1 Wa kua wapyrã ywy tãchīpe go daregi Babilonia pua. Wapy ywypw, go ymachidja wapytygi īllã djepe, go Kaldeo tey kudjã: Ina bechewerãma djedji go dare gatugi eche djuwy gatu. 2 Trigo pychoatype pycho mondo; matã mondo dje tõ pecheatygi tokape ga djono dje tõ a'a, papy ga mondo dje tyru go Tokape ga mi dje makã, dje wachabu go ypurã rupi. 4 Dje tyru pui ga mondo, wechãwã dje rõ echeche, dje chã teychewã: cho pepywerã dje djapo buchãwedjiwa go īllãwerã duwe chope kawãwãngi. 3 Nandje djepyatygi djedji pepyare Jaweh chidjae chegi dja bykuapyre go rõ Israel puarã begatugi go djapowerã djedji go bue wywy. 5 Wapy, djawullãpe go chãwãpe, dje Kaldea tey kudjã; go nongabu pukallãwerãma ekoãndy pua yma chidja wachu breko. 6 Cho prãndjã cho chupadji, go buchãmbama cho llapo, go miwe dje ipope: go zchīpurã rupydjiwatygi puy wachu go chuepurãgi puarã. 7 Dje inawe: gorãwe cho iwerã kudjã ymachidja wachu: dje djãwa djawullã go kowe bue wywydji, dje kuallã dje lluawã rekuaty. 8 Wēndu, kowewu, kowe bue dje kudjã djãwechegi, dje wapygi wapyaty wachupe krymba echedjiwa, go dje inangi dje djawãpe: cho etakrã, go duwe īllã cho djawē, mcho ekõllãwerã proweginõnga, cho kuallãwerã bue rõ go ei' i īngi membyllãndji. 9 Kowe mirõngi wewēra djepe warõllãbu, etakrã kreype dje iwerã membyllãndji emi imellãndji; dje buã tarãmbu djepe krei buchã rupi emi prawowã. 10 Dje kua reko dje djēmbidji, dje rõ ina awa rõ chope wechã, dje tõ gatu rõ go dje kuagi go rõ djepe kaina, dje ina dje djawãpe; cho etakrã rõ ī duwe īllã cho djawēwãtygi. 11 Dja llãbu wewēra bue bucha, dje kuallãwerã matyware go wēwe: djepe wewēra okryrallã buchã dje kuallãwerã go dje buãndy nonga krei buchã rupi go rõ djepe djuei buchãmbawerã, wewēra djepe go bue dje kuallãngi go dje warõllãwegi. 13 Bewã wedja ga mondo go dje krãdobua'ã buchãbgi go dje bua'ãndy nõnga go dje kbuchuwedjiwe, wechãmbyrã go djepe kuwēwerã ko emi dje ruwawerã ko go bue buchã wewērangi djepe. 12 Dje kuara djuellãma go djepe kiuatygipe, wē ga bu kowebu djepe kuwewã go meīgi emi kreydji kuawã dja lluawã, go tatadji maīndygi emi maīngi djachy poudji. 14 mai pyry, gogi rõ ekõ wyra o piãndjãwe nõnga: gogi wywy tatape mēndypapyrã gogi wywype kuwēllãmbyrã īmbechewerãma go tata ēndy rupi: īmbechewerãma gope tata wa'ã ēndygi bue bakuwã. 15 Gonõnga wewēra djepe go dje bue djapollãdjiwa emi go djedji bue pepywegi dje kbuchuwe buare: go etakrã wywy owerã dja ape rupi, īllãwerã etakrã djepe kuwewãngi.