1 Kowebu dje Jacóbo, pendje Ãpa Wachu djapowegi dje djapoare inama djepe: kryballeme, cho kuwẽma djepe cho pukawerã dje mbykuapyre rupi, dje rõ cho llapoechegi. 2 Dje wachadjepe y tãrã rupi, cho ĩwerã dje djãwe, go ypurã wachu djepe pytybudjepe dje towẽllãwerã. Emi dje wachabu djepe tata byche rupi, djepe keipallãwerã go tata endy emi keipallãwerã. 3 Cho rõ, dje Apãiche emi cho rõ dje rekoatygi cho rõ Israel Rekoatygi, cho djepe djepywerã; dje endawepe cho pepy mema Egipto, emi Etiopía go Sebápe (Ciro idja ipope). 4 Dje ĩn gatudjiwa cho chã ruwa, cho chã ruwa, cho tã'a djepe, emi djepe cho prowo gatu; kowebu cho me'ewerã kbe'e wywype emi dja ekuandy wywype dje dja'ã pepy. 5 Krymballãicheme, cho ĩnwerã dje djãwe; krey ekuandy rekuaty cho eruwerã pendje irõndy wywype, kreywa rekuaty cho nuãwerã gogi wywype. 6 Cho inawerã kreywa wachu rekuatywagipe: Me'e ga mondo; go krey wẽ llu rekuetywagipe cho djawuwerã: kawãime duwe wywype, eru ga mondo cho te'y wywy mbudjakrã pua emi cho tey kudjã krãpi puagi wywy. 7 Gogi wywy pukagi cho mbykuapyrepe cho eruwerã wyche dja Israel ekuandype cho djapopawegi wywy chodji kua gatuwã. Gogi wywy wechãmbawerã emi gogi wywy edjowerã, kmarã po'u wã kowebu. 8 No'e ga mondo dja ekuãndy pua , chãillãgi, go chãmbudjepe, eru gami go wendudjuellãgi pychabudjepe. 9 Nuã wachuma dja ekuandy pua, wywy gogi wywy oma etakrã nuawachu pua. Awa rõ kiuwerã pendje mbychepe kowe buedjiwa awa rõ kiuwerã nadjepe nodjecheware. Erugami duwegi wechãre wywy wechãma dja ekõ gatu duwe wendu djepe go nonga dja djawu. 10 Pendje rõ cho wechãre, ina pendje Apã Wachu go cho mbuepytygi, go cho prowopyre. Pendje rõ chope kua'a emi kua gatugi chodji pendje kua'aĩllã duwe pendje kuwẽwã; cho nondje ĩwã duwe pendje kuwẽwãgi, cho garãwe endarã go krãpiwerã mbue wywy djapopyregidji. 11 Cho rõ pendje Rekuatygi cho ĩllabu ĩllã duwe pendjepe matãwã djuei wachubu. 12 Cho kiupyre cho mbykuapyre, cho pendje kuallãre go ĩ mbechembu duwe pendje kiullãdy pendje mbychepe. Pendje rõ cho wechãre, go nonga inama Apã Wachu, cho rõ gorãwe ĩwerã go ywadji emi ywy cho llapoecherã. 13 Ko krey kowebu cho inama: ĩIlã duwe matãwãgi: etãkrã mbue cho ipodji . Go cho djapodjuegi; cho ro djapowerãllã duwe chope pychywãgi. 14 Go nonga ina Jaweh, Israel Apãeche rõ mbegatu, cho rõ pendje kuwewã: Pendje djiware cho monduare gogipe Babilóniape, cho djemiwerã go wywype, go Caldeapua djemi wywy dja wyra kara wachu wywype, go rupiwe dja ymawachuwe. 15 Cho rõ pendje Apãeche, emi go praru gatuechegi, Israel djapoaregi, pendje ymachindja wachugi. 16 Go nonga ina Apã Wachu, cho djapawe pendje wachawã y purã wachu rupi, emi go cho djapoma ape mini gatu go y chidja rupi. 17 Cho rõ wedjawe nuewã dja wyra wata, dja mbepurã, go tõãllãgi nua’ã dja chidjadjiwa, cho djapiwã go emi wawerã emi puaãmbechewerã; Go ĩmbechewerãma, go tata endy uwe nonga. 18 Kualleme bue wywy pendje djapowedjiwa, go erueme pendje tõ'õ pua go nondjecheware. 19 Maĩ gareko, cho djapowerã emi mbue pou; Pendje kuallã wyche ko cho ape gatu djapowerã go ka’irõllã rupi emi yporã tuwygatu wẽmbawerã go ywy piryllã endawepe. 20 Gogi mymba taiche djorã pua, krachowa emi taiche wywy go emi mbewyra wachu te’y; chodji kuarekowerã, go cho mibuare y’y ka’irõllãme emi go ypurã tuwy gatu go ywy piryllã endawepe. Cho ekuandy cho prawowegi emi y tykuwã. 21 Go ekuandy pua wywy go cho djapowegi kiuwerã chodjiwa pre’e. 22 Dje, Jacobo, dje pukallã, dje Israel dje chodji kuallãwe. 23 Dje mbue keĩ mbechema wachupurã tey’y dje rõ chope kmarãllãma dje kẽimbyre djiwa; Cho pukallã dja keĩmbyre, cho wechãdjuellã cho pukadjuellã bue teiwu gatu dje chope mewãngi. 24 Dje kawallã cho llaporã bue teiwu gatugi, go cho emi uryllã keĩ endawepe, dje djono cho llambu dje bue buchã emi dje djapo buchãmbyregi go cho prarupawe. 25 Cho rõ mbuwewerã dje bue mbuchã djapowe cho mbykuapyre prawodjiwa cho kuallãmbechema dje djembi buchãwedjiwa. 26 Djedji rõ cho kuawerã djawu bowo gatu mewãgi djawu gami dje ẽkõ gatuwã. 27 Dje Apã nodjewaregi bue mbuchã djapo ury emi pendje nondjeware ka chidjabuawe chodji. 28 Kowebu cho mewe gogipe dja mbywãndy ipodji cho pachopawã ka djudjadjiwa chodji.