Djawupuku 5

Chipopurã lla'a gatullãgi 1 Cho prewerã ẽtakrã pre'e cho bygatutygipe puarã go idja chipopurãdji cho bygatutygi chipo purã llambaty ĩ endawe ywy gatuechepe îma go kuãmbuku ẽmbe djawê . 2 Matambama mondo go ita. Wyko gatuwã ywy pechewã go chipopurã akã prawopyregi chipo purã llambaty bychepe puãma mondo ẽtakrã tapy ywa puku djapoma mondo emi chipopurã lla ty'y djamiwã, go warõ reko lla'a gatuwã go llabu go lla'a rõ iro. 3 Kowebu pendje Jerusalen emi Judapua pendje djawu puy wachu gumi kiu gami awã rõ djapo gatu cho ko chipo purã ko. 4 Mawe nonga rõ djaporekowã wychego chochipo purã pechepyregidji go cho djapollã endawe idjadji ma nonga rupi rõ ẽkoma chipopurã lla'a iro cho warõ rekoty go chipo purã lla'a êgatuwã. 5 Cho ĩndawerã pendjepe bue rõ cho djapowerã cho purãdji cho djapowerã cho chipopurãdji cho itypawerã go tyko mamambyregy, mi buchãmbawã cho matãwerã go achî îngi idja ruwa wywy pyrõmbawã godji. 6 Cho bue Krapîwerãma idja akãdji mondobechewerãma emi wykollãwerãma idja apodji gope djorã buchãwerã emi achî go baky reipe cho inawerã gogi llamû bakyllawã. 7 Go nongaeche, go Israel êkoãndy go rekogatygi chidjaeche chipopurã pechepyregi llamety nonga go kbe'e wywy Juda pua rõ. Wyra pechepyregi prawomimbyregi nonga Jaweh warõ reko bue gatu djapowã gope romã î djã pradjã warõ reko okryrawachiwa gope wênduma idja djawãpe tuê omatã. 8 Tuu! pendje noãmbygi tapy tãrã edjawe. Tuu! Pendje kawãgi pendje ywy tyrõmbyre pendje kawãmbapewe pendje llapo go ywy kowe tapytãrãpe. 9 Cho pychape wema Jaweh djawy inambu: cho kainallãwerã tãrã tapy kuichopawerã kbeigatu emi naina wachubu djepe. 10 Woubu djepe 2.5 hectaria chipopurã embeche roma etakrã chipopurã baydja, (22) mirõ mirố litro, emi pechembu djepe (220) mirõ mirõ tapa kilo trigo wouma (22) mirõ mirõ kilo. 11 Tuu! pendje ikewe puãbu kuentuwybu tykuwa chipurã lla ty'y go krey wychopewe, chã watabu chãwata wyche. 12 Bakupyre wachu rekabu wendu reko wyraparã emi wyraparawachudji, mymby wmmi bue parãdji, kuallã Jaweh djapowedji, bue wechãmbabu djepe kuallã dja ipope djapopyredji. 13 Go buare cho irõndy wywy tõ gatullã cuare rama muchãmbyre duwe tapytãrãpe emi gope ymachidjagi wywy llellãwerã emi tapbuhaytãrã wywy ywe buchãwerã. 14 Go buare manowegi endaty peka wachuwerãdja djuru mokõwã Sion pua yamchidjagi wywy tapytãrãpuagi ekõgi urype emi bue para wachupe. 15 Gobu Jaweh chidja mondollãwerã tapytãrã wywy, djapi mondopyrã ywepe emi chã wychowerã ka chidjagipe. 16 Jawehpe iro ache wywykua rekowerã 17 Gope kra gatuwerã wachupurã tey wywy djorãpe ĩ nonga emi ĩllãmbechewerã kyrawerã bechepe wywy. 18 Tuu! pendje muchãbyre nongagi bue buchã djapowe wyrawatadji kua bitallãwa. 19 Pendje ĩnagi: Bitaemegabu bitallãpe idja djapowã dja djapoty, wechãwã dja djapoty; emi we ga mondo go djã gatugi djakuadjiwe Israel tapytãrãpe, nandje kua gatuwã idja ĩ. 20 Tuu! Pendje ĩnandi bue buchã rõ bue gatu; go chãwãdji rõ pendje ina bype gatu; go bue irongidji pendje ĩna e gatu; emi bue engatugidji pendje ina iro buchã. 21 Tuu! Pendje rõ kua pendje kuãgatu kura emi pendje tõ gatu kura. 22 Tuu! Pendje krymbaechegi tykuwa chipopurãlla ty'y emi pendje kbe'e tãkuã budjapawã bue wywy chãwatagidjiwa. 23 Tuu! Pendje puimaprãdjagipe me buare pendjepe bue pepy emi go dja gatugipe pendje pypyma tapy djãwallãpe. 24 Pendje wedjaware Jaweh djawy membyre emi idja djawu gatu, pendje djueiwerã, go tata endy keĩpanonga bue ã'ã pechepyre emi djorã piandjã; pendje chuepurãwerã go wyra apo chãkã nonga emi gabu pendje kandjambawerã go kandjãmbawe nonga duwe rekoaty go wyra putywe. 25 Kowe bue rupi Jaweh prãdjãma dja tapytãrã wywydji, emi dja ipo mima pachowã gogipe wywy. Go kuãmbuku kuera paroma. Go manombawe echewe ytypapyre ape tupi bue adju buchã nonga gonongabu djepe prãdjãllã krampĩllã dja ipo upi wychereko. 26 Dja puãwerã kuwewã tapytãrã puagi wywy ĩngi rypy rekoaty puarã, dja chewiwerã go ĩngi ywy krãmpipewe ekõ bitallãwa. 27 Idja bychepe wywy djullãwerã guagi emi wapigi; ĩllã ikempiygi emi ikellãwerãngi; go wywydji djurallãwerã idja krytadjiwatygi emi ochollãwerã goagi wywy pychãmbire ichã. 28 Idja wachĩ wywy akua gatu, idja rapa ichã nakua gatu, dja bepurã pychã krere ita nongaemi dja wyrawata pychã were wyty wachu nonga. 29 Krõrõ djuku kudjã nonga, go djuku tey nonga krõrõma aypã roma dja ã'ã biriwã dja bue uwãdji, rawerã krymballãpe, illãwerã matãwa dja djury puare. 30 Go kreype pãmbuwachuwerã go llambu ypurã wachu prãdjã pambu wachu nonga; go wechãmbu tapytãrãdji wechãma chãwã wachu go kryballã meandygi nãma go ywy, go bakyrei chãwã wachu, chãwãma mondo go bype.