1 Kowebu dje Jacob cho buetygi wendu gatu gami dje Israel, cho rõ djepe prawoaregi: 2 Go nonga inama Jaweh dje djapoaregi go dje djapoare emi dje ei'i kra'ape cho rõ dje kuweãndygi, krymballãeme dje Jacobo, cho buetygi dje rõ Jesurum cho prawopyregi. 3 Nuewerã y'y ywy y djuechegi wywype cho nue mondowerã y'y go ywy y ĩmbapyregi wywy rupi, cho nuewerã cho krei gatugi dje tey wywy llabu cho djawu gatu mewerã go dje irondy wywy llabu. 4 Wẽ tãrãwerã go djorã bychepe wyra Sáuce nonga y ẽmbe pua ĩngi nonga. 5 Gobu etakrãngi, rõ inawerã: cho ro Jaweh llapo; duwegi rõ rawerã Jacobo bykuapyre, emi duwegi rõ parawerã idja ipodji Jaweh llapo gogi wywy ury gatuma wẽmba puare Israel bykuapyre. 6 Go nonga ina Jaweh go Israel ymachidja wachugi idjape kuwẽãndygi Jaweh chidjaechegi cho rõ go nondje pua emi cho rõ go tapĩeche pua cho djawẽ ĩllã duwe Apã Wachu. 7 Awa rõ go cho nonga djuegi wẽ gami idjape wechãmbyrã, djãwu gami idja awa rõ kiu'u go djypyeche pua djiwẽ emi go wẽwãngidjiwagi. 8 Krymballãeme emi pendje o ryryeme cho wendukallã ko pendjepe nondjeche djiwe. Pendje rõ chope wenduaregi cho ina buare djepe: ĩllã duwe rekuatygi cho djãwẽ ĩllã duwe pendjepe kuwẽwãngi, cho kuallã etakrãeche djepe. 9 Go djapoatygi chã nonga djapopyregi ka djapopyre wywy prawodjuechembu djepe go chã nonga djapoaregi rõ kua gatu idja djapowe rõ wechallã emi bue kuallã. 10 Go djapogi rekuatygi kabewãngi chã nonga kumbe mondopyregidji chã nonga go rõ kua gatu go kuwẽllawerã duwegipe. 11 Kua gatu gami go mudjãndygi idjadji, go rõ chã teychewerã ywy llabuwa rõ go djapoaregi nuãmba gami ekõmbabu djepe gogi wywy djã mundypawerã go etakrã wywy chã teychepawerã. 12 Go tykõdji bitatygi pychyma mondo go tykõ papyatygi, bita reko tata ẽndype go tykõ pachoatygipe pacho reko djapowã chã nongagi bita reko godji idja eche chidjadjiwẽ gobu idja llellãmbu idja praru roma y'y tykullãmbu rõ idja mano roma. 13 Go wyradji bitatygi matã reko metro go paratygipe parama go chã nonga kryrallãma mondo prechãwã idja kyty rekoatype djapowã idja chã nongawã etakrã kbe'e chã nongagi go begatuwãngi gobu mima idja pre'e llambatpe. 14 Djapowã idja rekuatygi chã nonga oma itywã go Cedro emi go cipres emi go encina gogipe rõ prawoma go wyra puku wachu byche puare ka byche pua, gogipe rõ pechema go baky rõ idjape yma gatuma mondo. 15 Godji rõ ywy llabuwa puagi mendyaty chãkãrã eche akuwã mendypyty emi go mõ'õ kroupyre rudjywã wikytã godji djapo emi go idja rekoatygirã chã nonga kmarã rekowã idja chã ruwa. 16 Etakrã chãkãdji djapoma idja chãkãrã idja bakupyregi rudjywã. Idja kra gatubu go inama "Cho eche chidja gatuma kowe tata aku djawẽ." 17 Go pytawedji djapoma mondo idja rekoatygirã chã nonga kmarã rekowã idja chã ruwa. Kua rekowã idjape puka rekowã idjape inawã "cho nue gami cho djuei buchãpe ĩmbu, dje rõ cho rekoatygi! 18 Go rõ bue kuallãeche gogi wywype rõ bue kuallãeche, chã pechepyre idja wechãllãwã, idja djã pechepyre idja kua gatullãwã bue wywydji. 19 ĩllã djã djawu gatugi. Idja tõ rõ buchã kiu gatullã buaredjiwa bue wywy. Go nonga idja inawã kowe wyra kowedji cho djapoma mondo etakrã wyra pytawe cho mendy wã tatape go tata wã'a llabu rudjywerã cho bakupyre keiwerã cho uwerã go pytawegidji cho djapowerã etakrã rekoatygi chã nonga cho kmarãwã idja chã ruwã. 20 Go kua rekotygi krembodji upiama mondo ape gatu puare kabewã idjaechedji go nuellãwerã idja djã'ã go manowe puare inallãwerã: Chollã ko go kabewãgi cho rekogi cho ipo llu'u rekuatywagi? 21 kua gami kawe buedji dje Jakob emi dje Israel, dje rõ go cho buetygi. Cho rõ djepe djapoare, dje rõ cho buetygieche, dje Israel dje chope wedjaeme. 22 Go wytu kuerapa mondo nonga go bakyrei wywy, go nonga cho kuaillã mondowerã go dje ka chidja buãwegidjiwa emi go rei tachĩ krãpĩ bitallã nonga, go nonga cho kytypa mondowerã go dje bue buchã djapopawedjiwa. Ekõ gami cho endape, cho kuwẽwerã djepe. 23 Ywadjiwa wywy pre ga mondo Jawehpe, goeche rõ pendjepe djapoaregi; ywy krãpĩ puka mondo ury gatupe; kuãmbuku wywy, emi go pua ka'a emi wyra wywy ĩngi gope pre ga mondo ury gatupe go Jaweh kuwẽwãdjiwa emi go Jakope, go Israel ekuãndype idjape kua rekowerã emi. 24 Kowe nonga ina Jaweh, go djepe kuwẽwãngi: cho rõ djepe djapoaregi dje ei'i kra'ape: cho rõ Jaweh go bue wywy cho djapo, guei go cho ywa wywy miare, emi kowe ywy wywy mi gatuare; 25 Cho mi buchãmba roma mondo go krei buchã rupi djawutygi djapoty wywy. Cho go chue tõ gatugipe chã wycho roma mi cho djapoma wechãmbyrã gogi wywy rõ tõ buchã, bue wywy gogi inambawegi wẽllãwerã. 26 Cho rõ wendu gatu go cho buetygi djawu, emi cho llapo tapy tãrã Juda mi gatuma go cho buetygi inangidjiwe, gogi wywy rupi cho inama Jerusalempe: cho ekuandy dje djãwãpe emi ekõmbawerã, emi go Judape, cho mi gatuwerã, go mi buchãmbapyregipe puãmba miwerã dja tapyrã wywy. Go mi buchãmbapyregipe puãmba miwerã dja tapyrã wywy. 27 Guei cho inaregi go y wachu kra pukuechegipe piryllãwã, emi cho piryllã roma mondo go ywachu, 28 Go Sirodji cho inama: Dje rõ cho wachupurã warõandygi emi dje djapowerã go cho inangi djiwe; go Jerusalendji, inama puã miwerã emi, emi Jaweh tapydji inama, djapo pouwerã emi.