1 Wendu gami, pendje duwe rekuatywa y djawẽ ĩngi go pendje duwe rekuatywagi wendu gatuikõ. Apã Wachu oukawe cho ai'i kra'ape imbu, cho bykuapyredji idja kua. 2 Cho djuru rupi idja djapoma kychi akua gatu nonga, idja ipo rupi chope pechety, djapoma chodji wachĩ aka gatu nonga, chope pypyma idja endatype; 3 Inama chope: dje, Israel, cho buetygi, dje rupi ache wywy chope prewerã. 4 Go cho djawama cho djãechedji: tãrãma cho bita, ka bapu, kadji djo gua'a; cho eche ima Apã Wachu ipope, go cho djapopawe ĩ Apã Wachu djãwẽ. 5 Kowebu Apã Wachu djawuma chodji, idja rõ matãre cho ai'i kra'a puare cho ĩwã idja buetygirã; matãwerã Jacóbo idja enduwepe, noãwerã Israel wywy idja ekoãndype idja llaporã, cho rõ ingatubu Apã Wachu chã ruwa idja rõ chope me'ẽ chidjagatugi. 6 Inama chope: cho prawollãwerã djepe cho buetygirã, cho puka pua ga mondo Jacóbo irõndy wywy, kuwe gatu ga mondo Israel ichakrã ĩwegi;ra ga mondo go cho chãpe duwe rekuaty kuwẽ ekuandy wywy ywy krãpĩ pewe. 7 Kowe nonga rõ Apã Wachu ina: Israel kuweandygi, go kbeigatugi, duwe rekuatywagi wywy prawollã emi kuwellãma idjape, idja rõ ekõwerã ymachidja birima achygi wydji, gobu mirõrã: gobu puãmbawerã idja chã ruwa gobu ymachidjagi wywy wawerã idja chã ruwa, Apã Wachu chã ruwa; Israel rekoatygi djapowerã idja inawegi wywy, idja rõ ekoãwe emi idja rõ prawowe djepe prawowe idja puarã 8 Pendje Apã rõ inawe: cho wenduwerã penje prãwo ekombu go krebu, cho rõ kuwewerã go puy wachu ekõmbu; cho kuawewerã djepe, go cho mimagatuma ingatuwã djerupi cho djawu mewe kowe duwe ekoandy wywype. Puãwerã kowe ekoandy emi bowowerã idja ywy Wãchu ĩllãwegipe. 9 Dje inawe go muchãhapyregi wywype: We'ẽ: go ekongi chãwãpe ina mondo: Wẽwẽrã penje puarã kuwẽwẽrãngi. Gogi wywy apepe imbagi djuwerã idja uwã emi go ywy gatu ĩwerã idja wywy bapogatuwã. 10 Llellã bechewerã emi y tyku bechewerã, go krey akabu keipa bechewerã go krey akudjiwa; go kuwẽ gatugi idjape wywy kuwewerã idja wywype rawã go y upuwegi begatugipe. 11 Cho ywy kuambaku ape miwerã, go cho ape rõ ywa werã. 12 Wechã ga tuikõ, ĩ wengi ape budjakra puare, ĩwerã ekõngi Nórte rekuatywa go krey warekuaty emi ekowerã Sinim rekuatywagi ( ¿china rekuatywa? ). 13 Penje ywadjiwa pre mondo, dje ywy ury gatugamondo, pendje ywy kuambuku pre chidja ga mondo, Apã Wachu ury gatu me'ẽ idja chupadji, go kuwẽma reko djai buchãpe wachagipe. 14 Kowenonga rõ Sion ina: Apã Wachu rõ chope wedjama, emi go ywadjiwa chidjagi kua bechema chodji. 15 Kuallã bechewerã ko etakrã kudja idja memby kã tykugidji? Kuwẽ bechawerã idja memby dja krapuare? Go idja ai'i kuallãbu, cho rõ djepe wedjallãwerã. 16 Kua gatugamondo, cho ipochepe djapowe djepe; go dje mamabyre ywadji rõ ĩ cho chã ruwa. 17 Dje memby wywy ekõ bawerã; go djepe djapobuchãndji emi djapowe myrõbawerã. 18 Maĩ gatu gamondo dje ruwa ĩngi wywype; dje memby noa'ãma, ekoma ĩwã dje djãwẽ. Kainallãwerã, cho echedji, inama Apã chidjagi, pypywerã tyru gatugipe; go dje miwerã kryta muchãndygipe go daregi udja wagidjiwa. 19 Dje chupa ywy buchãba, ichakramba emi buchãeche, go dje tey noa'ãngi rõ biripawerã, tarãllã go endarã, go dje chupa buchãbyregi rõ budjakrãma o. 20 Go dje memby krãwegi inawerã dje nambipe; kowe ywy ichakrãma are puarã; amaty kua, ore ekowerã kowepe. 21 Go dje Sion inawera dje djãwe'echepe: Awa rõ memby werã cho puarã kowebu. Cho membyllã cho ekõ etakrãeche, cho ekoma bue djapollãngi nonga, chupa puare djapiwe nonga; awarõ kuwewẽ kowegi cho puarã. Maty rõ ĩ gogi wywy. 22 Kowe nonga ina Rekoatygi, go chidjaechegi: wechã gatuikõ, cho pou'uwerã cho ipo kowe ekuandy wywype, go puarã upiwera tyra wewegi; gogi wywy eruwerã dje memby kbe'e wywy idja ipo llabu, go dje memby kuadjã wywype idja eche llabu. 23 Ymachidjagi rõ kuwewerã dje memby wywydji, go ymachidja breko rõ idjadjiwarã; kmarãwerã dje puarã, go werewerã dje pychã ywy kui ingi dje pychã djiware; kuagamondo cho rõ dje Apã, go chodji kuagatugi chã teychebechewerã. 24 Ĩ matawãgi go kbe'e chidjagi ipo puare bue biribuchãgi, matãwerã ko go ymachidja bue tãrã tãngi idja chupa puagi wywy ĩngi. 25 Pendje Apã rõ kowe nonga ina: cho kainallã go matãwerã chidjaechegi bue biribuchã, go ymachidja bue tãrã rekogipe rõ matãbawerã tõ mumbu puare, cho rõ chidja mawerã idja wapywã go tõ mumbuwegi pendje wywype. 26 Go djepe rõ chã watapawerã, go ypirã tykuwe nongape; gogi ywy llabuwa rõ kuawerã awarõ cho, dje ywy llabuwa rõ kuawerã awarõ cho, dje Apãeche, wẽwẽrã dje o achype ekómbu emi kuwewerã idja chupa wywy rupi, go Jacóbo rõ chidjagi djdpowerã idja inambuwegi wywy.