´a buerõ dje aperã, go Apã wachu miwerã idjallabu nadje buebuchã djiwa. 7 Idjape wedjãllã pacha buchã reko idjape, idja pekallãechema idja djuru, go wachupurã ray nonga rama djukawa idjape ija djawullãeche emi, go wachu purã îwe nonga idja a´a kichiwã idja djawullaechema. 8 Go idjape kawama, gobu idjape mîma buchã djapotygi nonga, gogi wywy bychepe, awarõ ekõwerãgi kawenonga. Gobu idjape djukama ywy llabuwa îngi chupapua djawã buchã buare djiwa. 9 Gogi wywy djukama idjape go bue buchã djapoty nonga bychepe, go idja echewe monowe djonoma go buta tãrã bychepe, idja djapollã bue buchãngi, emi idja kainallã nadjepe. 10 Go nadje Apã wachu yrugatuma idja te´y kebe´e praru gatu, tãrã idja wacha o achype go wêkreimbyre nonga rupi, idja djã´ã gatu buare idja wema go ache wywype. Idja wechãwerã idja irondype go rypywerã idja wachawã, go Apã wachu rupi ekawerã. 11 Go idja dja´ã oachy wachapabu, idja wechãwerã go idjamapo ma´a gatu werã, idja urywerã go wê keîbyregatu rupi. Idja, go krei gatugi, idja kuwewã go ache wywype djã´a buchai buare, idjarã, rawerã go ape rupi. 12 Go buare Apã wachu mîwerã idjape go ymachidja wachugi bychepe, go chidja echegidji bawo werã, go idja wachapawegi nonga, idja mema idja eche gobu monoma, idjarõ rapawe go ache wywy djã´ã buchãngi. Idja Krãndo buãbu djepe go djã,ã buchãngi wywydji.