1 Kowe nonga ina Jaweh Sirope, go dja prawowegidji, cho kãwãre go djywa llu rekuaty, duwe ekuandy wywy ĩwã dja ipo chidja wydji emi ymachidja wachugi wywy tõmumbu pua rekopytygi rekollãwã; duwe tapy tãrã wywy tapy ikẽ lluandy kapekawã go pechẽllãwã emi: 2 “Cho owerã dje o nondje mi, go kuambuku wywy ywy chepe gatupawerã; cho kio mondorã tapy ikẽ lluãndy bronsedjiwagi, emi tapy djãwã pecheaty ierrodjiwagi cho kio mondorã, 3 cho mẽbawerã bue biribuchã djẽmĩbapyregi wywy go cho djẽmĩbawegi wywy, go nonga pendje kuawerã cho rõ Jaweh, go Israel Apã Wachu, cho pukawe dje bykuapyre rupi. 4 Cho prawo buaredjiwa cho buetygi Jakobdji, emi cho prawopyregi Israeldji, cho pukama dje bykuapyre rupi, go bykuapyre cho bykuawegi dje kuallãbu djepe chodji. 5 Cho rõ Jaweh, cho nonga ĩllãeche duwe; ĩllãeche Apã Wachu duwe cho nonga. Cho mewerã tõgatu tõmumbu kuawã, go dje kuallãbudjepe chodji, 6 go kua gatuwã krey wẽ rekuatywa djiwe, emi krey wa rekuatywa pewe, ĩllã duwe cho nonga; cho rõ Jaweh, ĩllãeche duwe cho nongaechegi, 7 Cho rõ krey djapoaregi emi chãwã djapoaregi, cho djapo okryra gatu ĩwã emi cho djapo djuei buchãpe ĩwã. Guei cho, Jaweh go wywy cho djapo.” Jaweh rõ bue wywy djapoaty 8 »Ywa djiwe baky ga bu; go bakyreidji kawo ga bu bue gatu; ywy pewo ga mondo, godji wẽ ga bu kuwẽ gatu emi bue gatudji; go wywy edji wẽ ga mondo. Cho rõ Jaweh go djapoaregi.» 9 Lluuu djakawã krymbagi dja djapoaregidji! Go kara mõ'õ ko djaka dja djapoaregipe? Go mõ kara ko inawerã mõ'õndji djapoatygipe: “Bue rõ dje djapogi?” Goba ina: “Dje djapowegi kbegatullã”? 10 Lluuu dja apãpe inagi: “Bue buare dje tey reko cherã? Emi inagi dja ei'ipe: Bue ware dje memby reko cherã?” 11 »Kowe nonga ina Jaweh go Israel Apã Wachu djã gatugi, go pendje djapoaregi: “Prãndu gami chope go mawebu ekowerãngidjiwa; prãndu gami go cho tey wywydjiwa, emi cho bue djapopawe wywydjiwa. 12 Cho djapoare ywy; cho djapowe emi ache go cho mima gope ekowã. Cho ipo rupi cho djapopawe ywa wywy, cho mĩbawe tata ywadjiwagi wywy. 13 Go Sirope cho puãma cho inabawe bue gatu wywy djapo gatupawã, go cho chepe gatupawerã dja ape wywy; idja puãmbawerã tapy cho tapy tãrã, go erupawerã cho ekuandy pua rapapyregi wywype, go wywy bue pepy mewã pukallãwerã, go nonga ina Jaweh chidjaechegi.”» 14 Jaweh ina kowe nonga: «Go bue bitaty Egipto puatygi, go bue wywy raty buta pepywã Etiopia puatygi, emi Saba pua yma puku wachugi wywy, go wywy ĩbawerã dje ipope go ĩbawerã dje buepytygi wywyrã; dje kuere rupi ekowerã tykõ krere papypyredji, go dje chã ruwa ĩmbu kmarãwerã go puka omatãwerã djepe go inawerã: “Kainallãeche Apã Wachu ĩ pendje wywydji, ĩllã duwe Apã Wachu go nongagi.”» 15 Go kainallã, dje rõ Apã Wachu mechãllãbytygi, go Israel Apã Wachu, go kuwẽandygi. 16 Go chã nonga djapoatygi wywy chã taychedji endarã, djã kõmbo buchãpe ĩwerã emi kadjãmbawerã; 17 go Israel puagi wywype kuwẽwerã Jaweh go kuwẽ krãpĩllãndydji; pendje gorãwẽ kreybu wywy chã teychellãwerã emi chidjallãpe ĩllãwerã. 18 Go kowe nonga ina Jaweh, go ywa djapoaregi; cho rõ Apã Wachu, go ywy djapoaregi, go eche wẽwã djapoaregi, go ka djapollãmbyre, gope ekowã dja djapowe: «Cho rõ Jaweh, ĩllã duwe cho nonga Apã Wachu. 19 Cho djawullã djẽmĩ rupi, emi ywy chãwã wachu rupi; cho inallãwe Jakob irondy wywype: “Chope ka mundjã endawe.” Cho rõ Jaweh cho djawu djãpãllãndy, go cho inagi kainallã.» 20 «Pendje wywy, go duwe ekuandy pua wywy manollãwegi wywy, kuãty ga bu; ekõba ga bu djawuwã. Go kua gatullã wyradji djapoatygi chã nongagi, go puka omatãgi go chã nonga djapopyregidji go idjape kuwellãwerã. 21 Pukapa ga mondo ekõmbawã, go edji wywy prãndu ga reko; Awa rõ meare kuawã godjiwa djypyech edjiwe? Go chã nonga djapopapyregi ko inawe bue ekowerãngidjiwa? Amai ko cho, Jaweh? Ĩllãeche duwe Apã Wachu cho nongagi; Apã Wachu adjullã gatugi emi kuwiãndygi. Ĩllã duwe cho etakrã rõ ĩ! 22 Djewy ga bu cho endape go ywy pua ĩngi djiwe, pendje wywype cho kuwẽwerã, guei cho rõ Apã Wachu, ĩllãechegi duwe. 23 Chodji cho djawu ruwallãngi mema; cho djuru rupi inama kowe djawu bue gatu, go kadjawullãbyre: Cho chã ruwa kmarãbawerã, go cho chã ruwa djawu ruwallãwãngi djawuwerã duwe djawu wywype. 24 Chodjiwa inawerã: “Kainallã Jawehdji eko bue gatu emi chidja gatu.” Go idjadji kachidja buãngi wywy chã tyechewerã, 25 Jaweh rupi djã adjullã gatupawerã emi chidja gatuwerã Israel irondy wywy.»