Djawupuku 51 Djawu gatu me'êatygi Siónpe

1 Penje wendugami, pendje wa ãwa pedje ekõwa bue djapogatu pyredji krapity go dje kuaradjepe Apãwachupe; wechã gatu êko go ita wachudji penje mbowowe djiwa, go ita djãwa puare go pendje matãregi. 2 Wechã gotuekõ pendje Apã Abraham go pendje ai'i Sara djiwa, gorõ chingo ruwymadja membymanodjebu chorõ pukawe idjape, dja etãkrãiche ekõ, cho dje kuwewa djepe djerõ tãrã werã. 3 Gonongaeche penje Apãwachueche go djã okryra gatu Siónpe, cho chinga djekyrekowerã bu, e inawegipe go ywy imbechegi cho djapowerã Eden, emi djõ wachu Apã wachu djapowera ywy tyrõandy mbegatu; go djawãpe î ury, gatu, urygotueche, go pre'e emi kuaã gatu emi. 4 Pendje cho enkuandy pua, wendu gatu chodji, cho djiga wendu gatu; Chodjirõ we'êwerã djapopyregi emi bue djápogatu go djapo gatuwerã dja enkuandy wywype. 5 Ekõ ruwyma cho bue gatu djapowãgi, ekõma cho kuwêwerã, cho djywa wachu perõ cho djawumewegi cho enkuandypua wywype; go emi y êmbedjiwa ekuondy chope warõ, cho djywa chidja wachu djiwa miwera emi chope kuawã. 6 Maigo reko ywadji wywy emi maiga reko ywydji; Emi ywadjiwa Krapimbata go tata tachi krapiwê nongo, emi go ywy mbucha'wera emi mbuchãeche werã go tyru nodjewaregi, emi go ywypua wywy go mono werã go mberu nonga, cho kuwewerã, gorãwe îwerã wyche go cho bue djapo gatu krãpi bedjewerã. 7 Djape wendu gami, pendje kua'a wyche buedjapogatu; go enkuandypua go dja'ãpe î djawu ina byre. Emi krymballaime go ywypua djaka buchãmbu, emi pendje djã'a prorueme gogi wywy prãnja djuembu penje wywype. 8 Go mbeky (polilla) u nonga go tyru emi go mbikina u nonga emi wachupurã a'awe, gorõ duwe wywy krãpi werã; cho bue djapogatu ekõwã krapimbechewerã ekõta emi ywy llambuwa dja djypyware krãpieche pewe. 9 Puagami, ore Apã, puami, pyrugami dje chidja, puã go krey wacha pyre nonga, ore irãndywe go ekõwe wywy nonga. Djerõ go Rahab mondowe, emi go membo wachu pychoare. 10 Djerô go dje krãpiare emi go y wachu êmbedji go dje djapo emi ape emi go wywy wachawa go dje nuewe djiwa go djue wachu puare. 11 Go nogoeche emi nandje Apã Wachu nongaichegi ekowera wyche prewãgi: Siónoe, dja djuru rupi kua'a gatuwã nandje Apã Wachupe, ury emi ury gotueche idja wywydji owerã, achy emitue'ê kãndja mbawerã go djiwa wywy. 12 Cho, cho rõ emi, pedjepe bue gatu. bue rõ dje krymballãwe go ywypua wywy manowedjiwa, go dja îrõndy wywy nonga rõ djorã nonga. 13 Go dje kuallã Apã Wachupe, go dje djapoaregi, go djapopawegi ywadji emi mingatu kowe ywy wachu. Gorãwe go kre'ybu dje krymba llãwe go emi mbiri mbuchã go dja prãdjãmbu, dje krãpimbawã. Go matyrõ enda go biri mbuchãgi dja prãdjawe djiwa. 14 Tãkuãwerã emi go muchãmbyredji gorã mano mbeche werã go wedjuwegi go monowe ekuandype, go dja upyrã embywerã. 15 chorõ penje Apã, cho prandjãwe go y wachu emi parãwachuwe go y pu'ãwe, cho,dje Apã, cho mbykuapyre ywadjiwa rekuatygi Apã. 16 Go dje djurupe cho miwerã cho djawu, cho kuwe werã cho ipodjiwe, cho pouwêra emi ywa emi cho wapywerã kowe ywy dja pychã djãwe, go cho djawu Siónpe: Djerõgo cho êkuandypua. 17 Upa, upa, pu'ãga dje Jerusalen, go Apã Wachu ipo djiwa dje tykuwã go prãdja, pua dja mbydja kytãpe; idjarõ djepe tykuwerã dja mbydja kytãpe dje mokõmbawerã. 18 Gogi wywy jerusalen te'y, wywy go mbychepua illã duwe bue gatu kua'agi; go dje memby wywy go dje ymawedjiware go mbychepe go illã etãkrãeche djepe go djepe watawãgi. 19 Mirõ bue mbudjãgi djepe wêma: Apedji go okryrallã mbuchãma, cho chiga ruwy emi pêakua puku. Awarõ chiga djekywerã djedjiwe awarõ ragatuwerã djepe. 20 Dje te'y wywy djã'ã praruwera go po'uwerã emigo ape go wacha pytywe rupi, go wachu tykõ kawãwe nongo, nadje Apã prandja pendjepe pytyma, gogi prandja wegi pendjepe pochoma. 21 Goburõ wendugami, kowebu kowe bue'e kowegi, dje chinga djekywe, dje mokõwegi duwe ytatape. 22 Gonongarõ ina dje Apã Wachu, dje rekuatygi, go temumbuaty go dja chupa kuwewã: kowepe î, matãwerã dje pondiwa go mbydja kytã go djepa wacha mbuchãwe, cho mbydja kytã prãndjãpua go djiwa dja ytykumbechewerãmo gorãwe. 23 Go miwerã go mbydja kytã go dje wacha djuei mbuchã ipo djiwa, go inawedjiwa wywy dje djã'ãpe: waga mondo ywepe ore wachawerã dje llambu. Go dje po'awe wywy go ywydji, apewe nonga, go wachapyrã duwe dje llambu.